在職媽媽幾攰都拒絕休息繼續湊女 為女兒健康自創加固食譜：無糖蝴蝶結包【五味人生】
撰文：Clara | 資料、圖片授權：受訪者僑媽
在職媽媽要兼顧工作家務同湊女
僑媽同老公從朋友走到戀人，再走到夫妻關係，已經相識20年，結婚六年。婚後，僑媽誕下女兒阿僑，但她沒有因此放棄工作，自己開工作室做美容師的工作，幫客人做霧眉、美瞳線、嫁接睫毛等，成為在職媽媽。平時僑媽早上起床就會開始準備女兒的早餐、午餐、下午茶，將所有餸菜煮好，放入保暖盒。之後就會回工作室工作，將女兒暫時交給家人照顧。晚餐前，她會趕回家，煮晚餐給女兒吃。有時客人太多，僑媽要提早兩小時起床，在家先煮好三餐，然後才可以出門口。
在職媽媽放假寧願犧牲休息時間
新一代好多家長都好緊張小朋友身心發展，僑媽放假都會寧願犧牲休息時間，帶女兒周圍去。女兒未夠一歲，僑媽已經她去日本、台灣旅行，有時間就帶她搭飛機、搭船，總之一有空閒時間就會帶她出去玩，希望她可以多多感受這個世界。如今於新冠肺炎疫症蔓延下，僑媽為免女兒屈在家，會常常帶她上PlayGroup，希望增加社交活動，又會帶她去郊外，接觸大自然同小動物，希望她在疫症下都有個快樂童年。僑媽說：「我係大膽媽媽，有咩都會畀女兒自己去試，再喺旁邊鼓勵佢同幫助佢，同時都訓練到自己學識放手同陪伴佢完成一件事嘅耐性。」
幾攰都拒絕休息 感謝「神隊友」分擔壓力
被問到做在職媽媽辛不辛苦，僑媽坦言一個人要負責做家務、照顧小朋友全日的作息、起居飲食、同時亦要維持自己的事業，的確很辛苦：「係非常疲累嘅一件事，有時放咗工好攰想攤唞下，但小朋友無見你一日，就想你陪佢一齊玩，呢個時間你只可以忍住自己嘅疲倦去陪佢玩同照顧佢，等佢瞓咗之後，仲有一大堆家頭細務等緊你。」幸運地，僑媽有個「神隊友」老公，幫她分擔壓力：「老公好幫得手，放咗工無論幾攰都會陪個女睇書講故事。喺我工作最忙碌嘅時候，佢會幫阿女換片、沖涼、準備食飯，有時仲會自己帶BB出去玩，令我工作嘅時候可以非常放心。」她笑言，老公不但會幫忙湊女，還會「湊」她：「最浪漫嘅事係每一餐飯，我只要專心照顧女女就可以，而我老公會照顧我，我個碗永遠都有滿滿既餸。」
一招擺平孩子2歲反叛期
就算有多幾個人幫忙分擔家頭細務，作為父母還要花心機去教懂小朋友是與非。然而僑媽指女兒愈來愈大，愈來愈有主見，加上又踏入「Trouble Two」，經常扭計、發脾氣。原來大多數人去到兩歲就會踏入人生中第一個叛逆期，國外都稱之為「Trouble Two (兩歲反叛期）」。小朋友學會說話及走路後，開始有自己想法，常常不聽從家長指示，堅持己見，例如想自己揹書包上學、拒絕著鞋、要揀餐具吃飯等。如果父母打罵他們，他們可能會情緒不穩，甚至破壞東西。曾經有名港媽在討論區發文，抱怨23個月大的女兒好難湊，令她感到挫敗。
僑媽坦言自己比較性急，一開始都會忍不住發脾氣，而且很嚴厲地鬧女兒，希望她聽話，跟隨自己那一套。但僑媽慢慢覺得這個方法解決不到問題，反而令小朋友情緒更加激動。後來她發現當女兒發脾氣時，自己愈表現得冷靜，女兒就會愈快會平靜。此時，她再講道理給女兒聽，情況就有改善，她說：「我覺得最好既教育，唔係要逼佢行你想佢行嗰套，而係可以同佢一齊成長，大家互相學習。」
為女兒健康著想自創加固食譜
為了女兒健康著想，僑媽真的很花心機。儘管生活忙碌，她亦會抽出時間，特別為女兒設計很多加固食譜，希望她愛上吃東西。其中有一款是僑媽獨創的無糖蝴蝶結包，以下份量一共可以整到六個迷你包。雖然今次只用一次發酵，但鬆軟度依然好高，加上外表充滿童真，小朋友一定會喜歡吃。
無糖蝴蝶結包簡易食譜材料：
- 紅肉火龍果打汁 80-100g (大概半個）
- 高筋麵粉 220g
- 酵母 2-3g
- 油 2湯匙
無糖蝴蝶結包簡易食譜做法：
- 麵粉酵母加火龍果汁拌勻，果汁可以慢慢加。
- 成糰後再加油搓勻，大概搓10分鐘。
- 放枱面蓋保鮮紙鬆弛15分鐘。
- 分成8-10個搓圓蓋保鮮紙
- 摺成蝴蝶結。
- 放焗爐內發酵30-40分鐘。
- 120度焗15分鐘，放錫紙係面防焗燶，再150度10分鐘，即成。
無糖蝴蝶結包簡易食譜小貼士：
- 如果BB不喜歡，可以將火龍果汁隔籽再加入麵粉。
- 如果BB大少少，可加少少糖或芝士，親子共食。
資料、圖片授權：受訪者僑媽
