【恩愛夫妻】林文龍郭可盈 慶祝水晶婚
撰文：Kammy｜圖片來源：Instagram、微博
林文龍郭可盈慶祝水晶婚
藝人林文龍同郭可盈於1995年拍攝《萬里長情》時結情緣，二人於2004年結為夫妻，2010年誕下囡囡林天若，一家三口樂也融融。二人至今已經結婚15年，為慶祝水晶婚，林文龍送上一大束花畀太太，囡囡天若亦送上一張親手畫嘅卡，真係好Sweet呀！
雖然可盈形容文龍係「不懂浪漫的男人」，但其實文龍除咗花之外仲送埋賀卡，更寫住「Dear my love」；而囡囡都唔弱，喺卡上寫住「Love is Forever! Happy 15 Anniversary! I wish you will be happy always and of course love each other forever. God bless you.」老公同囡囡嘅舉動咁Sweet，可盈一定好開心啦！
郭可盈除咗放上社交網站放閃外，更影咗3隻公仔頭點頭嚟形容佢哋一家三口，真係好貼切！佢仲喺網上留言：「一個『不懂浪漫的男人』今天令我倍感浪漫！謝謝女兒為我們送上的暖暖的祝福！15th Wedding Anniversary」，真係幸福滿瀉呀！
感情曾亮紅燈
雖然林文龍同郭可盈一直都係圈內嘅恩愛夫妻，但其實幸福背後，佢哋呢段婚姻一啲都唔容易。郭可盈屋企做塑膠廠起家，加上當年事業一直喺老公之上，一直被視為「女尊男卑」，不被外界睇好。
另外，林文龍當年一直被傳扮好仔，實質經常偷食，蒲玩多過工作，靠老婆郭可盈養成頭家，結婚多年屢傳婚變。2009年5月被踢爆偷食內地女星董維嘉，被人影咗相之餘重有一段疑似林氏夫婦嘅電話錄音。
當年林文龍不但承認有婚外情，並透露郭可盈已懷孕，當時可盈更選擇信任丈夫，二人經歷風波後，感情自此變得更穩固，戰勝婚外情風波。林文龍早年更靠《不懂撒嬌的女人》以型佬look冧師奶，人氣回升，喺社交網站貼相放閃，大哂同老婆囡囡林天若靚樣，羨煞旁人。
郭可盈林文龍為愛女大灑金錢慶生
郭可盈及林文龍嘅女兒津津早前九歲生日，一向視女兒為掌上明珠嘅可盈同文龍除了一家三口到大阪旅行，更為愛女津津大搞生日派對，以囡囡喜愛的卡通人物L.O.L. Surprise作為主題，邀請成班親朋好友及囡囡的同學們一同慶祝，可盈更於微博上大曬當日嘅熱鬧景況。只見津津着上粉紅色的紗裙，化身成可愛的小公主，可盈及文龍更同愛女一齊切蛋糕，仲齊齊向佢獻吻影相，真係幸福滿瀉！好冧呀！
有家長見到津津的生日佈置後，都認為他們生日會花了不少錢，可盈也回應指單是L.O.L. Surprise的玩具已經不便宜，今次更以此作布置，絕對價值不菲。
其實，在囡囡生日前一日，他們一家三口就已飛到日本大阪遊玩，更暗示「next trip is… …」睇嚟陸續有來，難怪網民們都說津津十分幸福呢！
49歲郭可盈全家齊慶生
就快踏入50歲嘅美魔女郭可盈，之前渡過了最後一個4字頭的生日。11月28日係郭可盈49歲生日，佢喺微博分享咗多張慶生照片，似乎全家總動員為她慶祝生日，連弟媳熊黛林都帶著一對雙胞胎囡囡齊齊出席。美魔女郭可盈49歲生日，佢喺微博分享了兩張與老公林文龍和女兒津津的溫馨自拍合照，並Sweet爆留言：「我要我愛和愛我的人，每年都一起《共同渡過》！」
