老婆去旅行前準備充足 陸永獨自湊女方知辛苦：陸太你好嘢！
撰文：Kayla｜圖片來源：Instagram
東奔西跑接兩女放學 陸永呻辛苦
兩個女平時放學由Reina親自接送，不過佢去咗旅行，呢個重任就自己落咗喺陸永身上！不過一日接送兩個女都唔係一件易事，陸永接送完2日之後就已經投降，仲喺Instagram上問老婆平時係點樣做到！
陸永留言：「接送兩個女返學放學，一個晨咁早就要起身，另一個仲返緊下晝班，一個返東面，一個返西邊，我試第二日啫，經已諗唔明陸太係如何做到嘅呢？確實敬佩，值得表揚。」仲tag埋「#陸太你好嘢系列一」，相信呢個系列仲會陸續有嚟！
老婆去旅行前準備充足
以為接送兩個女已經好辛苦？非也！陸永每日都會喺Insatgram上同老婆隔空報告情況，除咗分享湊女趣事外，仲借意大讀老婆心思細密，全因Reina「未卜先知」，喺去旅行前已經一早幫陸永準備好晒日常所需，令陸永不至於手忙腳亂！
在 Instagram 查看這則貼文
陸太你好嘢系列二：聖誕聯歡會
事緣大女Hannah學校搞聖誕聯歡會，但陸永又唔知幫個女準備咩食物返學校，最後就準備咗魚蛋、燒賣呢啲簡單小食：「Hannah學校聖誕派對 ，每個同學仔都要準備食物帶返去， 但又唔可以求其喺街買啲薯片呀零食呀咁樣，哈！想考驗我？以為我老婆飛咗我就帶唔到嘢食返去？!哈！!又整魚蛋又整燒賣呀，你睇幾豐富！」
原來Reina臨走前，已經幫陸永買咗幾個錫紙盒，仲叫佢落街買魚蛋、燒賣，成功過關：「陸太臨飛前：Hannah學校party嗰朝你帶定個錫紙盤去買魚蛋啦。@missussix多謝教路，咁又過到骨！」
陸太你好嘢系列三：襯衫
陸永：「話說今日同時都係阿sim聖誕派對，阿sim對時裝嘅執著同要求好高，係會因為襯唔到衫唔肯去街嗰種人，所以佢阿媽喺飛前幫佢襯好嚟緊每個活動嘅衫，一套套擺好，好彩咋😥😥😥😥😂😂😂唔係又要我出手喇。#話說我曾經幫兩姐妹襯過衫出街#俾人評價為大媽過啲大媽」
在 Instagram 查看這則貼文
陸太你好嘢系列四：聖誕裝飾
陸永：「我向來都係勁冇節日氣氛嘅人，做我啲囡望住人地屋企又鹿又雪人都真係幾慘嘅。好彩@missussix臨飛前已經佈置好一屋聖誕氣氛，啲女好開心呀！#我幫手搬棵樹出黎同撕爛一張貼紙」
陸永6歲女放學大呻：做晒功課嘅煩惱
日前，陸永太太Reina喺個人社交網上載同大女Hannah嘅合照，仲留言話：「我問Hannah點解日日喺學校做功課，小息唔去玩，佢話『你imagine下放學返到屋企唔駛（使）做功課，可以玩又得，睇電視又得，係幾Free……』」。
媽咪都答唔到呀女問題
聽到囡囡咁問看己，Reina亦不禁續指：「最近接放學，一上到車就會問我『媽咪，我諗唔到返到屋企可以玩咩？』做曬（晒）功課嘅煩惱」，即係簡單暗示要出街玩，睇嚟陸永大女都真係幾醒目喎！
細細個就懂得「先苦後甜」
而網民見到Hannah細細個就咁生性，都忍唔住大讚：「咁細個就識延遲滿足」、「hannah好識諗」、「先苦後甜」、「這是好習慣來的哈哈」。
陸永嫂大讚乖女：「人品好最緊要」
自從Hannah升上小學後，怕佢跟唔到上課進度，所以每個星期六都請咗個補習姐姐同佢補習個半鐘，複習一下過去嗰個星期學過嘅嘢… 其餘時間，只要佢做曬功課，佢可以想做乜就做乜，想學咩課外活動，全部都任佢自己選擇。
