愛回家｜45歲林淑敏真素顏拍劇 網民激讚皮膚如豆腐 曾抗癌年半剖白血淚史
林淑敏真素顏拍《愛回家》 網民激讚皮膚堅靚
《愛回家之開心速遞》角色眾多，其中大小姐（林淑敏飾演）與送水輝（許家傑飾演）這條感情線備受觀眾喜愛。這劇中大小姐自小被父親大龍生（羅樂林飾演）寵壞，角色尖酸刻薄又乞人憎，但一遇到送水輝時就含羞答答，層次豐富。
其中一集「大小姐的新衣」中，大小姐因為面部皮膚被灼傷不可以化妝，被逼素顏，於是遮遮掩掩回到公司，沒想到熊若水（呂慧儀飾演）和David（湯盈盈飾演）等下屬竟講大話讚她的素顏很美，把她哄得非常開心。最終大小姐素顏的廣告牌貼滿紅隧，引起駕駛人士的不安，導致十車相撞，爸爸大龍生勒令立即下架，大小姐才醒覺。不過不少網民真心留言讚林淑敏為了配合劇集，竟然真的素顏上陣，敬業樂業，好有勇氣，而且皮膚的確好好：「單憑這一集，就已經足夠令“大小姐”值得再次被提名視后、甚至封后成功」、「我見過佢真人，無化妝做我地嘉賓，皮膚堅ok」、「以真面目視人，感覺是多了女性自然美，真的好好」、「大小姐真係keep得好！」、「大小姐素顏，好勇敢呀，加油!」。
港姐入行 靠《愛回家》入屋奪獎
林淑敏於2000年參加香港小姐奪「最奪目小姐」，當年冠軍是劉蘊慧，之後便加盟TVB至今，演過無數套劇，但一直只做路人甲乙丙，2011年終憑《真相》的巴辣闊太Emily，令觀眾留下較深刻印象。在《愛回家之開心速遞》的大小姐一角，令林淑敏成功入屋。
2017年，獲得大批網民力撐的「大小姐」林淑敏，竟然畀朱晨麗爆冷跑出而「撻Q」，搞到網民好嬲，仲揚言要杯葛大台。到2018年，「大小姐」終於眾望所歸坐正攞到「最佳女配角」 ，好拍檔「送水輝」、「KC」同「Terry」都第一時間向她道賀。林淑敏於台上致謝時說：「7年前嗰場大病之後，我諗仲做得乜，樂小姐一個電話，叫我唔使擔心。」最後感謝老公多年來無私支持。 事後她接受訪問時表示：「老公一直好支持我，好多時夜晚同我對劇本，成日扮送水輝。得獎覺得好意外同驚喜，覺得自己係唔配攞呢個獎，我只係代表《愛．回家之開心速遞》去攞。」
林淑敏確診後三日做剪皮手術
林淑敏2000年加入無綫，同年遇上丈夫陳中原，感情與事業同樣經歷長時間的浸淫，今日都見收成。不過她走過的路並不平坦，2010年患上第二期乳癌。問到她當初如何發現患乳癌？她說：「我自己摸到㗎！乳癌有好多係深藏喺裡面，去到有徵兆被發現可能已經處於好危險嘅階段，我都算係好好彩，我嘅腫瘤係生喺表皮下面，凸起咗，唔去理都唔得，去睇醫生，好快做咗個決定，做手術，因為係表皮下，唔需要做全乳切除，但就要剪皮，剪走感染嘅皮。」
被問到手術時有甚麼心情，她說：「我有喊㗎，我係人嚟，哈哈哈哈！嗰時我仲開緊工，要同當時套劇嘅監製講，因為無啦啦失場人哋都要知咩事，對住佢又喊咗一餐，對住男朋友又喊咗一餐。但好快就消化咗件事，因為確診後，醫生第二句就同我講：『你唔使死嘅，你只係需要接受一個好長嘅治療啫！』我知道自己唔使死，再唔開心落去，我都係要繼續生活。確診之後三日就做手術，快到都無時間諗。」
一度隱瞞雙親患 頭髮脫清光
初期林淑敏隱瞞雙親，堅強面對，接受手術、化療、電療及標靶藥，藉此減低癌病復發的風險，但受到副作用影響，頭髮在一夜之間脫清光，她憶述：「當時我屋企人唔知我生cancer，去到打第三針，我媽咪返嚟香港，我冇辦法瞞至講，我好驚佢唔開心，但原來諗埋佢嗰份係好戇居，我媽咪知道後話：『哦，你講咁耐，你想講你生cancer呀！你一定要醫喎，阿邊個就係堅持唔打化療，走得好辛苦，你一定要打呀！』」
