「古董爸爸」 麥長青 仔女教法大不同

撰文: Ling
攝影: Clay Lam（部分相片由受訪者提供）

麥包教仔滿口道理，振瑋笑爸爸「古董化」，不夠新潮，「佢話家姐比較多，『哎呀你又唔明我講咩！就係你呢啲諗法，呢個社會先咁亂咋嘛！』」

錫個女多啲

俗語有云︰女兒是爸爸的前世情人。麥包坦言比較疼錫大女淳琳，希望她細心聽話，將來嫁到好人家，「仔女始終都唔同，有唔同錫法亦有唔同教法，我比較傳統，覺得男仔始終要孭起頭家，女仔就始終想佢斯文啲、聽話啲、細心啲。同埋女仔都係要錫多啲嘅，因為第時佢要嫁人啦，希望錫佢嗰個係佢老公嘛，我仲可以鍚得幾耐吖？所以我想喺仲能夠錫佢期間就錫佢多啲啦！」他強調此舉並非偏心，只希望培育細仔振瑋有學識、能堅強自立，將來做個真男人。

麥包雖然錫女，但淳琳始終是大家姐，比細佬大三年，麥包對淳琳比較多說教式訓話，「以前阿仔細個未明，所以我話個女多啲，阿仔就成日喺隔籬睇，佢見到家姐做完俾我話，咪醒啲唔跟住做囉。」

跟爸爸開工 讀書開竅

父母縱容多有反效果，麥包坦言過去對大女太寬鬆、太放縱，學業成績一般，幸好她長大後自己識諗開竅，才令他鬆一口氣。「我一直都冇迫佢讀書，結果佢細個好心散，太放鬆，一捉番緊佢就搞到大家都辛苦，好彩近年佢開咗竅，明白真係要俾心機讀書，呢個係我好彩。」

女兒突然開竅，或許跟過爸爸開工做助手兩個月有關，「開頭佢係貪得意想見識吓，佢跟咗我兩年，尤其第二年嗰兩個月，佢見到我做嘢辛苦，見到我嘅工作態度，的確影響咗佢，令佢待人處事都成熟咗，連讀書成績都好咗！」

淳琳過去成績一直處於中下游，現在成績突飛猛進，考到前列位置，麥包有感女兒終於有盡力。「佢知道自己原來係得嘅，老師都好錫佢，以前我成日um佢『你俾心機讀書就唔會差嘅。』依家印證到，佢開心我又開心！以前我要成日叫佢溫書、做功課，依家調番轉叫佢唔好溫，去瞓啦！」

學習不要輕言放棄

管教仔女讀書不能過度寬鬆，亦不能太緊，尤其幼稚園時期應該輕鬆發展，直到小三四開始慢慢收緊。「依家啲細路幼稚園已經學好多嘢，我係唔贊成，除非佢哋自己想學，佢哋細個想學咩我就俾佢哋學。」

細個要發掘興趣，盡量讓他們多嘗試，而隨着年紀長大開始選定重點學習，再考慮長遠發展，麥包就希望他們不要輕言放棄一個興趣、一項技能。「有時佢哋學學吓話唔想學，我會反問番佢哋覺唔覺得可惜？好似佢哋學琴已經一段時間，我想佢哋考琴，可能對將來有用喎，得就得唔得就算，冇壓力嘅，我只係想佢哋俾心機做一件事，咁大個仔咁大個女，應該要向父母有個交代，得唔得都俾個交代我吖，睇吓你哋自己學到咩成績。我冇資格評價你，由老師或張cert去評價你。」大女已經停止學琴，細仔仍繼續，「阿仔音樂天份較高，個女就畫畫好啲。」麥包說。

小朋友要有童年

大部分家長都希望仔女有個快樂童年，但又不能忽略學業，太寬鬆又怕成績低落，派不到好學校，心情都幾矛盾。麥包覺得兩者一定要做到平衡，在女兒身上自己也做得未夠好，但很安慰女兒有個快樂的童年。「如果小朋友諗番童年時，原來係冇童年，記憶中只有不停學嘢，咁佢會好唔開心。」

麥包認同讀書也是求分數，出來社會工作，一張亮麗成績表的確有助搵工，但長遠要發展事業有所成就，有齊成績、IQ和EQ三個條件，就能快人一步理想達到。「我唔想迫得佢哋太犀利，或者俾太大壓力佢哋，但當出嚟做嘢時，評定一個人嘅準則就係成績表。你話成績表重要又得，唔重要又得，因為你所讀嘅科目未必同你將來工作有關，但成績表可以界定你做咩職級，入邊個門檻嘅通行證。除咗成績之外，如果你IQ同EQ都比人哋叻嘅，咁你就可以快啲到達目的地啦！所以成績、IQ同EQ都同樣重要！」

幼兒狗仔式教法

麥包自言是一名嚴父，有一個條件必須仔女嚴守，就是尊卑和禮貌，即使大家理念不同，都要尊重別人，握手言和，不能動不動就郁手郁腳。「一定唔可以有暴力，你都識話爸爸打你唔啱，咁你點解要打人？爸爸細個打你，對唔住，因為我要當你狗仔咁教，有啲嘢危險我叫你唔好試，例如唔好插手指入電掣，我要打你隻手，你曳曳！因為要你知道當你掂呢樣嘢會俾爸爸打，細個同你解釋都唔知我講乜，到你哋大大吓就會明，我唔需要解釋o架喇！」

除了「狗仔式教法」之外，麥包更重視身教，積極帶他們行善，例如一家人賣旗、探老人院等，希望仔女珍惜當下。「要佢哋心領神會先會入心、入血，再發自內心去做事。所以我會帶佢哋去多啲活動睇吓個世界，好多嘢你有人哋冇，但人哋有啲嘢亦不比你差，例如你有良好環境去讀書，點解人哋環境差但讀書好過你？因為係睇人嘅本質，如果人哋有更好環境，你諗吓佢會幾犀利？呢個世界好多人嘅條件都比較差，你有能力幫得就幫，因為將來唔知邊日你需要人哋幫番。如果呢個世界個個都識咁諗，就唔會有戰爭。」

積極行善培養惜福之心

十多歲的仔女早有惜福之心，振瑋都不敢向父母要求太多，連父母主動購買也耍手擰頭，振瑋說︰「我覺得自己好幸福，因為我得到嘅嘢已經比人多，有時父母問我買唔買嘢，我都覺得好尷尬，唔可以好快答佢哋yes or no，佢哋反而覺得我有問題。」麥包聞言覺得安慰︰「我冇講過爸爸搵錢辛苦呢啲嘢，我亦冇同人比較，細個我只會講當我有能力時，我會將最好嘅嘢俾你，但我唔知自己幾時冇能力。」

麥包對仔女也充滿期望，首要一家人身體健康，才有能力談其他。「我細佬都因為身體問題而離開，身體健康係最重要，我希望仔女會做個正直嘅人，幫唔到人都唔好害人。其實作為一個正常人，我對佢哋已經滿意，但作為爸爸，對佢哋嘅要求會高過人哋，我覺得佢哋仲有不足之處，好似懶惰啦，希望佢哋學多啲嘢，做人有尊卑道德、有禮貌，我會繼續鞭策佢哋。」