不一樣的爸媽｜黃澤鋒4歲老積女兒睇唔過眼同學笑媽媽老 霸氣護母獲激讚
不一樣的爸媽｜黃澤鋒陳麗麗懶理網民意見
黃澤鋒在節目中分享與太太陳麗麗是透過Facebook相識，後來亦因為有共同的興趣愛好變得親近，最後於2010年拉埋天窗。黃澤鋒與陳麗麗婚後十分心急「造人」，可惜當時年紀頗大的二人努力9年也失望收場。正當準備放棄之時，新生命竟驚喜降臨，不過當時亦飽受外界的議論。
對此，黃澤鋒直言不會在意：「人哋講咩我控制唔到，我只係控制到自己點諗嘢」、「當我太太有個小朋友嘅時候，太太嘅心理應該點控制，我乜都做唔到，我又唔可以陀仔，佢嘅辛苦我又唔知」唯有在心理上支持太太陳麗麗。
不一樣的爸媽｜陳麗麗湊女鬥智鬥力 強調1大育兒心得
雖然女兒黃熙恩今年只有4歲，但就非常「老積」聰明！黃澤鋒透露家母於兩年前去世，當他偷偷走入廚房喊時，當時年僅2歲的小黃妃主動上前安慰自己：「爹爹唔好喊啦，唔好傷心，嫲嫲走咗」，令黃澤鋒大感恩惠。
陳麗麗亦表示照顧小黃妃需要鬥智鬥力：「我要全職湊佢，因為心智上你要好聰明咁同佢傾偈。」作為媽媽的陳麗麗又強調，「千萬唔可以敷衍小朋友，否則將來辛苦的就會係自己。」
不一樣的爸媽｜黃熙恩霸氣護母活動獲網民大讚
節目的尾段安排了黃澤鋒夫婦去觀星，而黃熙恩則由主持李敏代為照顧。這時， 李敏問她爸爸媽媽誰比較惡時，黃熙恩就超「老積」戙高腳表示：「爹爹最惡嗰個，媽媽冇咁惡」。
還大爆自己「只聽爸爸話，唔聽媽媽話！」而李敏亦詢問黃熙恩「係唔係有同學笑媽媽老時」，黃熙恩則直接承認並稱：「媽媽就喺到唔開心，之後我就同佢講，次次都係咁㗎啦，我都唔知佢叫咩名㗎，下次一見到咪即刻鬧佢囉」，言談間可見小黃妃很愛錫媽媽。李敏繼續問「有無安慰媽媽嗎？」，小黃妃便馬上回答「有㗎」， 並以「其實媽媽都唔老呀，幾靚女！」這11字來為媽咪平反。
而黃熙恩的反應亦獲網民大讚：「妃妃好得意，好懂事，一句『媽媽都唔老，幾靚女』，我聽到都窩心」、「超可愛，老積得嚟又唔係乞人憎嗰種」、「妃妃好可愛，說話又有文有路，講嘢老積，動作麻甩，但又唔覺得佢冇禮貌，好攪笑！」
52歲黃澤鋒陪同齡老婆行街女不離手 老來得女想追多個B
黃澤鋒結婚十年，今年7月太太陳麗麗以52歲超高齡誕下囡囡熙恩（乳名小黃妃），太太身為新手兼高齡孕婦陀B甚艱難，懷孕初期飽受妊娠濕疹折磨， 期間又受到網民的毒舌咒罵，身心受苦！小黃妃健康出世，兩公婆感恩又開心，對住前世情人，黃澤鋒自然錫到燶，不過對太太的愛護亦無分薄。日前兩公婆帶住肥肥白白的小黃妃出巡，黃澤鋒全程奶爸上身陪太太shopping，讓太太安心睇衫又揀鞋，除咗咁，當然負責埋錢重任啦！
黃澤鋒前世情人小黃妃出巡 肉騰騰勁可愛
家住屯門的黃澤鋒，早前屯門傳出刺鼻不明氣體，太太懷疑受到空氣污染影響，令皮膚刺痛及出現紅疹，一直餵哺母乳同時令囡囡都中招皮膚出現「粒粒」，黃澤鋒勸喻太太多留家中以免令皮膚問題嚴重。日前，一家三口難得離家出外抖氣，原來安排太太shopping止痕，只見到達商場，太太 用電話查地址，黃澤鋒則在旁等候「指令」，然後隨太太去了商場內一間女士時裝店，在BB車上的小黃妃突然扭計喊，黃澤鋒為令太太可全心全意睇衫，立即抱起小黃妃又氹又搖止喊。太太入完一間又一間時裝店，黃澤鋒抱住小黃妃在旁，適當時候給太太意見。眼大精靈又肉騰騰的小黃妃，去到邊都引得Sales姐姐們或途人圍住望大叫「好打耳」，如同出巡一樣！
陳麗麗無懼高齡懷孕 不設防想追多個B
黃澤鋒陪完太太shopping，就輪到睇BB衫同玩具，行了半日終於坐低醫肚，兩公婆繼續視線未離開過囡囡，然後對望一笑，盡在不言中，在二人臉上只見到幸福二字！ 雖然生產到湊B過程歷盡艱辛，不過首次任爸媽，黃澤鋒和太太不設防想追多個，知情者話：「佢兩公婆好鍾意小朋友，生完囡囡更加好想生多個，雖然已經半百但有運動底子，體力好好，親自湊B都唔覺得攰，所以好想再追多個！」希望黃生黃太願望成真！