雖然郭可盈近年已經淡出娛樂圈，亦甚少出席活動，連弟弟郭可頌與熊黛林結婚後話題度都高過佢。不過，《刑事偵緝檔案》中的高婕，《談判專家》中的簡潔，網民對呢位TVB曾經家喻戶曉的當家花旦依然留在不少粉絲心中。而郭可盈劇中女強人的形象與她生活中的形象亦十分貼近。不少網民留言祝福「高婕」生日快樂！
現年49歲的郭可盈無論樣貌，身材都沒有太大變化，難怪一班網民紛紛大讚佢係「凍齡美魔女」！
郭可盈更晒出全家大合照除了老公林文龍同女兒津津之外，連弟弟郭可頌、弟婦熊黛林以及他們一對雙胞胎囡囡孖女Kaylor同Lyvi 都齊齊出席生日會，場面非常熱鬧！而枱面仲擺著三個蛋糕及大壽桃，仲有個巨型發光煎堆同「勁浮誇」拉糖絲超吸睛！
魚唔過塘唔大 無悔當初加盟HKTV
林文龍早年憑《不懂撒嬌的女人》Gordon一角再次彈起，被問到4K實景拍攝有無難處，林文龍 就話對佢影響唔係太大，之前喺HKTV拍咗兩套都係咁嘅模式，再加上佢呢個模式其實接近電影嘅製作，但對其他演員就會有影響，佢哋會好享受全實景嘅製作，如果喺廠拍，閂門唔可以咁大力，開水喉唔好咁用力，因為係搭景，有好多嘢想喺現場做好，但礙於道具唔配合，所以唔可以盡情，另外用電影嘅機、又係4K，燈光所有嘅配合程度係有別於以前。仲有休息時間，分兩隊crew拍，大家每日起碼有八至十個鐘休息，其他演員慣咗廠接外景，覺得係天大嘅恩賜。
九年前離開TVB， 林文龍 記得萬子哥(萬梓良)成日同佢地講：「小朋友，魚唔過塘唔大嘅！」當然好多例子，魚唔過塘都大，但喺出面睇多啲嘢見識廣啲，對每一個人嚟講都有得着。之後加盟HKTV，林文龍就話(加盟)係好新嘅挑戰同嘗試。「我覺得HKTV嘅出現，其實對香港嘅電視圈同普羅觀眾係好好嘅timing，當然最終一籃子嘅關係冇咗，但我會覺得，如果冇HKTV，可能亦冇今日《不》出現，我唔排除會出現，但我相信呢個moment應該未出現，所以我覺得係好事！」
開電影公司唔係為錢
林文龍 談及自己入行多年，一直係屬於中規中矩。「我訓練班出嚟，跑咗兩年龍套，之後好幸運有男配角做，第三年就做主角。唔開心一定有過，問題係自己點tune，比上不足比下有餘，好過我嘅人大把，在我之下嘅人又大把，如果我要喺所謂低潮鑽牛角尖，在我之下啲人係咪要跳落去死晒呢？」林文龍 依家開設左間電影公司，佢坦言，投資嘅錢預咗冇晒。「一間冇知名度嘅公司、演員冇卡士、小弟叫做有啲人認識，但都唔係電影演員，再加上題材唔商業，我能力範圍出丁點綿力去做少少嘢，但相對地能夠喺海外得到咁多獎項，亦都係bonus嘅認同，已經係贏咗。」
「因為我係一個知足嘅人，同埋我係要質素嘅人，我唔鍾意求求其其，為錢做一啲我好唔想做嘅嘢，除非有一日我去到要為五斗米折腰，其實原本上個月有套電視劇搵我，但角色我唔係太鍾意，最終我都冇接，如果我係為錢嘅人，接咗啦，好簡單，大家都心知接一套大陸劇嘅價錢係幾多，一定比喺香港多好多。」 林文龍 回應外界批評佢唔憂做嘅指控。
老婆強勢 習慣忍讓吓
