越南春卷食譜｜3大越南米紙免開火做法！小朋友都整到 培養親子關係

越南春卷食譜｜小朋友都可以參與

越南春卷皮又稱越南米紙，在大多數的東南亞店舖都可以買到，大約$20就有一大包。越南米紙主要成分包括樹薯粉、麵粉及米粉，一張米紙的熱量大約為20大卡；低熱量又飽肚，近年來深受減肥人士的喜愛。越南米粉用水浸軟就可以食用，口感十分煙靭；經油炸後又會變得脆卜卜，簡直可以「72變」。除左可以包常食的越南炸春卷外，越南米紙更可以做成不同的甜品及美食，超級方便。越南米紙唔開火就可以整到各樣美食，可以和小朋友一齊參與。

越南春卷食譜｜1.低脂雪媚娘

常見的雪媚娘多數用糯米同淡忌廉製成，熱量十分高，對於要控制體重的人士十分不友好。越南米紙不經油炸的口感煙靭，和糯米糍的皮十分相近，加上無糖乳酪和水果做餡，酸酸甜甜，絕對滿足到減肥人士的口癮。最重要係免開火，小朋友都可以一齊參與。

越南春卷食譜｜材料：

越南米紙 8張
無糖希臘乳酪 250ml
喜愛的水果（士多啤梨/芒果/藍莓/火龍果等）適量

越南春卷食譜｜做法：

1.越南米紙用凍滾水浸軟
2.平鋪在桌上微微晾乾 （為了令春卷皮產生黏性）
3.在米紙中間鋪上適量的無糖乳酪，不要鋪滿，邊緣要留足夠位置包起餡料
4.然後放入水果粒（不宜太多，否則好難包）
5.將米紙四周向中間拼攏，用力將米紙捏緊封口
6.剪掉多餘的米紙皮即可，有心機可以在光滑面撒上無糖可可粉裝飾

越南春卷食譜｜2.免炸越南春卷

越南春卷唔一定要炸先好食，不經油炸的春卷風味不減，但健康很多。傳統的越南春卷內會卷上米粉或粉絲，但減肥期間就不建議。越南春卷的內餡彈性十分大，大家可以盡情搭配自己喜歡的蔬菜和肉類。雖然望落去好似唔飽，但1個春卷內除了有大量的膳食纖維，再加上肉類的蛋白質，一餐食2個已經夠飽。越南春卷多數會使用蝦仁，但如果海鮮敏感，可以換成雞肉，牛肉等。醬汁方面，最普通的生抽加魚露和粉許辣椒已經好正，泰式辣醬都係唔錯的選擇。如果和小朋友一齊整，可以換成吞拿魚等等不用烚的食材。

越南春卷食譜｜材料：

越南米紙 4張
青瓜 半條
紅蘿蔔 半條
生菜 4-6片
紫椰菜 1/4個
蝦仁（剝殼） 8-12隻
羅勒葉（optional）4片

越南春卷食譜｜做法：

1.青瓜，紅蘿蔔，紫椰菜洗淨切絲
2.紅蘿蔔及蝦仁用水烚熟，蝦仁剝殼，放涼備用
3.越南米紙用凍滾水浸濕後，鋪平
4.米紙中鋪上生菜打底
5.將蝦仁及各種配菜放在生菜上
6.先向內卷1-2下，再將兩端的米紙向內接，繼續向前卷至收口即口

越南春卷食譜｜3.無油紫菜天婦羅

有冇人同筆者一樣好中意食紫菜天婦羅？出街食的紫菜天婦羅大多數都好油，熱量又好高；但原來紫菜天婦羅都可以好健康，平時煲劇一流，就算小朋友為食都唔怕食多兩塊。越南米紙整的紫菜天婦羅可以不經油炸都做到脆卜卜，唔怕食到一口油。食譜中使用不經調味的壽司紫菜，如果唔介意油的話都可以用即食紫菜，連調味都慳返。

越南春卷食譜｜材料：

越南米紙 1張
壽司紫菜 1塊
七味粉（optional）適量

越南春卷食譜｜做法：

1.越南米紙用凍滾水浸濕後，鋪平
2.晾至有黏性時，將紫菜鋪上
3.晾到半硬狀態後用剪刀隨機剪成一塊塊
4.氣炸鍋180度炸8分鐘
5.炸至2分鐘左右打開氣炸鍋，紫菜有機會黏成一團，記得將佢地攤返開，否則點炸都唔脆
6.然後繼續炸至金黃就搞掂 （因為米紙和紫菜比較輕身，有機會吹起黏著氣炸鍋內部，如果聞到有燶味記得打開睇睇）
7.出爐後可以用鹽/七味粉調味