蘿蔔絲包為女尋回媽媽的味道 爸爸仍念亡妻：我哋仲有兩世情緣【五味人生】
資料、圖片授權：受訪者劉志強 | 編輯：Clara
夫妻33年相處之道在於體諒二字
劉生表示太太20歲時就跟他相識，兩年後結婚，承諾一起走過餘生日子。他們誕下一子一女，一家四口相處融洽。結婚第五年，他跟太太就決定全家移民到紐約生活。同甘共苦33年來，劉生與太太都深愛如初，他說：「我同我太太嘅相處之道，要互相扶持、互相體諒，而唔係互相忍讓。因為我哋都覺得忍讓，係有限度，有爆煲嘅一日。」
後悔未能完成太太生前承諾
本來劉生對太太有三個承諾，第一，跟她返香港過生日；第二，跟佢返香港過農曆新年；第三，一定不會走（離開人世）先過她。第一個承諾已經完成，第二個承諾因為太太患上突如其來的大病，離開人世，所以未能完成，劉生感到很無奈：「其中兩樣我都完成咗，只有返香港過年呢件事未能完成！無奈呀！無奈呀！呢個承諾本應去年都可以完成，機票住宿都訂好晒。」
剖白對亡妻心聲：我哋仲有兩世情緣
對於太太，劉生充滿感激之情，他希望跟太太在來生再見，再續今生情緣：「由相識至結婚，好多謝我太太帶比我三十三年美滿幸福生活。媽咪啊！老婆啊！如果中國人講嘅緣定三生係真嘅話，我希望今生同你係啱啱開始，我哋仲有兩世情緣。今生我要同你講嘅，我哋唔係永別，係再見，一定會再見！我將你鍾意聽嘅友誼之光歌詞改咗，我希望『今生跟你暫別！他生必定能聚首！』」他表示人生無常，勸勉大家要珍惜身邊人與事，如果有時間或者經濟許可，想玩就玩，想食就食，坐言起行：「如果唔做，一句人生無常就會令自己後悔、內疚。」
煮得一手好餸 為女兒尋回媽媽的味道
本月是女兒阿Wing的生日，劉生為女兒包了生日利是，他說：「每次邊個細路生日，都係你準備利是，但從今年開始就要由我接手。你唔好諗住博大霧，扮唔知，條數我會記住，將來見番你，同你計清楚。」有感女兒孝順又乖巧，當日劉生還親自出馬煮了成枱好餸，連生日蛋糕都是他在家中自製，女兒仲特意向他「呵打」媽媽生前最愛吃的煎蘿蔔絲包。
劉生謙稱自己手勢沒有外面買的好食，不過都充滿愛和溫暖。劉生將蘿蔔絲包的相片上載到Facebook，網民紛紛讚好：「每次睇到你post，都覺得你一家好有愛，完全感受到你對太太嘅愛有幾深，時間會慢慢過去。」、「睇到我眼濕濕」、「你家人好幸福」、「整多啲好嘢食，好好過日子先對得住你太太」。劉生非常感謝網民的關心，他一定會努力走出傷痛。
蘿蔔絲包外皮材料：
- 低筋麵粉 600克
- 泡打粉 六克
- 酵母粉 六克
- 水 約200克
蘿蔔絲包餡料材料：
- 水 適量
- 生粉水 適量
- 糖 110克
- 麻油 少許
- 生油 八克
- 白蘿蔔 一條
- 紅蘿蔔 半條
- 煙肉粒 少許
- 蝦米 少許
蘿蔔絲包做法：
- 用清水開醇母粉，攪拌一下。
- 加入泡打粉、低筋麵粉，攪拌均勻。
- 用手搓揉麵糰，到表面大致光滑。
- 將麵糰搓到變圓形，蓋上保鮮紙，開始發酵一小時。
- 此時將蘿蔔切幼絲，另加少少紅蘿蔔幼絲。
- 紅白蘿蔔汆水、瀝水，備用。
- 用煙肉粒起鑊，爆炒至出油。
- 加蝦米、蘿蔔絲、蠔油炒勻。
- 加水、糖。
- 加生粉水埋䇜。
- 最後加入少少麻油
- 包皮發酵好之後，捲成圓柱體，再切成一節節，每節包入內餡。
- 放入蒸籠，大火蒸約七至八分鐘。
- 放落煎鑊，兩邊煎黃即成。
（向左推睇相）
蘿蔔絲包製作小貼士：
- 水的份量就視乎蘿蔔出水量，不要加太多水。如果太濕，之後做包餡時就難包得好。
- 這個餡帶甜比較好，加上因為有煙肉，所以糖的份量可以加多點，最重要試啱自己口味。
