鄺文珣47歲如20歲少女靠3招凍齡 認有5年婚姻裂痕靠大仔成功修補
撰文：Ling｜攝影：Killy Sung（部分相片由受訪者提供）｜化妝及髮型：MoMo Chow@Ms. Workshop嫁妝｜服裝：TuXEE（Andrew）、Les Neredes （May’s accessories）｜場地：The Mira Hong Kong（Tel： 2368 1111）
鄺文珣為家庭淡出娛圈 三孩媽分享凍齡招數
鄺文珣生於小康之家，自小生活無憂無慮，是一個開心小公主，之後加入TVB成為小花，參演過多部經典劇集，例如《鹿鼎記》郡主沐劍屏和《真情》飾演的Joan（安仔的女朋友）、《洗冤錄》、《刑事偵緝檔案IV》等，雖未至於紅透半邊天，但形象入屋得到觀眾愛戴。
延伸閱讀：細數昔日《真情》花旦淡出娛圈後生活 位位嫁到好老公！
她曾與劉愷威、曹永廉及鄭敬基拍拖，其後嫁給富商老公應德榮Andrew，婚後她決定相夫教子淡出娛樂圈。他們育有13歲大仔Cadence、11歲二仔Casper及4歲細女Chesney。現時47歲的她仍散發著一股少女氣息，她的保養之道是保持心情愉快，因為情緒會影響皮膚質素，另著重保濕，尤其經常在冷氣房內皮膚好易乾燥，要多敷保濕mask。
承認有超過五年婚姻問題
鄺文珣老公Andrew經營家族製衣業生意，但從小缺乏愛，且工作上得不到爸爸認同，屢受挫折。她坦言兩人的成長背景與性格南轅北轍，生活在一起難免摩擦多：「每對夫妻有問題唔出奇，因為兩個人來自好唔同嘅背景成長，大家性格又唔同，兩個人住埋一齊後，當有事發生就會用上自己慣常方法處理，我哋都一樣，相處時大家都係互相摩擦，好痛苦咁磨。」
有報道指Andrew患有狂躁症，他澄清沒有患病，因為過去在事業和家庭上的不快，令其性格比較火爆，不懂得控制脾氣：「男士對自己目標好清晰，好想達到目標去滿足自己，當受到挫折或達唔到期望就會有情緒，係我控制得唔好，但我唔係有病，唔係日日喺度發癲想打人，只係好易因為小小事激動咗。」
她飽受老公的情緒煎熬超過五年，曾一度想以離婚解決，但孩子還小，離婚對孩子的影響深遠，還是努力修補關係比較好，不過她的思想簡單，不懂得如何幫助老公：「我哋性格好唔同，我諗嘢好簡單㗎咋，我比較開心正面，佢就好多顧慮、擔憂，諗嘢複雜過我好多，佢成日都話我諗嘢太簡單，我就話番佢太複雜。」Andrew笑說：「咁又拗一餐喇！」
大仔充當和事佬
無論有多憤怒，他們堅持不在孩子面前爆發，但小朋友都有感應，甚至不小心被他們聽到，鄺文珣說：「我哋已經盡量入房先嘈，但就算關埋房門佢哋都知我哋做乜講乜，我哋鬧交會大聲咗㗎嘛。」兩名兒子皆就讀有基督教背景的國際學校，希望兒子愛神愛人，培養正確的價值觀，她指當年九歲的大仔開始明白事理，見到父母爭執，會充當和事佬的角色：「大仔會叫我一齊祈禱，再叫我哋分開冷靜一陣，之後一 齊傾番件事。呢啲係我教過佢，所以佢教番我轉頭。」他們發覺這個方法有效，退一步更能看清問題所在，尤其丈夫性格比較剛烈，更需要時間靜下來，鄺文珣說：「我自己都調整得到，但男人需要多啲空間。」
