屯門 T · PARK 源 · 區 全攻略｜預約方法

圖片來源：呀劍萬帥 ｜編輯：Anson、TLY

T · PARK [源 · 區]簡介

T · PARK [源 · 區] 標誌著政府為了社會利益而致力實踐香港「轉廢為能」策略的決心。這座污泥處理設施更展現一個願景，因為隨著香港人口不斷上升，為積極鼓勵並提升市民對廢物管理、資源回收和循環再用建立正面態度。T · PARK [源 · 區] 不僅是一座污泥處理廠，合共 4 個焚化爐每天可以處理高達 2,000 公噸污泥，更會透過其休閒和教育設施，它更是一個學習和體驗香港綠色文化的地方，參加導賞團就可以了。

剛落成在屯門稔灣的T · PARK [源 · 區] ，呀劍已到訪過兩次，大家可以參考一下我的全攻略，可以喺度玩得更盡興！

T · PARK位於屯門龍鼓灘再入啲稔灣路的污泥處理廠(其實同下白泥一河之隔)，如果不是穿梭巴士真係只有自駕或的士UBER入到嚟！

以團體報名的上限人數2-3人，可於一個月至半年之前開始預約，不過唔可以預約[源 · 區]免費穿梭巴士，需要自己Book車出入!

雖然要自支車費，但係如果你想以個人報名，真係唔知可以幾時先預約到，真係星期日至六日日都Full哂，想去就要快了!

T · PARK[源 · 區]將於3月1日重新開放及提供有限度導賞團服務。團體參觀、T · SPA[源 · 泉]及T · GARDEN[源 · 林]的戶外足浴池將暫停服務直至另行通知。

水療池（暫停服務）

• 10:15am-11:30am
• 12:30pm-14:00pm
• 14:30pm-16:00pm
• 16:30pm-18:30pm

T · PARK [源 · 區] 導賞 Guide Tour

• 10:30am-12:00pm
• 12:00pm-13:30pm
• 14:15pm-15:45pm
• 15:45pm-17:15pm
• 17:15pm-18:45pm

乘搭T · PARK穿梭巴士由Vcity開出到達大約30分鐘，我建議給大家嘅行程就係預約12:00-13:30的導賞(廣東話導賞一般會有3段時間，另外英語及普通話均為其一，每天語言按排時段有機會不同，一切以官方網頁為準)，及

• 14:30-16:00的[源 · 泉]浸Spa
• 11:00-12:00 參觀[源 · 林]及到足浴池浸腳，再散步到[源 · 湖]觀賞雀鳥
• 12:00-13:30 到[源 · 廳]集合開始導賞，途中會經過[源 · 點]／[源 · 廊]／[源 · 館]／[源 · 景]
• 13:30-14:30 大家可到[源 · 茶]享用午膳，飯後可到[源 · 臺]欣賞風景
• 14:30-16:00 可以到[源 · 泉]浸Spa！(其實浸唔到咁耐) 所以大家可自己調校時間

這個按排可以輕輕鬆鬆參觀哂[源 · 區]內所有設施！仲趕得切番出去食個晚飯！

T · PARK「源」 · 區 充滿教育及休閒特色，主要分為「源 · 林」、「源 · 臺」、「源 · 景」、「源 · 廊」、「源 · 湖」、「源 · 泉」、「源 · 廳」、「源 · 點」、「源 · 館」及 「源 · 茶」。

