絕種好爸爸 黃日華 望女兒嫁得好

原文、圖片：東方新地

27歲的黃芷晴，15年底同拍拖三年男友Bryan分手，不足半年再投入愛河，同曾從事酒店業的Jimmy Fung拍拖，原來二人早於芷晴讀大學時已經認識，直至年多前偶然撞番，兩人極速譜出戀曲，拍拖半年更已經有結婚計劃，黃芷晴替雜誌拍婚紗照時，更恨嫁恨到出口表示，原本想搵男友一齊拍，但又怕太主動所以打消念頭！

籌備婚禮

據知，近日男方一班親友，已經收到Jimmy同黃芷晴結婚消息，二人已著手籌備婚禮，黃芷晴亦開始搵人設計婚紗，為免阿爸反對，實行先斬後奏！有指兩人拍拖無耐，芷晴已經好想結婚，佢仲諗埋結婚之後會生一個小朋友，又打算租屋同老公搬出去住。佢係愛妻號華哥咁緊張個女，梗係想佢搵個好似自己咁好嘅老公啦！

嫌未達標

出名係絕種好男人的黃日華，當然想個女搵個一樣有膊頭有承擔嘅男人照顧她下半生，不過同黃芷晴年紀相若的Jimmy，本身成個大細路，有時更倒轉頭要弱質纖纖的女友照顧，之前芷晴就透露男友連「小強」都怕，要佢保護番轉頭！芷晴密友透露：「咪睇芷晴外表柔弱，對住男友好有主見，仲會保護對方，佢好鍾意浪漫，但男友唔夠細心，芷晴仲會自己諗啲驚喜嘢氹番男友轉頭！

今年二月底一家人去泰國旅行，芷晴都預埋男友，等佢可以同阿爸溝通多啲！早前黃日華接受訪問時，提到女兒想嫁要先過佢嗰關，佢就話：「個女大個自己決定，不過佢哋拍咗好短時間啫，我未睇到個男仔嘅優缺點。」即係未過到華哥嗰關。

為助男友爭取機會，黃芷晴拍乜都搭單引薦男友，上年12月，二人一齊拍手錶廣告，亦是芷晴向廣告商提議情侶檔演出，才令Jimmy成功 踏出第一步，近日又經常帶男友出席公開活動。

就晒男友

一向乖乖女的黃芷晴，每次拍拖都非常投入，上次同Bryan拍拖無耐，已經想結婚，但因為阿媽患病，當時芷晴以媽咪健康行先，加上Bryan唔想早婚，最終二人亦分手收場。今次對住同樣有早婚念頭的Jimmy，兩個就相當啱Key。

大學修讀設計系的黃芷晴，試過出自家品牌「Oh My Deer」，不時自己做手工設計氹爹哋媽咪，但自從同Jimmy拍拖後，就乜都男友第一！之前Jimmy姪女生日，芷晴更為對方設計生日蛋糕兼幫手整嘢食慶祝。就連今年食團年飯，他亦先就男友時間，阿爸都只係副選。「芷晴好單純，華哥都好擔心個女易畀人呃，但女大女世界，佢驚逼得太緊，芷晴仲反叛，所以佢都係同老婆輪住勸個女，想個女考慮清楚先嫁！所以佢哋仲未表態答應呢頭婚事！」