豪賞妻女買千萬基金 陳展鵬甘願被榨乾

單文柔識得計數，買基金與保險作為日後保障，從此一身妻女債的陳展鵬，現時要供樓、搵奶粉錢、養老婆、阿媽阿爸，賺少個崩都唔掂，不過被榨乾都係心甘情願同享受嘅。

撰文：東方新地 圖片：新傳媒圖片

陳展鵬甘願被榨乾

拍拖不足兩年，陳展鵬與單文柔去年成婚不久即報喜有B，有指預產期在今個月底，已變緊張大師的陳展鵬，為迎接女兒來臨做足準備，不過他顧大亦顧細，對老婆單文柔更加呵護備至，除了懷孕期內監管老婆的飲食，就連產後坐月的細節他都知得一清二楚。陳展鵬與單文柔早前已為BB舉行Baby Shower宣布陀女，而女兒的英文名將會是二人的英文名Phoebe及Ruco之間的Q字開頭，不過他們要賣關子，暫且叫囡囡做Baby Q，而中文名則在女兒出世後配合時辰八字才 搵高人去改。

當日單文柔身穿寶藍色連身裙，與好姊妹劉穎鏇合照時，因谷奶而升cup的上圍非常顯眼。陳展鵬仲笑言囡囡畀前來到賀的一眾港姐摸過，大個可能都會美貌與智慧並重。

準備入產房陪產

陳展鵬早前表示單文柔仍未決定想順產定開刀，雖然已知預產期，但單文柔陀B已足月，醫生話隨時生得，而正在為趕拍劇集《唐人街》的陳展鵬，亦早已向監製及劇組請定假，一收到老婆作動的電話就會放低工作跑去醫院陪產，第一次做爸爸的陳展鵬絕對不容有失，要為Baby Q親手剪臍帶。至於初為人母的單文柔產前亦非常忙碌，繼早前被影到約外傭中介簽文件外，亦早已為Baby Q買定保險與基金。

日前單文柔現身又一城，已懷孕八個多月的她行得好輕盈，一啲水腫都冇，邊飲果汁邊行街，左手上的鑽石戒指好耀眼。

升Cup急買底

因為懷孕令身材升cup，單文柔要定期買過晒啲內衣及內褲，只見她望住性感內衣雙眼發光，唔知有冇合適佢嘅size呢？

據知情者透露，「其實由結婚一刻開始，幾乎所有決策上嘅嘢都係由Phoebe（單文柔）去搞，煎Pang覺得Phoebe比實際年齡成熟，依家女都有埋，就更加放心交財政大權畀佢，而且女人始終心思縝密啲，揀陪月同工人姐姐都係Phoebe決定，因為幫手湊B日對夜對，最緊要老婆滿意。煎Pang呢排忙拍劇，成日唔錫身拍打戲，之前仲搞到手指受傷，雖然本身都有買保險，但Phoebe覺得依家有小朋友，責任大咗唔同以前，以前買落嗰啲保額未必足夠，所以搵咗個信得過嘅保險經紀再買多幾份保障全家，另外佢 仲幫Baby Q買定教育基金，依家開始供大約廿年，到佢大個咗就有筆錢去外國讀書，Phoebe諗嘢好長遠，雖然保險加基金加埋過千萬保額，個個月都要供多好多錢，十萬八萬唔少得，但呢啲終身保障真係唔慳得，煎Pang都好贊成。」

對內衣甚有研究及要求的單文柔，睇啱一條肉色底底即摸上手，同行的化妝師好友亦有畀意見。

買完內衣準備走人，單文柔先打個電話同老公陳展鵬報告行蹤，其時可能肚皮痕癢，見她頻頻用手𢱑痕。

為陳家開枝散葉

嫁給陳展鵬後的單文柔，由寂寂無聞的落選港姐變成視帝背後的女人，據知陳展鵬有意將單文柔私有化，專心為陳家開枝散葉，搵奶粉錢養家就由陳展鵬一力承擔，即使被妻女榨乾，都是幸福的負擔。 其實為了成家立室，陳展鵬近年花費不少，除了花過百萬搞海陸婚禮外，早於17年，他一擲1,280萬港元在將軍澳買入晉海一個高層的三房海景單位築愛巢，計劃與去年中風後不良於行的母親同住，方便照顧之餘更讓母親可以弄孫為樂。知情者透露，「煎Pang真係一個極之孝順嘅乖仔，去年睇住媽咪中風後 健康同精神都急轉直下，因為行動已經唔方便，要坐輪椅同埋講嘢都有影響，煎Pang情緒跌落谷底，不過佢依然成日車出車入同媽咪去睇醫生做物理治療。因為陳媽媽一直好想睇到個仔結婚，煎Pang好想媽咪開心同安心，所以同Phoebe拍拖冇耐即講明以結婚生仔為大前提，極速有咗嗱嗱聲搞婚禮，新屋都係寫佢媽咪個名，打算收樓後一齊住，而 Phoebe亦唔介意，佢覺得屋企有老人家都係好事，可以三代同堂。」愛屋及烏，又肯配合陳展鵬的所有計劃，難怪單文柔深得老公心，陳展鵬錫到老婆燶。

