朱茵自爆：「太漂亮是煩惱」自小教女「擇男」 大法

撰文：Anson | 編輯：Chloe| 圖片：Athena Chu 朱茵－Official @ Facebook、黃貫中 微博、Paul Wong 黃貫中@ Facebook

朱茵教女兩性相處之道

早前，朱茵於內地節目《恕我直言》大談兩性關係，分享自己過往經驗，她更教導囡囡兩性相處之道。她認為美麗的外表並不是我們想的美好，漂亮的外貌令別人卻更不敢和自己說話，更難打開話題。

以「矜持」分辨高質男生

她寄語囡囡以「矜持」分辨出真正高質的男生，因為男生不會珍惜太主動的女生，被動一點卻更有個性，不然男生會覺得你十分隨便。 對於好男人的定義，朱茵有自己一套想法。她認為可靠的男生應該有風度，處理不同關係也很成熟的話，就是好男人。她更說「如果他對朋友、家人也很好，那我就會覺得這個人好；如果不是，那我就覺得這個人算了吧。」

教導女兒男女有別

雖然現在囡囡還未完全懂事，但朱茵也會教導她男女有別。因為囡囡抱怨和男生玩耍時，和男生玩起來十分粗魯，你推我撞似的，身為媽媽的朱茵就教導囡囡這是男女之別，女生不能做同樣的事，旨在灌輸正確的兩性相處禮儀。

朱茵被呷醋囡囡「私有化」

節目中，朱茵更大讚女兒鶯鶯貼心懂事，每次媽媽出門工作有爸爸陪著都不會吵鬧，仲會細心詢問媽媽什麼時候回家。之後，又爆女兒「護媽心切」超易呷醋，更不時將媽媽「私有化」。佢舉例爸爸黃貫中做什麼都可以，但是女兒一看到她上電視節目就會哭，會控訴媽媽只能是她的！

朱茵爆阿Paul唔識教女

朱茵和黃貫中 (Paul) 向來保護囡囡黃鶯免她曝光，但早前一家三口首度拍攝內地真人騷《想想辦法吧！爸爸》，有傳酬勞過千萬，近日一家三口拍攝嘅預告片終於有得睇喇，片段中朱茵大爆老公在囡囡面前完全冇晒辦法，直指老公唔識教女！

在節目預告片中，朱茵大爆老公在囡囡面前完全冇晒符，直指老公唔識教女。在囡囡心目中，媽媽（朱茵）佔9分，爸爸（阿Paul)得1分。

阿Paul自封全能奶爸

相反，阿Paul就覺得自己係個全能爸爸，仲為自己嘅表現打出75-80分。

然後，阿Paul在節目中好認真咁講解自己的湊女大法，會跟她講故事，令她興奮起來就多做運動，午睡不能睡太久…

然後仲用超另類方法哄囡囡入眠：「給她一個電話打遊戲，打到眼睛累，不然的話，女兒在晚上怎麼樣都不會睡！」

呢種湊女方法令admin都聽到一額汗，難怪朱茵話老公唔識教女。

阿Paul話寶貝女似「叉燒包」

節目中，阿Paul回憶起陪老婆入產房迎接B女到來的情景，當時佢偷偷帶攝影機入去錄下囡囡誕生全記錄。醫生規定唔準帶手機入內拍攝，一向有性格嘅阿Paul就笑言「唔準帶手機，又冇話唔準帶相機。」

原來阿Paul同好多爸爸都一樣，以為bb一出世就會生得好得意，好似公仔咁。

點知，親眼目睹黃鶯出生的樣子，佢直言嚇了一跳「點會生成咁嘅！快面縮埋一舊！成個叉燒包咁！」

阿Paul直言女兒像叉燒包。

而家阿Paul就話終於知道bb出世都係咁嘅樣，只要「拿去洗乾淨」再打扮一番就會變返正常。

唔知朱茵同黃鶯聽完會有咩感想….