林文龍 同老婆都係artist，有好多嘢都成為一個焦點。提及外間覺得太太比較強勢，林文龍 就話事實上老婆嘅性格係比較strong啲，但佢覺得兩個人喺埋一齊係必須要調節一下。「其實我都好strong，開頭我同佢一齊嘅時間直頭日日都火星撞地球，日日頂撞，撞到好攰，慢慢發覺不如我試吓忍讓吓啦，總要有一個忍讓㗎，問心講，到今日，佢性格上一定係strong過我，咁咪氣度啲，讓吓囉，就係因為咁，所以好多外面嘅人，包括傳媒嘅報道都會覺得個女仔好strong，個男仔就忍、就佢，就會將個主導位擺咗喺佢度，但對唔住，我唔會為咗呢啲嘢澄清，因為呢個係我同佢兩個人嘅相處，我唔需要同其他人交代。」
享受三人世界
林文龍 同老婆04年結婚，未生個女前，基本上日日都係二人世界，甚至乎有幾年大家係夾好晒啲時間，老婆拍劇，佢又拍，一拍完，去旅行，所以嗰幾年每一年都去兩、三次旅行，「我相信我同佢嘅二人世界時間係比一般嘅人都多，到個女出世，我哋好享受三個人嘅生活，由個女出世到今日，我哋每一次去旅行都係三個人。」
屋企化身為嚴父
林文龍 好錫個女，但係喺屋企就化身為嚴父。「嚴嘅意思唔係惡，係我哋會百分之一萬錫佢，做所有嘢都係為佢好，但我成日都同個女講幸福唔係必然，你今日有四餸一湯都好，唔好浪費，好多人冇飯食㗎！咁多玩具，有啲太舊或者唔啱你玩，捐出去，唔好樣樣都『我要呀、我唔捨得！』人係需要感恩同知足，呢個訊息我覺得絕對要由細培養到大。」
佢就話佢同可盈係屋企個陣，個組合好得意，老婆同個女玩到好癲、好開心，但佢要鬧佢嘅時候，可以鬧到好大聲、好惡，至於 林文龍自己就唔係嘅， 林文龍 話佢從來唔鬧個女，又唔會好似可盈咁同佢玩到咁癲，所以個組合其實係有別於一般嘅父母。
囡囡有演藝潛質
有時囡囡放長假，可盈都會比自己嘅戲比囡囡睇，但係之前重播嘅《創世紀》就無比佢睇，始終太夜。 林文龍 覺得囡囡絕對有演藝潛質，好有talent。「但老實講，首先必需要讀好書先，將來嘅路，我作為爸爸一定會分析畀佢聽，事實上，成個娛樂圈係變緊，演員同傳媒嘅關係亦都係變緊，個互信亦都係變緊，以前我哋嗰代同好多記者朋友真係做到朋友，係可以出嚟食飯，屋企電話都畀埋、好交心，但今時今日已經變晒質。」
後悔遲生 無打算追多個
被問到有無打算追多個小朋友，林文龍 就話後悔太遲生，「如果我早啲生，我相信應該會有第二、第三個，因為我其實係好鍾意小朋友嘅人，但係因為我太上心嘅關係，我確實未必騰到咁多精力、時間去照顧佢。依家個社會好多新嘅病毒，我記得好幾年前，個囡病，突然高燒、退燒、又高燒，我嗰時拍緊嘢，凌晨兩、三點先收工，第朝要開六點，我返到屋企係冇瞓過覺，一路幫佢探熱，攞濕毛巾抹臉、風扇吹佢，其實個體力透支係好大，畢竟我唔係廿幾、三十歲，唔係我捱唔到，但我唔可以因為我個囡病，而影響到我第二日嘅精神狀態，咁係對我份工作唔fair，所以我寧願將我剩低落嚟嘅時間、focus擺晒喺我個囡度。」
無夜生活 唔煙少酒
林文龍 嘅外表Keep 得非常好。佢就話自己其實無咩點Keep，「首先我係冇夜生活嘅人，煙我從來唔掂，酒我係應酬先飲，平時唔會飲，你從來唔會見到我喺夜場出現，我唔使開工嘅時間就做運動，咩運動我都啱，同埋我係好鍾意飲水嘅人，我嘅生活就係咁。」
