薛家燕獨力養大仔女 好奶奶節目暢談和諧婆媳關係3道法則｜日日媽媽聲
撰文：SundayKiss｜圖片：新傳媒資料庫
薛家燕獨力養大仔女 18年升格當奶奶
8歲出道做童星，拍戲拍到33歲結婚，之後卻被丈夫拋棄而復出，幸大女石祐珊幫得手、細女石耀珠港大碩士畢業，18年二仔石耀庭結婚，薛家燕榮升奶奶。薛家姐上《日日媽媽聲》節目，大談婆媳相處之道，表明要當「開明奶奶」。
法則1:視新抱如己出 親自送上驚喜
18年，薛家燕升呢做奶奶，一向視新抱如己出，猶如親生女。她為了氹新抱開心，試過在新抱Zoe生日，貼心在家策劃小型生日會，除了親自佈置現場，還安排外賣火鍋，為新抱帶來豐富的生日飯。入門時更送上豪宅、家傳之寶和大量金器。
去到邊都喜氣洋洋笑容滿面，家燕姐更像是額頭鑿住個囍字一樣，快要被她感染到想跟住跳番part十字舞。當年兒子石耀庭向拍拖三年女友Zoe求婚成功，在洲際宴客舉行婚禮。由於薛家燕人面廣，她坦言：「本來係預咗擺五十圍酒，不過唔夠坐。婚前到過新加坡登台，又有粉絲話買定機票出年要睇我娶新抱，佢哋由細睇到我大，一早唔係粉絲做咗好朋友，個個都係真心替我高興，我都好想個個都嚟齊。」所以最後擺兩日酒，一晚是兒子的朋友和親戚，另一晚就要讓家燕姐請圈中人。
法則2:做通氣的開明奶奶
33歲嫁為人婦，家燕姐結婚第13年，丈夫石保慶突然消失毫無音訊，直至三年後家燕姐通過律師提出離婚才再次蒲頭。雖然此段婚姻是失敗收場，家燕姐依然有肺腑之言要跟兒子說：「婚姻係兩個人組成一個家，未必所有嘢都啱啱好、夾得到，但一定要互相有溝通。我教個仔，最緊要做一個負責任嘅男人，娶得人哋返嚟、生得仔女出嚟，一定要對老婆、仔女負責任，呢種丈夫就肯定唔會衰得去邊。我老公當年一走了之，係為咗第二個女人同金錢，仲有一個原因，始終離唔開屋企教育。佢屋企四兄弟，四個都離婚，我唔敢話係父母嘅錯，但影響一定有。正常人，見到後生仔嗌交係唔係會勸交，話一人少句唔好傷感情呢？邊有人見到我同老公嗌交，就攞鋪床鋪出嚟叫我老公不如出廳瞓呢？我好畀心機煮完餐飯，問佢幾點返嚟，奶奶竟然捉咗佢出街食飯……有啲人就係咁，鍾意虐待人嚟證明自己嘅優越。」
有如此經歷的薛家燕，引以為戒，決不做如此的奶奶，不作「搞破壞」的那位。兒子兩公婆的事，都會交給兒子兩公婆自己解決。
法則3:用住家菜為家人送上愛
年紀小小就出道做童星，直到嫁人前，薛家燕未入過廚房、連電飯煲都唔識用。「當年拍拖，結婚前梗係出嚟食吓飯，互相了解吓先啦。佢問我識啲乜、鍾意做啲乜，我好自豪咁話，我識講日文、普通話，識跳拉丁舞同中國舞，又識北派同南拳北腿。佢聽完一啲都唔興奮，淨係問我識唔識煮飯……我八歲就拍戲，不嬲阿媽都唔使我入廚房，見到佢個樣咁失望，我又係個傳統女性，咪覺得咁樣做人老婆唔合格囉。」
