【虎羽有云】一歲BB沖繩親子遊（二） 美食篇
撰文、圖片：虎羽有云｜編輯：Sundaykiss
所以，Wilma媽就抱住呢份期望去沖繩，但可能係我哋去嘅大部分重點都擺喺親子體驗？想試嘅餐廳又礙於芊羽仲細唔想同佢食重口味嘅而放棄，結果今次沖繩之行就冇乜令我覺得真係會想食完再食嘅地方了。
不過就親子部分，確係有好嘅餐廳值得一去～以下等我哋逐一點評！
1. 超平價火鍋放題
我哋第一日去落機到拎行李到去到民宿都已經下午4點幾，所以夜晚嘅行程都係喺國際通閒逛。第一晚我哋冇特別想食咩，結果行到近卡樂B一抬頭望，就俾990円火鍋90分鐘放題嘅宣傳字吸引了。而咁啱冇瞓到晏覺嘅魔王芊喺呢個時間點瞓著咗，咁就係平時帶住BB唔敢食嘅打邊爐最佳時機喇！！
撘lift上到2樓就係餐廳，侍應姐姐安排咗我哋坐窗口嘅一個二人空間，私隱度甚高，雖然桌面範圍唔大，但非常適合夫婦情侶閨蜜（如果2歲下比較活躍嘅幼兒就不能考慮，太易接觸到火鍋好危險）。
我哋揀咗極上級別（1990円），圍返每人都係$140港紙，雖然唔包飲品，但呢個價錢都已經非常抵！一個套餐係包沖繩縣豚肉、國產牛，個人覺得牛不是太好食，脂肪較多似肥牛，但豚肉同雞肉都好ok呢，性價比好高！
▋Cookiyaコキヤ食べ放題 ▋
地址：沖縄県那覇市牧志３-２-３ 2樓
電話：098-868-5589
乘車：單軌牧志站步行5分鐘
營業時間：11:30～23:00 （最後點餐時間：22：30）
2. 美麗海水族館旁自助餐廳
原本我哋係去距離美麗海水族館15分鐘車程嘅另一間親子餐廳Gelateria Yahata，但係去到先發覺原來嗰間野已經執咗！ ！（明明我睇嗰本旅遊書係2018年⋯）結果我哋都係返美麗海呢間都好多人討論嘅自助餐廳算喇～
餐廳喺水族館嘅3樓，門口有一張預約紙你可以喺上面寫名當排隊。我哋去到嘅時候已經係一點幾，過咗餐廳最繁忙嘅時段，所以一去到就安排左我哋喺窗邊嘅位置。
食物方面，有漢堡、茄汁意粉、豆腐、蔬菜等等，都係啱小朋友食嘅。而大人嘛，都有沙律、飯、炸物等嘅東西，雪糕我覺得幾好，唔會太甜，Wilma爸就話賣相麻麻就冇試了，總結係選擇唔多，但質素可接受的。
呢間餐廳最大賣點係180度全海景！！所以窗邊位置好搶手，大家可以避開12-1pm繁忙時間嚟，就好大機會可以對住治癒效果200%嘅絕美海景為美麗海行程掀幕喇～
▋Inoh 海上觀景餐廳 ▋
地址：沖繩縣國頭郡本部町字石川424番地
MAP CODE：553 0757 97
電話：+81 980-48-2741
3. MonkeyBar
位於國際通嘅大街，Monkey Bar唔係熱門食店，或者都係淡季，而且平日，我哋去當日計埋我哋得2檯客人。
食物嚟講，呢度嘅調味偏鹹，不過係好食嘅。我哋叫咗芝士薄餅、意大利飯、炸雞、安格斯牛肉粒，除咗芝士薄餅嘅甜令到Wilma爸接受唔到，其餘都好恰到好處，牛肉粒亦出色。但唯獨Wilma媽叫咗一杯橙汁，係我飲過最難飲嘅橙汁，你哋都唔好中伏！
話明Monkey Bar，同馬騮仔嘅互動先係重頭戲。佢哋養咗3隻松鼠猴，只要同店員講，客人都可以入去同佢哋接觸。著好佢哋嘅風褸，拎住店員俾嘅食糧，佢就會俾你單獨同馬騮仔們困獸鬥。
因為5歲以下小朋友唔入得，我同Wilma爸就分別入去餵食，馬騮仔會伸手摷你褸袋，企喺你膊頭甚至頭頂，太緊張嘅朋友可能要考慮一下自己係唔怕先好入呀！
▋沖繩Monkey Bar ▋
地址：〒900-0013 沖縄県那覇市牧志3-1-6 5F
電話：+81 98-861-8833
營業時間：17:00～3:00
4. 第一牧志公設市場
作為吪國際通入面食海鮮必去景點，到出年6月16佢哋就暫別各位一段短時間喇。佢嘅設計，係下層海鮮檔同肉檔，上層加工食堂，所以唔少人都會將佢編為午餐行程。海鮮都好多姨姨都精通多國語言，我哋幫襯嗰檔甚至識廣東話。
揀完食材，姨姨就會拎住你買咗嘅食材上去揀餐廳，有台灣餐廳有日本餐廳，幾乎所有餐廳都係收3種菜式500円一個人嘅料理費。揀好咗個依依就會幫你同食店嘅店員講想要嘅烹調方法，我哋為咗芊羽都有得食，就揀一間會做海鮮粥嘅。
