黃翠如 蕭正楠《師奶MADAM》定情 回顧蕭生蕭太甜蜜互動
原文：東方新地｜圖片：東方新地、Instagram、劇集截圖|編輯：K
蕭正楠台慶宣布已娶黃翠如
昨晚《萬千星輝頒獎典禮2018》中，蕭正楠與曹永廉憑《兄弟大茶飯》奪「最受歡迎電視拍檔」，並由黃翠如、洪永城頒獎。當蕭正楠講得獎感受時，突然正式宣布已娶黃翠如為妻：「我要多謝，我太太黃翠如」令全場藝員同事超驚喜，企晒起身鼓掌！
「多謝我太太黃翠如！」
台上錫錫Sweet到爆
蕭正楠：「Sorry sorry，我係好心神恍惚…… 我一直諗啲好浪漫嘅嘢感動我太太，但我個腦仔有限，唔識講好多嘢，好緊張，緊張咗成晚，我都唔記得要多謝你乜嘢。我多謝你令我學識去照顧人，令我學識做個更加好嘅男人，今晚呢個承諾都好大鑊，因為全香港人都知道。」
蕭生蕭太晒戒指
台慶頒獎禮結束後，蕭正楠與黃翠如齊齊上載一張二人戴上戒指的相片，兩公婆於藍天白雲下手挽著手，翠如BB透露：「他在過山車上向我求婚，我在河邊向他求婚。」雖然當時沒有連戒指都只係喺鄉村小市集隨便買，但係…「那一刻，我們什麼也沒有，但我們擁有了對方。」感動死小編啦！！
黃翠如「愛的宣言」全文：
某時，某地。
他在過山車上向我求婚，我在河邊向他求婚。
某時，某地。
沒有衣香鬢影，沒有氣派場地，就連一對合尺寸的戒指也找不到，然後我們在一個鄉村小市集，找到一對用餐具弄出來的小戒指⋯⋯ 就這樣吧。
那一刻，我們什麼也沒有，但我們擁有了對方。
證婚人問我們，為什麼是對方？
他說，她是那一個，假如到了下輩子，她遺忘了我，我要大力拍拍她的頭，她就會記起我，然後我們又再在一起，她就是那一個人。
我說，他是那一個，每次我跌倒，他總是坐在我身邊，讓我哭着說流血很痛，到靜止下來，然後拖起我，繼續帶着我走，他就是那一個人。
我們給對方的，是陪伴的承諾。
沒有奢華的浪漫，但足夠。
我們不是羅大樹和花萍。
我們不是馮汐然和顧成雙。
我們是蕭正楠和黃翠如。
那一天，天空出現一道彩虹，這是最好的祝福。
蕭正楠與黃翠如於2014年五月公開戀情，兩人戀情一直十分高調，不論鏡頭前後都可見二人甜蜜蹤影！「翠蕭」戀情萌芽於拍攝《師奶MADAM》之時！翠如喺「定情劇」中飾演由千金小姐變做屋邨師奶的女卧底，而蕭正楠就飾演翠如的兒時夢中情人，因查案而與翠如扮演夫妻。
蕭正楠與黃翠如公開戀情後，人氣反而直線上升，兩人均形象健康又有觀眾緣，自然深受客戶歡迎。除了本來TVB的工作，兩人經常都以情侶檔出席大小活動搵真銀，可謂寓工作於娛樂！
《每個男人心底都有一個黃翠如》
話說回來，黃翠如與洪永城呢對好拍檔係公認的相襯，唔少人都希望佢哋喺現實中成為情侶，不過世事豈如人願…… 早在2015年，翠如和洪永城喺新加坡《星和無綫電視大獎》紅地氈上，手拖手一幕憾動人心，網民都一致認為，佢哋未能開花結果實令人惋惜。
當時有位深受感動的高登巴打就出咗一篇《每個男人心底都有一個黃翠如》嘅潮文，講述每個男人心底都會有一個情同手足、但又唔會相戀嘅女仔朋友；但當發現自己其實係愛對方嘅時候，對方已經心有所屬。字裏行間無盡悕憈，引起不少人共鳴，隨即喺網上瘋傳！
翠如BB就話佢同Tony係一對會一齊嗌交、講心事同去旅行的好好朋友，不過心底裏好明白兩人唔可能成為情侶… 而且Tony「已經找到他的她」、而翠如「好像也找到了她的他」，所以現在只會互相祝福大家走得更好…
蕭正楠激讚翠如：一個不能錯失嘅老婆！
