男家係長洲原居民 陳嘉寶坐大紅花轎出嫁
撰文：SUNDAY KISS
陳嘉寶 長洲坐大紅花轎
上周六(25日)係Anjaylia(陳嘉寶)大喜日子，半億初戀男友黃頌祈今朝一早就去洲際酒店接新娘，之後聯同一眾兄弟姊妹及親友，就浩浩蕩蕩坐住遊艇殺入長洲，因為新郎哥黃頌祈為長洲原居民，男家幾代都喺長洲生活，所以都會依足長洲傳統返去祭祖。唔少長洲居民一早就到碼頭湊熱鬧，兩行夾道歡迎一對新人。
長洲行禮
陳嘉寶下午一時換上性感大露背婚紗與穿上禮服的黃頌祈在「中華基督教會長州堂」舉行婚禮，禮成後一對新人與兄弟姊妹在教堂內影大合照，之後新娘子按照傳統拋花球，結果由另一女神陳瀅接得花球。
罕有谷胸晒腿
Anjaylia晚上在香港洲際酒店擺喜酒，她換上一襲超低胸露腿婚紗，罕有地大晒事業線，十指緊扣現身，Sweet到爆！兩人受訪分享結婚喜悅，Anjay大讚老公一直以來都是好細心，問到他是否一百分老公？她笑說：「101分！」問到結婚心情，她笑言自己瞓到成隻豬咁：「班姊妹驚我瞓唔着，買晒嗰啲有助安眠嗰啲產品畀我，但點知我冇食到，但兩秒我就嗌唔醒。」雖然行程緊湊，但Anjaylia笑言爭取時間進食，她說：「食咗好多餐，早餐，上船又食粢飯，回程又係咁問人攞嘢食，乜都食，佢哋話我係史上最食得瞓得嘅新娘。」
索爆星級姊妹團
新娘當然靚到暈，而一班星級姊妹團一樣省鏡，包括陳凱琳、陳瀅、蔡穎恩、組合Super Girls成員吳嘉熙等，姊妹們都着上粉紅色同款姊妹長裙加頭戴花環，簡約又清新，個個都係女神！
鄭嘉穎 不怕被催婚
腹大便便的賴尉玲都有出席婚宴祝賀好友，問到何時生得，她說：「仲有十日八日，其實已經足月，都有諗如果陣間飲飲吓作動會點，應該幾刺激。（老公有冇嚟？）有呀，佢同新郎係friend，我都帶埋走佬袋嚟，擺喺車度，ready定，我希望BB係順產出嚟，其實我呢排出街都有諗如果行行吓街作動會點，應該好刺激。（唔驚？）唔驚，就係想睇吓有幾痛，人哋話斷肋骨係九級痛，生仔係十級痛。」至於鄭嘉穎同擔任姊妹的女友陳凱琳手拖手入場，問到嘉穎是否來取經？嘉穎說：「助慶，唔係取經，朋友結婚嚟恭喜吓，Grace今朝都四點鐘起身做姊妹。」問到驚唔驚被催婚？他笑說：「唔係講呢個嘅時候，今日係參加人哋婚禮。我好有經驗，媽媽好多年前已經問，我都係答『未知，知就話你知』。」