於是家燕姐跟李曾超群學烹飪，由整曲奇蛋糕開始，學師一年，中西美食由前菜到甜品樣樣識整。「我由以前飯都唔識煲，到後尾一個人準備三日煮起十二個人一圍酒菜。我仲記得最開頭焗蛋糕，第一次整已經call定朋友嚟分享，點知次次發蛋都失敗，蛋糕變蛋餅，直到第七次至終於有蛋糕食。到後來，我唔止識整蛋糕，仲學埋唧花，屋企人朋友個個生日都係食我手製蛋糕。我最叻係海南雞飯，滑雞、雞湯、椰油飯仲有醬料都係自己整。仔女就最鍾意我用黃薑整嘅印尼雞，仲有我蒸魚最拿手，同啲酒樓大廚學番嚟，一條魚啲肉蒸出嚟要夠滑就一定要幫佢『化妝』，即係面頭薄薄上一浸豆粉囉……呢幾年坦白講，我連食飯嘅時間都冇，都係喺化妝間、車上面求其食飯盒，好耐都冇煮過飯囉！」
不強迫新抱學煮飯
不過家燕姐並沒有要求新抱學煮飯，反而為新抱著想。她曾笑言：「佢兩個啱啱結完婚無耐，又去咗度蜜月，我都無時間教，遲啲等無咁忙先啦。其實都唔可以話教，大家交流下廚藝心得，因為我新抱煮飯都有一手，尤其是煲湯，佢啲湯簡直係一流，我都飲咗成年幾兩年。」家燕姐對媳婦讚不絕口。
薛家燕情路堪苛 借鏡成就好奶奶
山窮水盡絕路回頭
因為丈夫不辭而別，由家庭主婦變經濟支柱，本來毫無金錢支援，都好歹有屋住、有那些年拍戲積蓄。誰知道幾年後連樓都被夫家收回，積蓄亦快見底，所以97年家燕姐才迫於無奈復出，接拍《真情》好姨一角：「當時仲未有《真情》拍，仲以為前夫會返嚟，點知一走已經年幾兩年。樣樣都唔順心唔順手，無咩錢剩又搵唔到工，嗰日仲要樓上裝修，天花板個水晶燈都跌埋落嚟。睇住啲仔女喊，我真係好灰心，覺得連盞燈都蝦我。我住喺25樓，嗰一下真係行出去露台，伸咗一隻腳出去……走投無路就係呢個感覺，好彩大女叫住我，肥仔又叫我返去食薯條，呢個時候我想提醒吓大家，人有可能會遇上絕境，但係你放心，個天係一定會畀條路你行。」
恰巧電視台找家燕姐參演《真情》，好姨角色一炮而紅，登台邀約不停，連周星馳都找她拍《食神》。「講起上嚟好好笑，《真情》受歡迎，由每集半個鐘加碼到45分鐘，又有其他嘢忙，每日天光返屋企，仲要幫仔女簽手冊執書包，成日都執錯晒，搞到仔女叫我唔好再搞佢哋啲嘢。因為太忙冇時間去銀行攞錢，屋企水電都畀人cut晒，開住工菲傭打畀我話冇towngas又著唔到燈。為方便去申請提款卡啦，點知又唔識用，畀櫃員機食咗三次卡……當時壓力好大好徬徨，過咗講番咪好笑囉，真係學無止境，做人每日每個階段都有新嘢學。」
求神恩典大病不死
雖然從小家庭不完整、爸爸又不在身邊，家燕姐說，有得必有失，也是因為這段經歷，三個兒女學會愛惜媽媽、知慳識儉，並且十分團結又懂事。「好姨個角色因為掉低親生女唔理，好負面，開頭大女珊珊唔畀我拍。第二次電視台再搵我，我話畀珊珊知要搵錢、要養家，唔拍唔得。佢話：『媽咪，咁你放心拍啦，細佬妹等我嚟照顧！』我當其時真係感動到攬住佢喊。家姐真係咁多年幫咗唔少手，細佬妹亦都好尊重佢又聽話，就算呢幾年大個晒，有啲咩事問完我，都有個習慣要問埋家姐先。」
2009年，家燕姐因為膽石手術發高燒，又患上急性胰臟炎併發肺炎，好多人問除了立定遺囑，有否擔心不能再復出幕前？「當時擔心梗係唔係呢樣啦！我三個仔女都喺美國唔喺身邊，我係向神祈禱，仔女未返嚟，千祈唔好畀我死住！仲記得當時珊珊話要辭工返嚟陪我醫病幫我手，我話咁大間公司有份好工，千祈唔好辭住。但係珊珊喺email度話，份工冇咗可以搵番，但係冇咗個媽咪，佢唔會再搵得番……」
