城城安排岳母上海來港 方媛 有媽媽幫手湊城B
撰文：Sunday Kiss
圖片來源：新傳媒圖片庫、方媛Instagram
方媛懷孕期間 媽媽貼身照顧
方媛與母親感情要好，產前城城唔得閒陪，方母即飛來港照顧兼陪high tea，而為分擔方媛湊女之苦，城城安排岳母由上海飛香港，更在城堡租多個底層連平台單位，讓岳母可以幫手湊孫。上月城城主演的新片《破‧局》首映，方母亦傍實方媛到場撐城城。
岳母幫手湊孫
周日(3日)下午二時左右，方媛母親抱住Chant現身城堡一樓平台睇街，三個月大的B女戴上粉紅色帽仔，面圓圓輪廓分明﹐一雙圓碌碌的眼睛四圍望，身形肥嘟嘟非常可愛，未幾方媛亦步出平台，身穿睡衣素顏的她，面容仍有點腫，戴住副黑框眼鏡看似睡眼惺忪，托頭又咬手指，當看見得意的Chant，方媛亦忍唔住逗囡囡玩，三代同堂好幸福！
產後忙餵人奶
方媛產後大部分時間都留在家，主要任務就是餵人奶，早前她於網上交代近況﹐除了po公主床相，仲有一包包裝好的人奶，可見方媛奶水充足，養到囡囡肥肥白白。方媛專心做全職奶媽之外﹐亦努力學廣東話，為女兒將來教育及生活鋪路。
完月還要留家做奶媽，方媛靜極思動，自拍全身照話自己產後增磅，又話好想飛去內地睇戲撐老公，本來生活多姿多釆的她難免會覺悶。
盡快湊成「好」字
出名孝順的城城，有了女兒後深深體會到母親養育孩子的偉大與辛勞，他表示對於全世界的母親及女性會更加尊重。而郭母看到孫女更是愛不釋手，屋企多個B氣氛亦唔同晒，城城說:「我媽媽睇到個孫時，臉上喜悅嘅表情，係我最近十年都未見過嘅！」為令老人家持續開心，城城亦想盡快與方媛生多個，如果係仔就湊成個「好」字，係女亦唔拘，方媛今年得30歲仲有大把時間可以再生呢！
拜神求子
早於10月，剛坐滿月的方媛就陪住城城出席薩迦赤津法王的開光及灌頂儀式，有指是次拜會法王為剛出世的女兒祈福外，亦想順利追多個仔，為此城城表示：「我覺得無論仔定女都係上天賜，係開心事，順其自然啦！冇話刻意追求乜嘢，總之呢刻家庭好開心﹐好圓滿。」有個千依百順的老婆，又有個咁得意嘅餅印囡囡，城城當然稱心滿意﹐不過老婆同囡囡成日困在屋內，每日行出平台一陣係唔夠㗎，係時候帶囡囡見識吓呢個世界，Chant咁可愛，一定人見人愛啫！
