馬德鐘孖老婆遊西藏 體悟生命的本相
撰文：TLY、SundayKiss | 資料來源：張筱蘭微博 | 圖片：新傳媒資料庫
西藏之旅體驗修行
Karen日前在微博分享和老公到西藏旅行，貼出到處觀光的相片。途中兩人都出現高山反應，好在Joe學過不少急救常識，最終兩人都安全無事。
Karen：體悟生命的本相
事後，Karen感嘆生命的無常：「西藏之旅，第一站拉薩，就是去體悟生命的本相。高山症的出現，給我們修行的第一課，即使準備工夫如何做足，無常也會隨時出現。我們必須積極面對各種不可預知的事情，珍惜無常帶來的啟示與教導。活着就是經歷、經歷就是體驗，體驗就是修行，讓我們進入清涼世界、自在人生。」
教仔有方全賴太太
兩公婆有時間出遊外國，全因他們從小對孩子的教育做的好，而兒子長大長人生生性性，不用過份擔心。馬德鐘坦言教仔有方全賴太太，自己負責陪玩，培養兒子的運動天份、發掘興趣，他引用父親教自己的方式於下一代，給予兒子自由度，自己則從旁觀察，適時給予意見。而馬太比較貼身管教，包括管理情緒、家教及制定生活時間表，令就讀國際學校的兒子不會太放鬆，在適當的管教下成長。
全心全意投入教好兒子
多年來只有獨子，從沒打算生多個，因為生育容易教育難，寧願全心全意投入教好兒子，Karen解釋︰「因為我哋冇時間，如果時間唔容許，你生幾個小朋友但又照顧唔到，我寧願用100分心機同時間俾一個，唔會miss咗佢任何經歷。但當你全副心機擺喺佢身上，唔好預計會有咩回報。」
訓練自律 管理時間表
要管理好自己，能自律之餘，更需分配好時間，訂立人生目標。從小學時期開始，Karen每日為兒子安排時間表，包括長、中、短期，分配好讀書、玩樂及休息時間，並慢慢輔導他達成目標。「人只有24小時，點樣maximize個時間效率好緊要。小學開始我教佢安排自己工作、睡眠、陪家人同自己時間，嗰陣佢成日問我幾時有自己時間呀？我會俾佢有自己空間，唔會管佢做啲咩。到上咗中學，佢開始面對更多功課，又有朋友社交，要俾番佢有自己世界。」
學界游泳奪金無數
做人要有靈魂，沒有靈魂同條鹹魚沒有分別；同樣地死讀書也沒有意義，人生要有目標，才能自發學習吸取知識，過程中亦培養到獨立思想，「最緊要令佢對自己人生負責任，人係應該好好管理自己、情緒、生活同精神健康。」
到青少年時期，發展專長至為重要，Xiang小時候玩過跆拳道、乒乓球、籃球、游泳，慢慢他發現自己最愛游泳，更躋身校隊出戰學界賽，屢奪金牌，前年更代表學校參加上海國際學校游泳錦標賽，勇奪七金而回，今年再代表學校到馬來西亞比賽，亦奪得六金一銀！Karen覺得金牌其次，最重要兒子享受比賽過程，慶幸他最享受接力賽，一班人齊心努力。「千祈唔好太重視成績，俾壓力自己同小朋友，攞到牌係錦上添花，試過佢游水游到樽頸位，冇乜進步，其實佢內心比我更焦慮，驚令我失望。只要佢做足工夫，盡咗努力，成績已經唔重要。」
自律精神間接幫助到Xiang取得好成績，當他知道第二朝要練早水，前一晚會自律早瞓，Karen相信就是從小教導有功。「教小朋友係一秒一秒累積番嚟，唔係一次半次，千祈唔好意氣用事，令小朋友覺得媽咪都管理唔好情緒，咁你點會教好小朋友？」
玩樂大隊長 爸爸教運動
兒子已長大成人，Karen也放手讓兒子自己管理自己，獨立成材。Joe十分認同太太教導有方，令自己可以專心出外賺錢養家，做兒子的玩樂大隊長，令他有個快樂童年。「由細到大我一下都冇打過佢，成日氹佢開心，我始終唔係成日喺香港，管教都係太太負責，我負責娛樂，我同阿仔最鍾意一齊睇電影，有時一齊游水、打籃球。」兒子的游泳天分來自Joe，他指兒子小時候有哮喘，就帶他游水做運動鍛鍊體能，從自發掘潛能，更青出於藍！
Joe的爸爸角色是仁慈中帶點嚴肅，玩得之餘亦保持父親威嚴，多年來他秉承亡父的教育方式，讓孩子無壓力自由發展。「我爸爸俾咗一個開心童年我，佢唔會俾好多壓力我，而唔係將佢心目中嘅目標，或者佢未完成嘅事去加喺我身上，我細個可以想點做就點做，有好大發展空間。」
不反對兒子入行
小時候由於家境不佳，父母要照顧六子女，Joe亦非讀書材料，中三便輟學到少年警察訓練學校，減輕家人負擔，將來工作亦有保障，馬爸爸都好支持。Joe加入警隊多年後，不想跟着既定的前景走，故走入多姿多釆的娛樂圈，「我唔想咁明朗知道自己40歲、50歲係點，唔想睇到之後人生係點。」
對於兒子受他的影響下，有意跟隨做星二代入行，他坦言不會反對，不會干預他的選擇，只會給予適當指引，「每個人生都唔一樣，佢鍾意行咩路由佢行，佢會有自己發展方向。」