這裡就是[源 · 林]，由噴泉花園、悠閒花園、禪園、濕地花園和暖水足浴池組成，整個[源 · 區]綠化面積達70%，有9800平方米。

噴水池噴得好高好高，可以話係第一個影相景點，兩個都話要同噴水池影張相，好似喺個頭度噴出嚟咁。

整個T · PARK 「源 · 區」的設計都很獨特，與周邊自然環境融為一體，好識善用天然光，仲有綠化屋頂隔熱。

我哋穿過噴水池，先到足浴區（暫停服務）浸一浸腳，水溫都幾熱㗎！不過就欠缺遮蔭設施，烈日當空坐低PatPat都幾熱㗎！

不過我哋都搵到個陰涼位坐低舒舒服服咁浸。

佢哋兩個就梗係當嬉水池咁玩多過當溫泉浸腳啦！

浸咗一陣間，我哋就再向「源 · 湖」出發，一路向前直行，聽講可以欣賞好多雀鳥！

沿路仲有好多靚花睇！當然忍唔住又要停低影靚相啦！

繼續行大約5分鐘就見到盡頭！

呢度就係「源 · 湖」(其實有少少跌咗眼鏡！乜原來咁細) 同埋真係要自備望遠鏡先得，不過今日行過嚟都只係見到一兩種雀鳥。

常見鳥類有只有板上的幾種！

沿路行番出去，入番大樓參觀其他地方！Reception都充滿環保特色！均以木或綠色。

T · PARK的「T」原來代表Transformation，「轉廢為能」都係這裡的宗旨

職員哥哥同佢哋兩個介紹T · PARK的模型。

（圖片來源：呀腳萬帥）我哋先進入[源 · 廳]觀賞影片介紹然後開始導賞，[源 · 廳]就好似一個私人迷你影院！

（圖片來源：呀劍萬帥）然後開始導賞環節，我哋一家大細經過[源 · 點] (這裡設有互動遊戲及休憩梳化)沿扶手樓梯上到[源 · 館]。

（圖片來源：呀劍萬帥）睇吓玩咩先，原來就係篤番[源 · 湖]可以見到嘅雀鳥資料！

佢哋搵到每一隻雀鳥都好興奮咁要話俾我知，叫我同啲雀仔(Mon裡面的)影相！

呢個世代嘅小朋友唔通真係要睇虛擬影像？冇得睇真真實實嘅雀仔？

（圖片來源：呀劍萬帥）嘩！上到嚟就已經俾呢個后海灣景吸晴去了！

碰巧今日天氣十分好！真係想行出去逛逛。而導賞開始，亦是考驗職員哥哥控制小朋友秩序嘅能力喇！(唔該幫我兩個小朋友轉廢為能…講笑～)

「轉廢為能」過程 1.污泥接收→2.焚化→3.發電→4.煙道廢氣淨化處理→5.灰壗和殘餘物處理

（圖片來源：呀劍萬帥）

每一區介紹都有屏幕供點選睇影片介紹

（圖片來源：呀劍萬帥）

嚟到第3個過程「焚化」，房間內設計模擬了焚化爐火紅紅的特色

一班小朋友坐低欣賞這個寬闊屏幕的影片介紹

（圖片來源：呀劍萬帥）

經過渦輪機將焚化爐產生的蒸氣轉為電能

（圖片來源：呀劍萬帥）
旁邊擺放了幾部大電視，畫面上的大海原來就是現場拍攝着的

（圖片來源：呀劍萬帥）
焚化爐採用了「流化床」技術，化爐內的燃燒氣體至少會有兩秒高達攝氏 850 度以上，把廢物體積大減九成(真的嚇呆了)
真係大大減勁了堆田區的壓力！