考試嗰幾日，補習姐姐每日都嚟陪佢溫習一個鐘，之後又繼續佢嘅睇電視玩玩具做手工… 星期一放學Hannah講「我中文考試99分呀！老師話係全班最高分…」
我同陸生當然十分驚訝，因為我哋從來都冇假設或期待佢應該考到咩成績，覺得有80分已經叫唔錯啦⋯⋯
星期二放學Hannah話派咗英文同 G.S不過佢唔記得幾分… 媽媽嘅直覺話我知佢係記得嘅！👧🏻突然話「不過唔係攞到好高分… 」「哦，唔緊要啦！合唔合格呀？」👧🏻「英文97 ，GS 93」👩🏼 「咁都叫唔高分？」👧🏻「因為唔係最高分」👩🏼「我覺得你好勁喎，盡咗力就得啦⋯⋯」
星期四派咗數學卷，Hannah話得90分仲畀個同學笑佢咁少分，而嗰個同學只係僅僅高佢一分啫，但係佢同同學講「你成績好，不過冇禮貌！」
細女勁玩瑜珈
除咗大女Hannah，Reina都有上載細女陸一心（SimSim）嘅搞怪短片，片中見到SimSim用手摸自己隻就快甩嘅牙仔，之後轉頭就見佢食嘢，但最估唔到嘅係佢突然做拱橋，認真夠難以捉摸！
智鬥5歲細女完敗 陸永嫂：「我應該點畀反應」
Reina在社交網台上載了一張照片，相中Simsim喺露台「披頭散髮」咬住蘋果，期間Reina勸囡囡「你可唔可以去夾返好啲頭髮呀？」，Simsim一句神回覆「應到媽媽行」，佢話：「我依家唔係做正經嘢，唔想扮正經囉⋯⋯」Reina無奈留言：「real到你嬲」。
網民笑言Simsim係「人生哲學家」
對著小小金句王Simsim，網民隨即紛紛留言：「好正 美貌與智慧並重」、「佢又好似有啲道理」，更有網民封佢為「人生哲學家」，追問「Sim sim幾時出書呀」
陸永嫂勸女食蘋果
隨後，Reina又上載了一段短片，片中細女Simsim認真做勞作，Reina期間叫她「快啲食個蘋果啦」，一心做勞作的Simsim當場拒絕：「唔想呀」。Reina繼續耐心勸囡囡，試用「唔食就畀蟻蟻食」，Simsim竟回覆：「蟻蟻你食吖食吖食吖…」，更作勢擺蘋果落地。
Reina：“陸一SIM呀!”
Simsim：“吓?”
Reina：“你快D食個蘋果啦…”
Simsim：“唔想呀…”
Reina：“蟻蟻食㗎喇咁樣…”
Simsim：“AIYA…蟻蟻你食丫食丫食丫…擺落地下…”
#我應該點畀反應
#佢唔問返我佢係咪好有愛心我做咩要投降
網民笑指：完美演繹「死妹丁」
網民又在紛紛留言大讚Simsim：「好可愛」、「搞笑」、「真係遺傳晒陸生」。
陸永送超貼心生日禮物 太太被封「最幸福人妻」
早前，陸永太太Reina生日，佢就喺Instagram晒出老公送的生日禮物，並冧爆咁話：「從來未收過咁sweet 嘅生日禮物！」隨即一眾網友大直呼：「好甜！」、「甜到漏！」，仲被一眾網友封為「最幸福人妻」。
究竟「愛妻號」陸永送咗咩貼心禮物令老婆咁感動？之前見陸永成日有老婆接送，原來陸永一直唔識揸車唯有依賴老婆。今次老婆生日陸永就鼓起勇氣送驚喜：「日日見你咁頻撲，好攰好眼瞓，想幫輕下你又無能為力，所以鼓起勇氣去學揸車！」
除咗去揸車，陸永買咗部相機幫屋企三位「少女」留下美好回憶，「老婆，你講得啱，我係應該幫你同兩個女影多啲見得人嘅相，所以我買咗部相機報埋個攝影班！」真係Sweet到爆呀！
從來未收過咁sweet 嘅生日禮物！「老婆，你講得啱，我係應該幫你同兩個女影多啲見得人嘅相，所以我買咗部相機報埋個攝影班！」「日日見你咁頻撲，好攰好眼瞓，想幫輕下你又無能為力，所以鼓起勇氣去學揸車！」好貼心嘅生日禮物，多謝陸生！