龍蝦、蝦、帶子，係意料中嘅鮮味，但最開心反而係我喺度食咗我成個旅程最好食嘅石垣牛。我哋揀咗煎嘅方法去做呢塊牛扒，除咗牛油嘅香味，咬落去嘅肉汁同口感真係叫人再三回味。
雖然係非常擠迫嘅食堂，但都有高身BB櫈，啱啱識坐嘅BB都唔怕。大家要趁佢搬遷之前快啲去啦。
▋第一牧志公設市場 ▋
地址：〒900-0014 沖繩縣 那霸市 松尾2-10-1
Mapcode：33 157 264*62
電話：098-867-6560
營業時間：09:00～20:00
休店時間：每月第四個星期天 （鮮魚魚店）
5. 企鵝酒吧
企鵝酒吧係喺國際通同新都心商圈之間，去嘅原因當然得一個，就係想體驗一下餵食企鵝。佢主要係做大人同當地人嘅生意，我哋當日去就唔見有小朋友喇。佢哋每日有五個餵食時段，如果想坐近企鵝，建議喺七點半前就到，餵8點時段。
當日就比較失望，聽侍應哥哥講，兩隻企鵝處於偽哺蛋嘅階段，冇乜胃口，上一個餵食時段已經唔食嘢。到咗8點，就算哥哥拎住魚仔都吸引唔到佢哋。所以有冇得餵都睇運氣啊～
但可幸嘅係，酒吧嘅食物令人喜出望外，AGU豬做嘅腸仔非常juicy呢！
而酒吧有一隻假嘅1:1北極熊，魔王芊嗰晚就相當驚慌⋯
▋Penguin Bar Fairy ▋
地址︰沖縄那覇市松山2丁目6-16
交通：單軌美榮橋站步行5分鐘
電話﹕098-863-9993
營業時間﹕
星期一至四：19:00～04:00
星期五、六：19:00～05:00
星期日、假日：19:00～01:00
6. 泊港漁巿場
有別於第一牧志公設市場，泊港漁巿場主要係食魚生為主，只有少許熟食（例如燒龍蝦仔），而且都係買完喺場內嘅檯搵位快食，坐位得幾個。而全場唯一食店係一間魚生飯，亦有湯品。
呢度嘅魚生超級平，有好多檔都做緊1000円3 packs，如果係海膽，當日見1800円到3000円都有，鍾意食新鮮魚生嘅朋友，建議可以搵一日上午嚟行個圈，可能有意外收穫。
▋泊港魚市場 ▋
地址：沖縄県那覇市港町１丁1-18
Mapcode：33 216 115*34
電話：098-868-1096
營業時間：06:00～18:00
7. 海族工房
兒童王國係沖繩親子遊嘅其中一個熱門景點，喺佢停車場旁嘅海族工房當然係當日行程嘅其中一項。同樣係自助餐廳，雖然呢度冇Inoh嘅無敵大海景，但因為佢嘅地台設計同方便小朋友走動嘅環境，海族工房可能對媽媽嚟講係食得更加自在嘅親子餐廳。
食物選擇呢度唔算多，不過適合小朋友食嘅食物反而唔少，完全唔辣嘅咖喱飯，清淡啲嘅豆腐，時蔬，夠哂飽。而Wilma媽就好鍾意佢哋嘅薯條，同埋八爪魚丸。另外佢哋嘅冰咖啡都好好飲！
要注意，餐廳自助餐下午三點就完，大家唔好太遲去呢。
▋海族工房Umizoku Kobo ▋
地址：沖縄県沖縄市胡屋 5-7-1
Mapcode：33 561 798*82
電話：070-5273-1900
營業時間：
[星期一、星期三、星期四]
西式自助餐 11:00～15:00
軽食單點 15:00～18:00
[星期五-星期日]
西式自助餐 11:00～15:00
軽食單點 15:00～18:00
居酒屋 18:00～22:00
公休日：星期二
8. Bambohe平價燒肉放題
又係一間圍返港紙都係百幾蚊嘅平價放題，今次係燒肉。位於國際通嘅Bamboho好受學生、遊客歡迎，全因價錢平之餘，食物質素亦唔錯，而且種類極多。沖繩豚肉、牛排、牛肩、牛舌、雞肉、海鮮，簡直向增肥五磅嘅目標進發。除咗燒肉，佢仲有好多現成嘅熟食，包括壽司、沙律、餐湯、甜品，嗰日仲有關東煮。
我哋嗰日坐卡位，枱面非常闊落，可以將魔王芊嘅眼前物全部移走。但係要注意嘅一點係，餐廳用嘅係炭火燒，鐵板上嘅肉容易搶火，大人千祈唔好掛住食，要攬實小朋友呢。
▋Bambohe燒肉放題 ▋
地址： 日本 沖縄県那覇市牧志1-3-47
電話：098-861-4129
營業時間：11:00～23:00
其實沖繩仲有好多親子餐廳同美食等住我哋去，不過可惜時間有限同今次資料搜集不足，大家去沖繩plan行程時亦可以加入Facebook嘅沖繩親子遊群組，入面嘅谷友就不時會介紹吓自己去過好食嘅餐廳，大家不妨參考同請教～
