觀塘平價工廈自助餐 4小時任食任飲 家庭聚會之選
撰文：和牛b的成長日記｜編輯：Vicky
近日同屋企人一行11人去家庭聚會，人多嘅關係，又有大又細。對於餐廳嘅選擇都好重要，餐廳要坐得舒服，食物要啱咁多人嘅口味。食自助餐或者放題必定係最佳之選，但好多放題嘅餐廳空間都好狹小。食自助餐又有咩好選擇呢? 酒店最平都要$500一位起，唔知大家有冇試過去工廈食自助餐呢??
位於觀塘嘅「魔膳廚房」，工廈地下再行幾十級樓梯就到正門。（如果推BB車，會辛苦少少，無Lift到達）
我今次係第一次，感覺都幾新鮮，餐廳裝潢都係舒服，空間感還可以。我哋6時入座，人流唔多，7時開始坐滿，就有少少迫。
而食物方面，質素唔錯，款式都多樣化。
餐廳仲有BB櫈、兒童餐具提供。
工廈自助餐媲美酒店水平
食物方面，熟食選擇大概有廿款左右吧。
腸、雜菜、牛肋骨、牛扒、海鮮意粉、菠蘿炒飯、豬手、手抓餅、炸物盤、蜆等。
冷盤沙律有3款，另有其他配菜選擇。
芝士控必食，有巴馬臣芝士及金文畢芝士。
另有兩款燈籠腸及沙拉美腸片。
必飲餐湯，周打蜆湯超足料。仲要記得要配埋，脫卜卜嘅蒜蓉包呀。
手抓餅，配料都係自己選擇，我選擇咗鴨胸雞絲，醬料選擇都多。
餐廳送嘅龍蝦汁海鮮盛宴一客，因為我哋人多所以有兩盤。
海鮮都好新鮮好好味，份量都好大份！
甜品區，選擇都算多，不過就無大大件嘅慕絲蛋糕。
仲有爆谷
小朋友最愛嘅棉花糖，棉花糖仲係自己整嘅添呀！
自助餐較為罕見嘅台式圓子，仲有多隻味道。
飲品自助區有汽荔枝特飲、蜜桃特飲、檸檬茶（檸檬片係自己加）
仲有多款茶、水果茶供選擇。
工廈自助餐 價錢親民
我哋當日係星期日（假日收費），一家三口大概$774就食到自助晚餐，還可以啦。
小童收費按高度來定，90-130cm高就要以小童收費計算了。
餐廳在星期一至五亦有午市供應，而且正在做特別優惠5折，價錢相當化算。
魔膳廚房@觀塘
地址：九龍觀塘開源道77號業發大廈一期2樓D室
電話：3955 1461
https://www.facebook.com/MSKitchenkt/
————————————————–
