作家 李純恩 ：女兒是一世債主

生仔前三思：能保證孩子好？

筆者已婚但未有小孩， 李純恩 即建議，「可以唔生就唔好生喇，可以再揀我唔會生，原本我唔諗住生，所以結婚七年先生細路哥。」 李純恩 曾寫道，人生的無奈，首先是不由自主地被帶來人世。由於這個起因，以後的好與壞，以後的遭遇和悲歡離合，都必須經歷和承受。這也是他一直強調做父母的一定要負責任，一定要對孩子好，所以悉心照顧，供書教學，都是工作的一部分，或者乾脆說是債務的一部分，沒有甚麼「含辛茹苦」， 沒有甚麼偉大的父愛和母愛可言，如果父母保證不了對孩子好，或者只想着「養兒防老」，那就最好不要生了。不生，有時也是因為負責。 「生出嚟唔係講我哋辛苦，而係細路哥辛苦，父母要生細路哥覺得辛苦係抵死㗎，係你想生，但細路哥係無辜，佢辛苦你要補償佢，搞到大家都辛苦。」 李純恩 形容子女為「債主」，就如借錢一樣，「所有債主係你自己攞嚟㗎喎，你唔借錢就唔會有債主。」

婚後七年決定「揹債」

李純恩最怕欠債，但太太想做媽咪，思前想後，結婚七年，34歲之齡決定生個孩子，揹起一世債，決心做個負責任的爸爸。「生咗，就冇得後悔。我冇後悔遲咗生，呢啲係緣份嚟嘅，係呢個就係呢個。」 自女兒出世後，李純恩日日在專欄寫女兒，寫足廿幾年，吸引了大班媽咪讀者，有媽咪在網上稱，一直有睇李純恩的文章，就像「睇住佢個女大」。「我寫嘅同人哋寫得唔同，唔係炫耀自己個女，係寫一種心境，讀者反應都好OK，到個女慢慢大先寫少咗。」 他自言沒有刻意教女，就憑父女相處時的身教，「有英國貴族學校嚟教細路哥儀態，俾幾千蚊食餐飯，依家上海都成日有，我咪笑囉，點會教得識啫，就算教識咗返到屋企，你父母自己唔似樣都冇用㗎，幾千蚊白俾！」

身教由講故事開始

要做好身教， 李純恩 每晚陪女兒睡，講講床邊故事，直到女兒睡着了才返房，一直到十歲。「唔同階段講唔同故事，最初係亂咁作，講乜佢都笑，之後就講童話故事，我試過攞《西遊記》連漫畫，用普通話讀俾佢聽，讀讀吓就好玩。」為甚麼要用普通話？想操兩文三語？「唔關事，原著嚟㗎嘛！」 女兒漸漸長大，小學開始由「故事節目」變成父女傾偈環節，「傾到最後佢覺得煩，整一塊『請勿打擾』嘅牌掛喺門口，我先唔再入去。」被女兒叫「請勿打擾」都幾hurt，但 李純恩 相信這十年間，影響了女兒許多。 身教當然不只講故事，建立溝通橋樑更重要，「講故事係灌輸一啲你想佢知道嘅嘢，而傾偈就係幫助溝通，好似佢讀教會學校瑪利曼，有日返嚟同我講，『爸爸你知唔知我最好朋友係邊個？』我話梗係爸爸啦，『係主耶穌呀！』亂噏呀真係！我話梗係爸爸先係你最好朋友啦，你有咩事梗係求爸爸，唔通求主耶穌呀？你肚餓主耶穌俾飯你食？你食完飯唔埋單，主耶穌會俾你行出餐廳？呢啲嘢要慢慢同佢溝通。」

學爸爸大方好客

從這個爸爸身上，女兒最學會心地要善良，對人要大方，小學生已懂得請同學食飯，「有次我問佢啲零用錢用得幾快喎，佢話喺餐廳見到同學食嘢，幫佢哋埋單囉，因為佢成日見到我周圍埋單，有時佢見到有朋友喺餐廳，佢就話『爸爸，嗰度埋單吖！』所以佢有好多朋友，人緣好。」人際關係不能培養，只能培養其性情，「交朋友係靠性情，如果可以影響到佢建立某種性情，佢就會交嗰種性情嘅朋友，物以類聚㗎嘛。」 在學業上，李純恩從沒有逼迫女兒讀書，反令女兒對自己有要求，自發學習，「我冇迫過佢，逃學、放假都由佢㗎喇，佢唔係咁勤力嘅人，但佢愉快，我都輕鬆。我幫佢揀小學嗰時，人哋問我揀邊間，我話唯一條件要功課少。」女兒入讀了傳統名校瑪利曼小學，功課相對輕鬆，初小課程只測驗不考試，「我唔係貪佢名校呀，我貪佢功課少咋。」李純恩笑說。

女兒愛面子 自發向學

以前入學相對簡單，起碼到小學才要面試，而且競爭少，報兩三間都夠，不似現在連N班、K1都要爭崩頭。「4歲就要幫佢做CV，離晒譜嘅，要寫有冇參加鋼琴、游水，有冇得獎、影相，要以圖為證，唔係寫咗就算。」 近年教育風氣可謂瘋狂，或多或少由政府造成今日局面，「你睇吓依家教育制度，睇吓個教育局長，簡直愈來愈廢，咁可以點呢？依家基本上係黐線，咁細個做CV一係學校黐線，一係家長黐線，學校就話冇呢啲要求，但你冇呢啲要求，家長點會咁緊張呢？唔做驚死蝕底，執輸行頭。」 女兒在瑪利曼讀到中三， 自己報考轉讀德瑞國際學校， 李純恩 覺得女兒有志氣，「所有學業我冇理過，小學升中都係瑪利曼，我都冇擔心過。佢平時讀書唔係幾勤力，但係佢要面，所以佢唔會俾自己成績好差，我知道佢有呢個性情，我就放心喇。所以自細我要同佢多溝通，了解佢性情，知道學業可以由佢自己搞。人要面呢，可以成全好多嘢，雖然都會失去好多，例如做唔到特首啦。」

培養好性情 養出貴氣

用身教培養孩子的良好性情，對他們將來有莫大裨益，能自發學習、廣結友緣、自主生活，行出一條康莊大道，根本毋須催谷學業，訓練十八般武藝。「我哋其實冇咩可以俾到小朋友，溫飽當然冇問題，但如果要比較的話，大把有錢人、條件好嘅人啦，你冇得攀比。唯一可以安慰嘅係，你可以用一個你覺得係好嘅性情去影響佢，令佢都有同樣性情。」 想與小朋友以朋友式相處，都要夾才做到朋友，要夾就需有同樣的性情與默契。家長想影響小朋友，必須做到兩個條件：「第一係價值觀，第二係品味。如果價值觀相同，大家相處就會舒服，你大方，佢又大方，咁咪舒服囉；如果你小家，仔女大方，你就成日覺得蝕底，所以睇你用咩價值觀去影響小朋友。品味都好重要，大家可以一齊欣賞一樣嘢就最好，未必係深奧嘅藝術，而係生活中所有好嘢，佢揀男朋友我都會順眼吖嘛。」 培養女兒有品味，正是李純恩深信的至理名言「女要貴養，仔要賤養」，其中一個元素，「貴養嘅意思唔係要俾好多錢，而係養出一種貴氣，包括有taste、對人生有正確睇法。」即使父母疏忽了，女孩仍可自我培養，物質氣質，雙管齊下，達者有福。

撰文：Ling
攝影：Killy Sung（部分相片由受訪者提供）