囡囡最討厭爸爸？！

被問到最討厭的事，黃鶯說最討厭爸爸對自己和媽媽發脾氣。不過相信阿Paul還是很愛妻女的，看他們玩成一團就知道了。

唔知係咪做咗爸媽後，都有鋪「戀腳癮」。囡囡控訴爸爸阿Paul「成日咬佢只腳」。

黃鶯可不是亂說，玩得肉緊時，阿Paul真的咬了一下黃鶯的小腳，結果將囡囡整到喊晒口。

黃鶯一邊喊，一邊同媽媽投訴「佢（爸爸）係 真 咬 我 隻 腳！」惹笑朱茵同阿Paul。

鳯梨咩顏色？阿Paul搞爛gag冧掂兩個情人

節目中，朱茵問囡囡鳯梨咩顏色？醒目囡囡就回答「黃色」。

不過，在旁彈住結他嘅阿Paul就玩心起搞爛gag，佢話：「應該係黑色，黑鳯梨。」

兩母女聽完一頭霧水，然後阿Paul就開始彈唱〈喜歡你〉，原來黑鳯梨和「喜歡你」的國語音相近。阿Paul搞爛gag，氹到老婆同前世情人不知幾開心。

囡囡笑指著爸爸媽媽說：「他（爸爸）那麼傻是因為喜歡你。」呢一家三口真係好有愛。

同場加映：破例接真人騷 朱茵 阿Paul 捧女袋千萬

朱茵母女難捨難離

內地真人騷《爸爸去哪兒》拍了五季深受觀眾歡迎，參與拍攝的明星二代全部都人氣急升，去年陳小春帶住兒子Jasper參加演出後，Jasper即成為內地炙手可熱童星，可想而知這類真人騷的入屋程度有幾勁。早前朱茵阿Paul亦解除防線，破天荒讓女兒參與由優酷製作的《想想辦法吧！爸爸》，節目名雖然只提及爸爸，但實際上卻是全家出動，朱茵才是最關鍵人物，因為參與的五位明星媽媽為了放鬆而组團外遊， 五位明星爸爸就負責帶住仔女長途跋涉去搵媽媽。

早前朱茵一家三口在北京機場出現，由於劇組要分兩隊拍攝，朱茵與其餘四位媽媽同行，爸爸亦要帶住仔女開始進行拍攝，當日朱茵到機場送別兩父女，年紀小小嘅黃鶯知道要暫別媽咪，攬實朱茵喊到收唔到聲，搞到眼腫腫鼻紅紅，十分慘慘豬，朱茵亦忍唔住跪地抱實囡囡喊，最後一家三口更擁作一團。

其實朱茵收到演出邀請後都好掙扎，思前想後先肯應承，據知情者透露，「咁多年嚟朱茵同阿Paul都堅持唔畀個女公開露面，想保護佢唔受傷害，等佢可以過普通人嘅生活，但個女開始長大，始終都要喺香港生活，避來避去都唔係辦法，佢兩公婆亦慢慢諗通，希望順其自然畀佢見多啲世面。前年朱茵孖住蔡少芬參演《偶像來了》及《王牌對王牌》等內地綜藝節目，人氣返晒嚟，工作亦接踵而來，咁啱年初內地製作人想搵香港明星家庭拍《想想辦法吧！爸爸》，幾經辛苦先游說到朱茵出嚟傾，對方好有誠意，因為要全家出動，又係Debbie(黃鶯)第一次公開出鏡，所以酬勞過千萬人仔，不過都辛苦㗎！阿Paul未試過自己對住個女咁多日，要連續24日帶住囡囡穿州過省搵阿媽，對於兩父女都係一個考驗。朱茵覺得呢個係一個好好嘅鍛鍊機會，有錢搵亦幫到阿Paul喺內地嘅知名度，最後亦應承咗，不過因為囡囡嚟緊就要考小學，暑假亦要開始準備，所以拍攝時間唔可以太長，劇組亦應承一個月內放人。」

極速與童黨混熟

黃鶯除了五官像朱茵長得標緻，亦遺傳了父親的藝術細胞，自小喜歡唱歌跳舞，由於出世後頭幾年都由朱茵全力照顧，為了不想女兒有公主病，朱茵賞罰分明絕不盲目溺愛，而黃鶯懂事自理能力又高，前年趁女兒已入讀幼稚園，朱茵開始全面復出，要工作的日子就把女兒交由外婆照顧。本刊記者曾多次目擊黃鶯跟隨朱茵阿Paul外出，只見她乖巧又聽話，而且待人亦非常有禮貌。