歷時年半的抗癌日子，她當作放了一次長假，TVB亦安排她擔任《都市閒情》主持，工作時間和收入都較穩定，不用應付日以繼夜的拍劇模式。問她當時要做電療同化療？佢表示：「要！需要做化療，打標靶藥同電療。電療就一個月，化療就四針、三個月，標靶十八針，啱啱一年，成個療程差唔多年半。過程無想像中咁痛苦，我所經歷嘅副作用唔多，化療會嘔、會爛口，喺我身上都無發生過，甚至乎我有能力做運動，甚至標靶藥未打哂我已經返番工。」
曾主動講分手被拒 愛人不離不棄貼心照料
林淑敏曾主動想與當時仍是男友的陳中原分手，不過被對方拒絕，堅持要陪伴她，不離不棄：「病嗰段時間，我同佢講不如算啦，當時大家都後生、30幾歲正常會諗結婚生仔，當時我有病未必可以行落去。嗰時我覺得，甩咗佢我仲舒服，可以返加拿大養病。但係佢唔係咁諗，佢話：『唔係個個拍拖都係結婚、生仔、抱孫，我哋互相扶持，有幾耐命得幾耐命。』
她大讚對方很好：「佢唔識煮飯，但佢知道食得好對我好緊要，佢去學煮飯，我打化療期間，佢每晚都煮五餸一湯。怕污糟我會感染，一放工就洗衫、煮飯、掃地，我好似大爺咁攤喺度睇住佢做，佢就係一個咁好嘅人囉！」
年半抗癌成功 懂得活在當下
林淑敏完成18次標靶針注射療程後，她宣告抗癌成功，重新投入工作：「經歷過上次，依家我學識出事會話畀屋企人知，大家一齊行、一齊成長。」講到飲食方面的改變，她說：「我淨係有兩樣嘢唔得，唔食過甜嘅嘢，控制一日攝取大概六粒糖。六粒糖來自水果、飯、五穀，甜品、精製過嘅嘢我唔食，油炸嘅嘢我唔食，烤過嘅皮、動物油脂我唔食。另外莓類、抗氧化嘅嘢我會食多啲，但試過抗氧化嘅嘢食太多，血小板過低，咁我咪又食番少啲。依家我每日食兩個拳頭份量嘅連皮水果。」
講到這個病令她脫胎換骨，她笑言：「其實係祝福嚟，好多人會覺得，病一定好慘、一定係唔好，但我有呢個困難面對過，我又覺得一路行落嚟，其實所有嘢對我嚟講都係祝福、成長，我嘅性格改變咗好多，以前係好憂慮，好似好識計劃咁，會計劃到六十歲、七十歲，但係今日嘅我，我會比較傾向活喺當下，我會顧好今日、明日，將來嘅事，船到橋頭就自然直㗎嘞。我少咗好多憂慮，我覺得我諗咁多，一來未必會發生，再講我都未必會有六十歲、七十歲，唔知㗎嘛！個人豁咗出去，輕鬆好多、開心好多，演戲其實都係內心嘅反射，當我放輕鬆咗，其實對我自己嘅演技係有一啲幫助。」
求婚似開會 老公拒她冒險生B
林淑敏同老公陳中原(Tommy)拍拖13年，於2013年結婚。她笑言自己原本沒有想過要結婚：「做完晒療程，再抖咗幾個月，有一日佢同我講：『你其實有冇諗過結婚㗎？』我答：『老實講，無喎！』跟住佢話：『有無搞錯！咁幾時結？你講嘞！結唔結？你講！』咁都已經唔係求婚啦，哈哈哈，我話：『要結咪結囉，咁結囉！』就係咁嘞，大家好似開咗個會咁。」
她表示二人沒有打算生小朋友：「唔得嘞，我有雌激素過高，要食荷爾蒙藥，原本係五年一個療程，食完五年，醫生同我講：『你諗唔諗住繼續食第二個療程？如果你要生小朋友，你就要快嘞，依家就要停藥嘞，半年之後你可以準備生小朋友。』但依家醫學上整個荷爾蒙療程一睇係睇十年，我諗唔掂，我就返去同我老公講，問佢繼續食藥定生小朋友好，我老公就話：『唔好生，女人大肚雌激素好高㗎，好危險，我唔想要一個我唔識嘅𡃁仔，而令到你有危險。』好感動佢幫我做咗呢個決定。」
