唐寧：離婚後給孩子的愛沒有缺失
撰文：Ling
攝影：Woody（部分相片由受訪者提供）
化妝：Miranda Ng
髮型：Haffman Cheng
服裝：mizzue
場地：國際培幼會
唐寧：離婚後給孩子的愛沒有缺失
自誕下俊俊一刻開始，Leila便減少幕前演出，多投入慈善工作，以身教感染孩子成為有善心的人。六年多以來，Leila去過四次山區，另參與過多次慈善活動，俊俊受薰陶下為人感性，知足惜福。Leila最近一次到越南山區探訪童婚女孩，對當地女性的經歷表示十分感慨，但當俊俊看到媽咪走山路的照片，其反應更令Leila感到非常窩心。
一家人仍經常見面
快將36歲的Leila早已嘗盡人生高低起跌，8歲童星出身，在娛樂圈發展一帆風順，2010年下嫁「舞台劇才子」鄧偉傑，翌年誕下兒子俊俊，2015 年再誕一女嗡嗡。原來幸福的背後，Leila和鄧偉傑的婚姻早有裂痕，今年二人宣布離婚，Leila 成為單親媽媽。幸好Leila身邊朋友眾多，前夫亦十分盡責，大大減輕Leila的壓力。「一直以來我都係咁照顧小朋友，亦有好多人幫手，所以離婚後無特別吃力。」
細女嗡嗡年紀尚小，對父母分開未懂得反應，Leila主要留意六歲大仔俊俊的狀況，她發現囝囝沒有出現負面情緒，反而更願意打開心窗傾訴。「佢一向比較內向，依家佢多咗同我傾偈，願意將感受講出嚟。」雖然夫妻情不再，但一家人的情永在，Leila 覺得最重要讓小朋友覺得父母的愛仍然完整，她相信自己一定做得到。「我兩個小朋友都好幸福，身邊有好多人愛錫，當然佢哋有問點解屋企唔同咗，我都有講番，佢哋亦好快過度咗。其實佢哋咁細個唔會完全明白咩事，我夾硬解釋佢哋都唔會明，可能有一日佢哋想知多啲，我就會盡量去講，一直陪伴佢哋度過。」
細女出世更在乎大仔感受由於俊俊的性格內向、感性及敏感，嗡嗡則外向多言，Leila 輕易掌握嗡嗡的想法，相反俊俊需要更多關懷，透過不斷溝通去了解他的內心。由細女出生開始，Leila 便意識到需對俊俊投放更多心力，加上養寵物的經驗領會到一些技巧。「我以前養過好多寵物，每隻都由不同時間來，當有新成員加入，對舊成員更需要加倍愛護，令佢哋唔會覺得被忽略，或者新寵物係嚟爭佢嘢。寵物同小朋友一樣係生命，一樣有感覺， 所以我用同樣方法，妹妹出世後我特別在乎哥哥嘅感受，令哥哥嘅愛唔 單止冇缺失，仲愛多咗。」
小小好男友 多女仔「埋身」
父母對子女一視同仁，小朋友才會相親相愛。俊俊和嗡嗡的年紀雖相差四年，但感情相當好，俊俊亦十分遷就妹妹，Leila笑說有時覺得俊俊過分遷就，與縱壞只差一線。「我話你都唔想妹妹喺學校搶人哋啲嘢，搞到其他小朋友唔開心㗎？俊俊好驚人哋唔開心，老師都講過佢好在乎人哋嘅反應，當佢見到有人唔開心，會即刻走埋去望住人，所以我叫佢要幫手教好妹妹，佢都好明白，但佢份人太腍善，成日畀妹妹蝦。」
Leila笑稱俊俊對女孩子好溫柔，相信他將來都會很遷就女朋友，「所以我都有啲擔心，可能要教定佢點揀女朋友，哈哈！」俊俊現在已經有相當吸 引力，靚仔眼大大，性格又溫柔，去公園也吸引到不少女孩埋身，Leila 笑說：「一陣間就會見佢有女仔埋身，佢話個女仔想同佢玩。佢仲特別惹到鍾意照顧人或管人嘅女仔，因為佢好受管，有次見到一班男仔玩緊，佢就唔玩幫個女仔睇住啲嘢，佢話係個女仔叫嘅，佢唔識拒絕人㗎！」