因為宗教信仰的幫助，兩人慢慢得到啟發，學懂如何寬恕，明白家庭中夫婦是核心，必須把雙方放在第一位，當雙方感情穩固才能給予小朋友快樂。當Andrew見到太太憤怒到一個點，亦意識到要收火行開；而性格樂觀的鄺文珣，冷靜後會從好的方向自我安慰，並慢慢擴大自己的包容度：「每個人嘅容忍度有限，但喺婚姻之中你同對方有承諾，大家都應該寬容啲，當大家能夠包容對方，愛情就會昇華。我學識到要先重情後重理，同埋放低自己，我見到佢嬲我會講：『如果因為我嘅緣故令你唔開心，我同你講對唔住。』如果大家只係爭辯理由，覺得自己啱晒，咁問題永遠解決唔到。」他們深信家庭的核心價值是夫妻，夫妻關係好，才能帶給小朋友幸福，所以他們教仔方針亦一致。
生第三胎女兒是計劃上的意外
去到16年，兩人終於重修舊好，Andrew希望追多個女兒，令家庭更圓滿。不過，鄺文珣起初對生多個表現不太積極，因為有兩個仔已經好滿足，自己又「騰雞」，生多個驚搞不定，決定交由上天安排。直至16年底她一次祈禱之後，即追女成功，Andrew形容為「計劃上的意外」：「生BB唔一定有㗎嘛，我哋係有計劃，但無刻意做啲咩。」
鄺文珣指第三次懷孕比之前都陀得辛苦，除了年紀問題之外，胎位亦較低，常感到腰骨痠軟，走路、坐下及穿褲子都有不適。她形容最辛苦是頭兩個月，完全沒有胃口：「以前最多聞到嘢食會唔舒服，但我仲會食嘢，但今次我係完全唔想食嘢，唔想郁唔想行，成個人好沮喪咁，影響埋情緒。」在懷孕一個月之時，他們一家赴日本旅行，她因為在旅程中休息不足，又行得多，一度出現小產跡象，幸經醫生檢查後有驚無險，自此她便多加休息養胎。
老公超過100分照顧
鄺文珣懷孕時得到老公貼身照顧，一知道她無胃口，即使廚藝不精仍樂意下廚吸引她，她甜笑道：「初期我特別鍾意食cream source嘅意粉，仲要係某一間餐廳嘅意粉，即使係元朗咁遠老公都肯陪我去食。」Andrew笑言自己好好彩，因為老婆懷孕後，情緒上沒有大變化：「只係夜瞓同食嘢奄尖咗少少」，只需學煮兩三味就滿足到她。又例如鄺文珣手腳出現水腫，Andrew每晚為她按摩，他笑稱按摩按到手指起枕，她見到老公的付出也十分感動，對老公給予超過100分。
著重培養兄弟情 絕不偏愛
至於兩個囝囝Cadence和Casper，已承諾會像大哥哥般幫手照顧妹妹。鄺文珣解釋一直以來教仔首重兄弟關係，兩個男仔難免爭執多及互相競爭，她努力從中調解，培養他們的手足之情。當年她挺著大肚湊兩個仔疲累不堪，全賴Andrew多陪伴兒子玩耍，兩個仔亦好識做陪伴她產險，一同見證BB在媽咪肚內的成長，十分期待細妹出世：「佢哋成日走嚟錫我個肚，同BB講快啲出嚟啦！」他們看著婦科醫生為媽媽掃肚皮時，感到很好奇，嚷著說想做醫生，鄺文珣笑說：「不過佢哋成日變，始終仲細個，下次佢哋會有新update㗎喇！」
鄺文珣和Andrew時常警惕自己不能偏心，以免影響孩子成長，尤其兄弟姊妹間的感情、自我價值觀及人生觀。所以當BB出世後，他們更加不能忽視兩名兒子，要時刻留意他們的情緒變化：「我哋一定會做好平衡，唔可以偏晒一邊，好似細佬唔啱我哋會照話，唔會叫哥哥讓吓細佬。」
兩個囝囝皆是活潑的小朋友，最愛踢波、踏單車和去冒險樂園玩，周末父母則放寬可以打機。三父子經常出去切磋，Andrew指大仔有運動細胞，手眼協調發展得好，四歲已經擅打羽毛球，亦喜歡打鼓，音樂感強似媽咪，閒時一齊彈琴jam歌！細仔運動方面亦不錯，但眼見哥哥瓣瓣掂，難免有種墮後感，Andrew與鄺文珣見狀會大力讚賞細仔，令他感到受寵若驚呢。
