80後漫畫家「路邊攤」︰想hea爆湊女

路邊攤在其facebook專頁強調自己的座右銘︰「一定要夠瞓！任何時候及環境下都能熟睡，終日夢想可以三十歲前退休並過着米蟲般的生活。」米蟲即大懶蟲，剛過了30歲的路邊攤，莫講話退休，想偷懶都唔得閒，自去年尾誕女「小攤攤」後，每日忙於湊女兼趕稿，半夜阿女又要餵奶，完全冇覺好瞓。

公關變漫畫家
漫畫家的自畫像大多可愛化，沒料到路邊攤真人與卡通很像樣，真人外表後生，笑容可愛，其冬菇頭與卡通版完全一樣，她不算得上美人，但有卡通人物的親切感。

「我叫路邊攤，係因為我喜歡行路邊嘅攤檔，我開個blog就好似開咗個攤檔，希望啲人經過時，鍾意就繼續睇，唔鍾意可以路過。」與很多漫畫家的成名之路相若，路邊攤開了這個「攤檔」後，徹底改變她的生活。她原任職公關公司，過着一般OL生活，經常開會兼OT，生活乏味。自3歲起愛上畫畫的她，2008年開blog連載漫畫，把身邊趣事化成漫畫故事， 自己做女主角，老公阿真變男主角，加上一班親友做陪襯，大放笑彈。一年後被出版社看中，她旋即放棄三年的PR工作，加入全職漫畫家行列，「我對轉行冇爭扎過，冇諗過生計，賺得少咪食少啲穿少啲，冇乜所謂。」

路邊攤性格「好hea」，乜都冇所謂，去年中結婚都hea搞，沒求婚、沒禮服、沒花球、沒婚照、沒度蜜月，連戒指都是婚後才造起，整個婚禮只有十多個親戚參與，沒邀請朋友。她相信結婚只是一個儀式，與丈夫感情深厚，相信二人能白頭到老。

「萬聖B」小攤攤去年10月31日出世，講到湊女不能hea，「頭幾個月最辛苦，成日要餵夜奶唔夠瞓。佢係一個好識表達自己嘅BB，佢似我同老公成日笑，但當佢扭肚餓扭眼瞓，就好盡情咁喊！」六個月過去，路邊攤讚囡囡易湊了很多，夜奶早已戒掉，終於可以hea吓。

人生座右銘︰夠瞓
「阿女依家每日瞓足10至12個鐘，我終於可以瞓番8個鐘。」每日8小時睡眠，很多都市人都未達標，以「夠瞓」為座右銘的路邊攤卻嫌不足，「我由細到大都瞓好多，夜晚8點幾瞓到第二朝6點幾返學。未生囡囡前，連埋瞓晏覺，每日最少瞓10至12個鐘，可能呢30年人瞓得太多，有報應！」

湊女生活穩定下來，而且臨近書展，為籌備新書，路邊攤再返「office工」，「依家一星期兩日去老公間公司畫畫，迫佢俾個位我坐。」路邊攤在會計師丈夫的公司有個私家位，同事埋首計數，她就忙趕稿，風馬牛不相及，「喺屋企畫畫易分心，隔十幾分鐘就入房睇個女，『返工』畫畫專心好多，放低個女俾長輩湊，再痴老公車返工放工。」

老公請人︰要睇老婆漫畫
老公阿真全心全力支持老婆創作，意見當然要俾，「佢好着重自己出場戲份，夠唔夠搞笑，但佢成日話我醜化佢。」路邊攤笑說，阿真還下令員工買書撐老婆，更設下另類入職條件，「佢要每個新員工睇晒我啲書，要了解老闆，哈哈。」路邊攤「返工」趕稿並非自閉，會迫「同事」給予意見，「佢哋行過會裝裝下，但唔敢俾意見，我要迫佢哋睇。」

至於六個月大的小攤攤，見到漫畫的可愛圖畫，會笑笑口拍書本，以示「好睇」！「佢可能仲細，鍾意擺啲嘢入口咬，我本書都係咁咬！」未知小攤攤會否遺傳媽媽的畫畫天份，路邊攤對此隨緣，待她長大一點再看她喜好，但爸爸希望女兒將來似媽媽，路邊攤道︰「老公覺得我做創作，可以做自己鍾意做嘅事，而且工作過程好開心，佢希望囡囡都好似我咁，做到一份自己鍾意嘅工作，快快樂樂過人生。」

報學校條件︰不用排隊
在路邊攤眼中，滿足「食、瞓、屙」三大條件，就擁有快樂人生，「所以BB好開心！」不過現實歸現實，小朋友愈大，要擔心的東西更多，單是學業就令父母好頭痛，她也驚嘆道︰「我都唔想諗咁多，唔想阿女讀書有壓力，佢有壓力即我有壓力，佢多功課，我都辛苦！老公唔想阿女喺香港教育制度下讀書，我就諗得較hea，唔使去排隊報名就得，哈哈！不過唔讀local讀國際學校，都唔係舒服o架，有啲國際學校都好深，我會盡量揀間活動教學，冇考試，就算功課都係開心功課嘅學校。」

半歲大的小攤攤開始認得人，路邊攤時常帶她外出多見識，「等佢冇咁自閉。」現時與小攤攤最friend是家中五隻貓，路邊攤與老公是「貓癡」，去年為愛貓出版繪本《路邊喵》，講述她與老公在路邊撿流浪貓回家的趣事，希望宣揚「領養代替購買」，幫助流離失所的小動物。

人貓可並存︰消毒滅惡蟲
「養貓對大肚婆唔好呀」、「養貓對BB唔好呀」，自路邊攤懷孕一刻起，親友反對聲音此起彼落，她拒絕聽從，在網上搜集大量文章，去證明人貓可以並存，「阿女出世至今半年，乜事都冇，親友就冇再講。」她強調，最重要做好清潔，避免感染弓形蟲，「弓形蟲多來自貓廁所、貓嘅糞便，清理完一定要消毒洗手。」弓形蟲亦有機會在魚生、有機蔬果、未經煮熟肉類或奶類出現，「大肚食魚生感染機會，可能仲高過養貓！」好多人感染後會自行痊癒，並產生抗體，所以不必太擔心，「如果大肚驚感染，叫老公清理貓廁所。」

路邊攤覺得誕下囡囡後，應要多加關心貓兒，「好多人未有小朋友前，返屋企第一件事係叫貓貓，摸吓佢哋，但有咗小朋友後，返屋企第一件事變咗照顧BB，令到貓貓呷醋。有養寵物嘅家長，睇完BB後記得搵番貓貓，唔好冷落佢哋呀。」

路邊攤小檔案
路邊攤，80後漫畫家，2009年出道，現為全職繪本及報紙專欄作者。至今著有8本作品︰
《愈懶惰愈快樂》、《愈上學愈快樂》、《情人眼裡超低B》、《笨蛋是怎樣煉成的》、《懶人閃亮亮求生術》、《愛似忌廉溝鮮奶》、《笨友襲地球》、《笨蛋老闆的一年級課》
《迷糊 Office 365》及《路邊喵》，最新作品將於書展推出。

撰文: Ling
攝影: Clay Lam (部分相片及插圖由受訪者提供)
場地: 淘大商場