拆解兒子晚晚發噩夢
俊俊將來應該是個非常體貼的男朋友，但作為女友一定要多花時間了解俊俊的內心及陪伴左右，因為俊俊很內向，需要安全感，Leila說：「佢好需要人鼓勵，唔係硬繃繃咁狂讚佢，係要陪佢經歷至成功。」Leila因為囝囝的性格令她變得細心，時常觀察他的情緒，並多向他發問了解其內心。大約在俊俊四歲之時，不知何故他經常發噩夢，Leila嘗試叫醒他亦不果。「佢不斷又喊又叫，我都唔知點幫佢，覺得好焦慮，我又叫唔醒佢，惟有坐喺度攔住唔畀佢撞到。」
為甚麼俊俊經常發噩夢？生活不開心、壓力大，還是心有恐懼？Leila曾努力找答案。「唔好以為小朋友冇壓力，你未必知道原因，或者佢見到架大型混凝土車煞車，已經夠嚇親佢。但每朝起身我問番係咪有事，佢都話冇，仲唔記得自己發過夢。」
多次追問也找不到答案，Leila決定放棄尋找，把心力轉移至多陪伴兒子傾訴，並每晚坐在床邊保護他，因為Leila相信兒子因表達能力不足，以致內心積聚了很多不安。「當時我花好多時間陪佢，佢一見到啲咩我就好留意，幫佢講埋感受出嚟，『你係咪覺得啲聲好嘈呀?』因為當時佢嘅表達能力發展比較慢。」大半年後，隨著 Leila的努力及俊俊的表達能力提升，情況漸漸改善，現不再發噩夢了。
唐寧慈善探訪作身教
未有小朋友之前，Leila 不擅於為自己安排一切，工作全靠經理人安排，自己按部就班去做，其餘時間則隨遇而安，享受每一天就夠。「就算呢份工都唔係我plan出嚟，亦唔係我揀，只係細個誤打誤撞入行，做做吓覺得幾鍾意咪繼續做。」但自為人母後責任變得重大，即使不喜歡計劃也要為孩子計劃，「唔講長遠，放暑假都要安排一下，唔通日日淨係睇書睇電視咩！」
Leila為孩子改變了許多，她相信身教是最好的教育，決定身體力行投入慈善工作，多到山區探訪，間接讓孩子多看世界。「你想小朋友成為咩人，你要先成為嗰個人，我希望小朋友可以多關心世界，幫助別人，所以我就的起心肝投入慈善探訪工作。」
越南山區 童婚嚴重
第四次跟國際培幼會作慈善探訪，今年一行人去到越南山區探訪童婚女孩，低至14歲便結婚生仔，以為餘生只為家庭，自己不能再有夢想。對此Leila十分感慨，當地人民缺乏教育，更以為結婚生仔是唯一出路。「有個女仔跟咗個男仔返屋企三日，個男仔就以為可以娶佢喇，佢哋只得15歲。」不久該女孩懷孕產子，兒子連續哭了三天，但沒有帶他看醫生，三日後兒子死於破傷風。Leila指他們過早為人父母，身心也未成熟，不懂得照顧孩子，令孩子失救而死。「我睇到牆上刻住兩個日期，係佢個仔嘅出生同死亡日期。」
別以為山區環境荒蕪，其實一樣有網絡，當地人也持智能手機，知道外面的世界不一樣，但他們缺乏教育，不懂得分辨資訊， Leila說：「佢哋知道城市嘅生活好唔同，佢哋都想過得好啲，有啲女仔都返過學，但因為傳統思想迫佢哋輟學，只係畀男仔返學。啲女仔覺得無能力改變就去結婚生仔，放棄所有夢想。」不過她們對孩子仍抱有希望，想他們多看世界，不要跟著父母童婚的步伐。培幼會在當地設立了「女孩天地」，教授女孩如何保護自己、如何避孕、宣傳女童 權益及童婚禍害，提高意識，並培訓一班義工老師，歡迎男孩一同參與。
下一頁︰唐寧分享：探索世界比讀名校重要
下一頁︰長大了！10個你一定看過的童星
下一頁：DJ 朱薰 推崇「羅家英」教學法
