【親子好去處】一站式親子空間登陸荃灣 體驗消防員救火+設計專屬動物

撰文：Kamen | 攝影：Issac

一站式親子空間

荃灣愉景新城開放咗一站式親子空間Donut Village，場內除咗有遊戲區，仲有親子市集、CAFÉ及親子餐廳，媽媽們終於可以唔洗眼甘甘睇住小朋友玩，可以放低小朋友去行街食嘢！

專屬手帶記錄遊戲資料

場內有一個Donut Adventure遊戲區，有2個互動遊戲比小朋友參加。每位小朋友都會獲得一條手帶，去指定位置影相後就可以開通。每次參加遊戲前都要拍手帶入場，遊戲內會出現小朋友頭像㗎！

體驗消防員救火

最吸引嘅遊戲必定係消防員救火體驗！小朋友化身「火速救兵」，擔任唔同崗位去救火及教人，而且每一段時間就會換位，每個小朋友都可以參加各種崗位，緊張刺激！

動物農場 DIY專屬動物

而另一個遊戲就係「動物農場」，小朋友可以選擇並列印自己喜歡嘅動物，填上顏色後去指定位置將動物掃描後，動物就會出現喺熒幕上面！小朋友嘅手帶會記錄動物嘅樣貌，透過小朋友「悉心照顧」更會長大。小朋友更加可以派出自己嘅動物去參加比賽！

免費遊戲 AR跑步比賽

而場外亦有一個免費嘅AR遊戲，4個小朋友為一組，原地鬥快跑步！

黃巴士Cafe 超可愛冬甩/雪糕

場內有一架1：1嘅黃巴士Cafe，售賣各種可愛嘅食物！其中最受小朋友歡迎當然係雪糕，小朋友食到lamlam利呀！

親子市集購物

喺小朋友放緊電嘅同時，媽媽們亦唔怕悶！Donut Village有唔少商舖，除咗有嘢食仲有英國皇室專用嘅BB車添。

即將開放！Donut Cafe親子餐廳

現時Donut Village仲係試業階段，入面有一間Donut Cafe親子餐廳尚未開放，如果開放就係荃灣區少有嘅親子餐廳，超期待！

Donut Village

地址：荃灣青山公路荃灣段398號愉景新城一樓