節目在上月中開鏡，先後在雲南及成都等地進行拍攝，阿Paul拖住囡囡穿梭多個地方，不時被野生捕獲，平時Rock到爆的阿Paul對住個女冇晒火，全天候慈父上身，形象反差非常之大。從網民放上網的照片中可見，黃鶯已忘記與母親分別的離愁，即使沒有朱茵在身旁，與其他小朋友亦打成一片玩得好開心，而阿Paul則帶女洪郎賣土耳奇雪糕又學插花，做盡以往絕不會公開做的事。猶記得25年前黃家駒在日本上綜藝節目上意外出事，Beyond其餘三子此後對參與綜藝節目都非常避忌，看來有女兒作伴，阿Paul已成功克服陰影。

學插花

賣雪糕

夫妻檔搵人仔

阿Paul父女上陣千里尋妻，反觀以朱茵為首的太太團就舒服得多，見她去完沙漠騎駱駝，又穿民俗服飾與民同樂，其中一日更與洪天明老婆周家蔚去大型超市掃玩具，不用湊女絕對是優差。其實生女後的朱茵復出後只放眼大中華，近年與阿Paul一齊簽內地經理人搵人仔，當年《西遊記》的紫霞仙子在國內依然有市場，拍劇拍電影之餘，仲代言唔少產品，去年更以天價酬勞為國內代言一種傳銷商品女性洗陰棒，為搵人仔接了不少前所未接的工作，包括今次全家亮相真人騷。

去到雲南站，朱茵穿上當地的民俗服飾拍攝，更與當地居民一起跳民族舞。

朱茵近年主力拍劇拍電影參加綜藝節目，阿Paul就繼續搞音樂開騷，論工作量與受歡迎程度，朱茵遠勝阿Paul。不過阿Paul為頭家亦發奮圖強，知情者透露：「為咗個女同頭家，阿Paul講嘢慎言咗，再唔會好似以前咁衝動，依家有內地經理人幫手，佢同朱茵都接落唔少job夫妻檔一齊上，咁樣個價高好多，喺內地知名度好重要，等個真人騷出埋街，阿Paul兩父女都會人氣爆升，到時肯定會有其他騷爭住搵佢哋做。朱茵今次捧女之餘，最大得著應該係捧埋個老公，絕對唔會計錯數！」一家三口殺入內地，錢途無限。

洪氏一家

家庭樂

趁住真人騷未開拍，早前朱茵與阿Paul帶住囡囡外出享受家庭樂，雖然當日落大雨，但有媽咪朱茵擔遮擋雨，黃鶯笑住上嗲哋車好開心。

女兒奴

一家三口在九龍城廣場飲完茶，再由阿Paul帶囡囡去室內遊樂場玩，對住可愛又跳脫的黃鶯，阿Paul明顯無力招架，畀阿女氹到心花怒放，笑瞇瞇做其私人攝影師。

婆婆身教

唔止朱茵阿Paul教女有方，就連朱茵媽咪都以身教湊孫，早前黃鶯由婆婆接放學後去公園玩，見到有小男孩跌倒受傷，黃鶯驚到攬實婆婆腳，後來在婆婆鼓勵下上前問候小男孩，非常有愛。

朱茵湊女親力親為

自女兒黃鶯出世後，朱茵把家庭放在第一位，家中大小事務都盡量親力親為，早前她駕車到寓所附近買生果，即使有外傭跟車，但她依然親自落車親手揀，之後才返上車等，遇上本刊記者，更大方揮手打招呼。

接放學

雖然前年開始復出，但朱茵仍非常著緊女兒的校園生活，不用開工時她堅持去學校接放學，閒時又會與女兒一起砌puzzle、跳舞及唱歌，難怪黃鶯最黐媽咪。

朱茵與阿Paul為培育女兒花了不少時間與心機，阿Paul為囡囡的改變也不少，一家三口曾被本刊記者影到暢遊廸士尼。對於黃鶯想有個妹妹，已46歲的朱茵表示隨緣，不會強求。