香港冇地方好玩? 精選本地一日遊
香港地少人多，行出街好似度度都人頭湧湧，個個商場啲舖頭又差唔多，仲周圍都係拖喼黨；如果一家大細想去啲遠離市區嘅地方玩吓，淨係車費都已經夠重皮！咁究竟香港係咪已經冇地方好去？都唔係嘅，其實唔少旅行社都有搞啲「本地一日遊」，有玩有食，又有本土特色，就算去嘅地方偏遠少少，都有專車點對點包接送，慳咗啲時間，咪去多個地方玩囉！而家安排仲有好彈性，想食風味嘢，有團體特色餐，唔想同人夾食，亦都可以揀自助餐！趁暑假，不如揀個團去玩番吓！
平時入機場，多數都係出埠去旅行，其實機場客運大樓裡面，有好多娛樂設施玩架！位處第二航廈嘅第「航空探知館」，以機場跑道為設計的入口，可以欣賞二號客運大樓離港大堂。最正就係互動式展品區，唔止有介紹飛行原理及飛機結構，參觀者仲可以親自操作機翼及飛機爬升等飛行操作，對飛行有夢想嘅小朋友，見到一定好興奮！
鄰近機場嘅馬灣，上面唔止得挪亞方舟一個景點架，呢個環保小島上面，仲有條馬灣舊村，入面有條古蹟徑，去到可以帶小朋友去認識吓本土嘅文物；學完嘢，又可以遠眺青馬大橋影張相，集個郵！膳食方面更加係亮點所在，就係喺機場富豪酒店食buffet，話哂都係五星級，質素一定有保證! 玩足一日玩，仲有自助餐食到飽，團費都係$298，全程都有冷氣旅遊巴載住出入，點計都係抵啦!
航空探知館、翔天廊、馬灣舊村、馬灣古蹟徑、五星級富豪機場酒店自助餐團
行程詳情
出發日期：7月26日及8月9日
集合時間：09：30
集合地點：港鐵九龍塘站 F 出口
團費：$298 (大小同價)
台中清境農場係近年大熱嘅親子旅遊景點，可以畀小朋友接觸吓大自然，又可以同啲小動物近距離親近吓。其實香港都有類似嘅農莊，當然規模唔會有清境咁大啦! 不過一樣可以同餵吓羊咩，同埋駝鳥；為咗令小朋友玩得更充實，仲有加埋DIY pizza同七彩沙樽tim! 膳食方面雖然係食團餐，但係係去流浮山食鮑魚海鮮宴喎！一位都係$289，仲有車遊勻大半個新界，朝九晚五玩足8個鐘，咩電都放哂啦!
沙頭角有機農莊、DIY pizza+七彩沙樽、流浮山品嚐【鮑魚海鮮午宴】親親大自然一日遊
行程詳情
出發日期：需向旅行社查詢
集合時間：09：00
集合地點：尖沙咀中間道半島酒店後門
團費：$289 (大小同價)
旅行社：永安旅遊
查詢：2928 8882
假日通識堂 行勻香港西式歷史建築
基於香港嘅殖民地背景，所以香港有唔少具特色嘅西式歷史建築，呢啲建築物你可能平日成日搭車都會經過，但係又有冇行入去，了解吓佢哋歷史，同埋佢哋究竟有幾咁巴閉呢?喺中環嘅前立法會大樓，曾經係香港最高立法機關嘅所在地，係典型嘅仿古希臘式建築；而前終審法院，就係仿古羅馬式建築，聖約翰座堂，就係仿古歌德式建築；喺薄扶林嘅伯大尼修道院就係仿古歌德式建築，每棟都已經有過百年歷史，而家集合咗西方建築嘅精髓同特色，全程仲有香港歷史古蹟專業導遊做導賞，跟住導遊出去行一日，就等於身體力行咁上一堂香港歷史堂。而午餐就係一間連鎖酒家度食團餐，建議可以搵多幾個家庭一齊參加，一齊邊行邊學，都係一個唔錯嘅體驗嚟架！
立法會大樓(仿古希臘式建築)、前終審法院(仿古羅馬式建築)、聖約翰座堂(仿古歌德式建築)、伯大尼修道院(仿古歌德式建築、博物館)、鴻星酒家粵菜宴一天遊
行程詳情
出發日期：逢星期二、三、四
集合時間：09：45
集合地點：中間道尖沙咀郵政局門前
團費：$228 (大小同價)
旅行社：油麻地旅遊
查詢：2516 2303
Hea遊東涌睇炮台 大澳漁村嘆海鮮
自從可以坐車入到大嶼山之後，的確係吸引多咗好多遊客由陸路入去玩，每到假日，東涌巴士站條條路線都打哂蛇餅，一出一入都嘥唔少時間。跟團就有呢度好啦，車出車入都唔使等。呢個主打東涌大澳嘅一日遊，行程唔算趕，可以去迪欣湖草地行吓、hea吓，又有得去東涌炮台睇吓清朝留低嘅歷史遺跡；午餐就會喺大澳食個海鮮餐，臨走仲可以買啲蝦膏咸魚返去做手信，最啱啲唔鍾意玩到趕頭趕命嘅家庭啦！
欣澳迪欣湖、東涌炮台、長沙海灘、大澳漁村【風味海鮮宴】一天遊
行程詳情
出發日期：天天出發
集合時間：09：00
集合地點：按指定地點出發
團費：$168 (大小同價)
旅行社：星河旅遊
查詢：2984 0202
賞珊瑚睇岩石 塔門食海鮮
西貢被稱為「香港後花園」，水質潔淨有唔少靚珊瑚，坐喺玻璃底船上面，水都唔使落就可以欣賞到，帶小朋友去一定會好興奮！不過呢類海灣、離島所在位置都要有船接駁，自己去唔係唔得，不過交通真係唔係咁方便！所以如果要一次過去勻海下灣、荔枝莊同塔門呢三個地方，跟團去就最乾手淨腳，食同玩都有人安排好哂! $200蚊唔使，包船包埋餐海鮮，識玩，梗係跟團去玩啦！
海下灣玻璃底船觀珊瑚、荔枝莊、塔門聯遊
行程詳情
出發日期：7月26日、8月16日、8月23日
集合時間：08：45
集合地點：大學火車站
團費：$188 (大小同價)
旅行社：翠明旅遊
查詢：2527 2513
食住Buffet 夜遊維港睇激光
「幻彩詠香江」幾乎晚晚都會有，可能平時經過都未必會留意，但係「時時都見」又唔代表佢唔巴閉！因為呢場恆常匯演，係列入健力士世界紀錄，全球「最大型燈光音樂匯演」。不過呢個團唔同嘅係，一家大細可以坐喺渡輪改建而成嘅餐廳裡面，邊食自助餐，邊喺維港海上欣賞47幢大廈嘅互動燈光及音樂效果，同海港兩岸嘅夜景，雖然呢餐buffet又冇生蠔，又冇長腳蟹呢類翻本嘢食，不過叫做中西南北美食同甜品，樣樣都有，而且喺海上睇住激光嚟食，應該係個與別不同嘅體驗！
「幻彩詠香江」自助晚餐
行程詳情
出發日期：天天出發
集合時間：20：00
集合地點：北角東渡輪碼頭 或 紅磡渡輪碼頭
團費：成人$440+10%、小童(2至10歲) $280+10%
旅行社：洋紫荊維港遊
查詢：2802 2886
撰文：Joanne
相片來自網絡