小朋友好有秩序的跟着地上的黃色標記路線參觀。

（圖片來源：呀劍萬帥）
離開[源 · 館]後去到另一邊[源 · 廊]透過大玻璃參觀焚化爐及介紹過的廠房運作及設施營運

（圖片來源：呀劍萬帥）

行行吓見到幾個回收箱靚靚又影番張相先！

職員哥哥一邊介紹一邊發問問題，冇答過問題嘅芊芊唔知點解都有糖食！

相信呢個會係景點之一嘅污泥夾，堅1:1

小朋友睇落好留心聽緊哥哥講解，其實佢哋只當係遊樂設施，頭先一開始就想爬上去！哈～

（圖片來源：呀劍萬帥）穿過中央控制室(模擬版) 就見到巨大焚化爐啦！

真係大到我影唔哂！

導賞完結後，大會安排了一個茶點時間俾大家可以休息一下充充電「轉食為能」。

呢度放咗好多Recycled Products，全部都好有意思！

呢幾張車軚造成嘅櫈上次都見過。

（圖片來源：呀劍萬帥）身後呢個似係屏風嘅設施其實係木地板所造成的，真係好利害！本來可能係別人搬屋將要拆掉去堆填區的東西，搖身一變可以造成咁型嘅裝置！

呢張由好多漫畫紙張合成嘅大枱好有型！

（圖片來源：呀劍萬帥）仲有牛仔褲布車出嚟就梳化套！

我哋喺呢度逗留咗好耐，唔駛匆匆忙忙跑景點，今次真正舒舒服服咁去欣賞風景。

我最欣賞係呢張用工業用的油罐造成嘅櫈，真係好想屋企都放番幾張！

（圖片來源：呀劍萬帥）大家又估吓前面呢幾張木櫈係點嚟嘅？

貼士係灣仔碼頭….唔係水餃呀，原來堅係灣仔碼頭前身嘅防撞木，將佢哋翻一翻新又可以俾個新嘅生命佢。

（圖片來源：呀劍萬帥）

然後我哋就坐低俾佢哋兩個畫吓畫！就連支筆都得意過人，起初以為係好多條草放喺度裝飾用，原來係個筆套！

在 [源 · 景] 望出這個后海灣加上T · PARK [源 · 區]的屋頂更加壯觀！

今次嚟餐廳終於開咗啦，叫做[源 · 茶]，坐位唔算多，不過足夠預約咗嘅遊客享用。

同樣所有座位嘅傢私都滿有環保概念。

餐廳提供的食物款式唔多，有意粉／螺絲粉／Pizza等等，全部都係預先包裝好放入微波爐叮熱俾你食，仲有沙律，三文治及其他飲品等。

全部都唔算貴，都係$20-$40不等。

我哋專登坐開咗，去咗個好有特色嘅地方食嘢！

就係呢個由幾條木砌成嘅座位！

味道唔算特別好食，但係我覺得都還可以！如果大家覺得唔夠，都可以自備食物入[源 · 區]。

最特別一樣嘢就係呢度啦！有個自助洗碗區，推行環保教育，所有食客都要自己親手洗自己碗！(唔怪之得嘢食咁平啦…哈哈) 但係我好欣賞呀，尤其係依家啲小朋友一定要學識！

哥哥妹妹喺屋企都有練開功，所以洗碗對佢哋嚟講冇難度。

食完嘢又未夠鐘去[源 · 泉]浸Spa，一於走上去[源 · 臺]欣賞一下風景。

由[源 · 茶]對出的大露台轉左或右到盡頭，就會見到樓梯直上就是了。

一望無際就係呢D啦！對住成個後海灣真係見唔到盡頭！風景靚都不得了，秋天嚟到仲好涼爽大風，真係好想就咁喺度瞓個晏覺！

（圖片來源：呀劍萬帥）影相景點又出現啦！就係同身後嘅焚化爐影番張相先！

由[源 · 臺]望番落去[源 · 林]都幾靚。

最後終於嚟到主菜啦！就係T · SPA[源 · 泉]，男女共浴！嘩正～

泉區分為3個水療池，全部由焚化過程中產生的熱力加熱或冷卻水溫。

左邊為0.9米深16度的冷水池

中間為1.2米深36度大池

最右邊同樣為0.9米深26度的暖水池

同咗哥哥講呢個係SPA，係浸並唔係游！但係佢都已經當咗泳池咁游，失禮死人！

兩個玩到好興奮(番到屋企仲要落會所泳池Encore…) 呢個父親節真係「苦親節」講笑啫～

點辛苦都OK只要你兩兄妹生性就得喇！

再提多大家一次，現時只接受預約申請，個人預約需於一個月入紙申請，團體則半年內可預約！

最後穿過[源 · 林]就出番去門口上車離開了～

（照片攝於疫情前）

呀劍評分：10分

呀劍評語：一個又好玩又多嘢學嘅地方，必定係假日親子好去處！最緊要係免費入場！

地址：屯門曾咀稔灣路25號　(地圖)

開放時間：星期一、星期三至日 上午 10 時至下午 7 時

交通：乘專用穿梭巴士，每程車程約需30分鐘，敬請預約。

聯絡電話：2910 9700

網址：www.tpark.hk

電郵：[email protected]

費用：全免

備註：T · PARK[源 · 區]於3月1日重新開放及提供有限度導賞團服務。團體參觀、T · SPA[源 · 泉]及T · GARDEN[源 · 林]的戶外足浴池將暫停服務，直至另行通知。無論是個人還是團體，參加導賞團，水療，或自行參觀，均需要預約。

(以上資料更新至文章當日)

Facebook專頁:呀劍萬帥 kimfamilytravel
Blog網誌 :kimfamilytravel.blogspot.hk