大家醒一醒啦，現實中，翠如BB同蕭正楠先係一對！去年蕭正楠與曹永廉為《超時空男臣》宣傳時，蕭正楠接受本刊記者訪問，當時談到翠如已經35歲，係時候計劃結婚及生小朋友，阿蕭承認：「會嘅會嘅！我會好認真諗呢個問題。(有冇諗過以咩形式結婚?)簡單為主啦！為咗屋企人都要從長計議啲，要plan好啲。我會畀一個好難忘嘅回憶佢，需要時間諗諗。(同翠如鍾唔鍾意小朋友呀？) 鍾意，當然鍾意啦！」
《幕後玩家》黃翠如火辣歎「水中蕭」
《幕後玩家》係蕭正楠與翠如公開戀情數年後，再次合作的劇集。其中講述翠如BB及蕭正楠兩公婆感情漸趨破裂，翠如一早打算離婚，不過希望在分開前留下最美好的回憶，所以就決定郊外玩番日！兩人踩單車、釣魚、野餐，之後仲齊齊返酒店睇日落。臨別秋波，戲肉現在先開始！
翠如BB闖浴室
鏡頭前本來只有蕭正楠赤裸上半身沖涼，之後疑似全裸的翠如BB突然拉開浴簾，仲露出一個好嫵媚的笑容，之後就一發不可收拾，濕晒身又攬又咀！兩人呢場戲表現得相當投入，好似世界得番佢哋兩個，非常火辣香艷！相信平時做慣做熟，先拍得出呢個效果？
《美女廚房》蕭正楠黃翠如 放閃光彈唔使錢！
早前蕭正楠同黃翠如打情罵俏打到上《美女廚房》，眾人梗係要食吓花生、抽吓水啦！點知不敵閃光彈，張振朗剩係企喺一邊都頂唔順，開口講笑話自己都係出返去先啦！
蕭正楠 公開盛讚
深情對望
黃翠如喺第一輪的菜式獲得除咗蕭正楠以外的人一致負評，但阿蕭喺翠如深情目光下，竟然講得出：「其實好甜！」然後再Chok爆回望翠如，真係唔使加Effect到感覺到佢哋有幾Sweet啦！
愛情來了的《美女廚房》
試食咗少少，蕭正楠Man爆咁咗一句：「無人欣賞你，我欣賞你。」再嗱嗱塞哂翠如煮的餸菜落口，哇，真係感動全場！
蕭正楠真情流露黃翠如眼泛淚光
能夠搵到個願意煮飯俾自己食的女人，係幾咁幸福！
「結婚！結婚！結婚！」
唔少粉絲都非常希望佢兩個快啲「有情人終成眷屬」，快啲結婚，又點估到其實佢哋已經……
好片重溫：
蕭正楠忍口已久
蕭正楠今日凌晨時分接受傳媒訪問，佢就話其實冇好認真咁同太太翠如夾過，但自己就覺得都係時候要講，因為實在好難忍口，所以選擇喺台慶晚上公布！蕭公子又笑說好兄弟曹永廉出名口疏，講咗喜訊俾佢知後要落力塞住佢把口！
「我同佢喺埋一齊，去到邊都咁開心嘅。」
問到兩人結咗婚幾耐？蕭正楠就話係今年的事，兩人都非常開心，好多謝媽媽及翠如父母的祝福。「我哋做咗一個旅行嘅婚禮，簽紙，好浪漫嘅，我同佢喺埋一齊，去到邊都咁開心嘅。」
俾陳展鵬鄭嘉穎打尖
蕭正楠表示結婚後其實都打算盡快公布，因為身邊的朋友、同事、記者朋友都不停追問幾時結婚。但蕭公子稱本來早前想公布，但陳展鵬與單文柔突然宣布有喜；之後再想講時，又到鄭嘉穎陳凱琳宣布BB要來了，俾佢哋打咗尖！揀無可揀下，最後選擇台慶晚上：「今晚我估冇人講啦啩！」
第一次求婚失敗收場！
蕭正楠又稱與翠如喺暑假之前已註冊，更自爆求婚過程！原來蕭公子當時喺歐洲搵咗部最高速的過山車，諗住翠如冇得走，去到中途就叫佢望過嚟，準備拿出求婚戒指！點知翠如BB當時實在太驚，成個人定咗，所以蕭公子只好收埋戒指，第一次求婚失敗收場！
會考慮擺酒
大家最關心當然係幾時擺酒啦！蕭正楠就表示原本冇呢個打算，只係簡單同屋企人食餐飯，但受到接近全台藝人的祝福後，笑言開始受到影響：「我見到身邊嘅同事好開心，佢哋話我一定要搞婚宴，俾啲時間我考慮吓啦，大家都好忙工作，佢又啱啱接咗新劇，要睇吓點。」