1,280萬買愛巢

陳展鵬以母親名義買入的將軍澳晉海高層向海三房單位，將於今年底入伙，據知陳展鵬希望與母同住，但若然繼續生B，睇嚟要繼續努力搵錢再買大屋。

婚後的陳展鵬變成愛妻號，早前他與單文柔及愛犬包包影了一輯靚相，表示等囡囡出世後，便會變成一家四口。

三個願望當獎勵

早前陳展鵬公開被問及單文柔產後會否做「全職媽媽」？他表示沒所謂，即使老婆想繼續工作，都不可以太辛苦，更向單文柔發表愛的宣言：「冇一樣嘢能夠代替太太喺我心目中嘅地位，尤其係睇到佢陀B真係好辛苦，付出好多，所以冇嘢能動搖到我對她嘅愛，只會加，無減。」有事業有家庭的陳展鵬自覺人生美滿，他表示早已送上三個願望獎勵太太：「一個是『小豬比』，另一個是情人節禮物，再加埋度 蜜月，遲啲帶佢兩個去旅行，呢三個願望都夠晒啦！」對於再追仔，陳展鵬笑言男女不拘，看來生完Baby Q，等單文柔身體狀況回復，陳展鵬可以學陳豪陳茵媺四年抱三。

2017年3月被影到在山頂夜會，陳展鵬與單文柔最初唔認拍拖，半年後才承認戀情並愈愛愈高調，甚至在節目上互餵。去年10月突然結婚，當時已升cup的單文柔否認有喜，不過婚後一個月即宣布陀B，B女將於今個月出世，陳展鵬結婚生B半年內極速搞掂，好有效率。

有老公呵護備至的單文柔，在懷孕期間仍事事親力親為，未有翹埋雙手做皇后，對於辛勞拍劇搵錢的陳展鵬，她時刻提醒自己要做個稱職的老婆，早前曾在訪問中表示她屬浪漫主義者，喜歡在節日花心思為另一半炮製驚喜。婚前曾被本刊記者影到去挑選性感喱士bra及真絲褻衣的單文柔，看來增加閨房生活樂趣，也就是為陳展鵬製造的浪漫驚喜之一。

學定湊B

陳展鵬揚言看到老婆陀B非常辛苦，所以早前 趁未開劇，上堂學湊B學換尿片，準備就緒等囡囡出世後分擔單文柔的工作。

婚前褻衣誘惑

單文柔喜歡為陳展鵬製造浪漫，婚前曾被本刊記者影到去內衣店揀性感褻衣， 她對黑色真絲喱士吊帶特別有興趣。

鍾情性感內衣

日前腹大便便的單文柔，與化妝師好友閒逛九龍塘又一城商場，入到名牌內衣店，單文柔即雙眼發光，見她對手感柔軟的絲質性感內衣褲最感 興趣，不時摸上手，最後當然不會空手而去，看來大肚期間所穿的內衣及內褲都因谷奶升cup及下圍膨脹而變加大碼，單文柔要在卸貨前買定靚靚內衣，坐好月調理好身體，再穿上性感戰衣出擊。28歲的單文柔今胎陀女冇走樣，將近臨盆仍然手腳纖瘦冇水腫，狀態咁好，睇嚟產後亦好快修身，得天獨厚生多幾個都唔成問題。

高調冧老公

單文柔亦在IG出言冧老公，讚揚陳展鵬為頭家辛苦工作，而她亦會盡自己本份做個好老婆、好媽媽及好情人。

廿四孝暖男

陳展鵬愛妻亦愛母，雖然工作忙，但他仍不時堅持做司機車母親去覆診及做物理治療，而早前更帶單文柔外出食飯慶祝白色情人節，等囡囡出世，又多個前世情人要照顧。

Baby Q踢阿媽

陀住個重十幾廿磅的巨肚行街都咪話唔辛苦，雖然單文柔仲活動自如，但她亦在IG內留言表示肚內的Baby Q非常活潑，成日郁唔停，單文柔笑言想抖吓都唔得。

正在拍攝新劇《唐人街》的陳展鵬 ，與習武之人伍允龍在劇中由頭打到尾，據知此劇的打鬥場面史無前例之多，陳展鵬都嗌晒救命。

陳展鵬在劇中以真功夫示人，日前拍攝劈竹棚場口時差點被扑中頭，當導演嗌Roll機，陳展鵬一手劈落堆竹棚度，但竹枝又粗又硬，掃落時更有一支差 點扑中他的頭，對住鏡頭扮型扮chok的他，鏡頭後痛到面容扭曲即狂揈手。

傷手指老婆心痛

陳展鵬最終傷及手指，他在IGpo相笑說：「好彩擋得住！擋唔到又要縫幾針。」 但單文柔就相當心痛，並留言：「你小心啲可以嗎？」傷在老公身，痛在老婆心。

打到去《唐人街》

陳展鵬正趕拍的新劇《唐人街》，有指是繼《城寨英雄》和 《同盟》的第三輯，監製一樣是文偉鴻，演員班底大致上一樣，唯獨是少了女主角胡定欣。2017年《城寨英雄》收視強勁，令胡定欣與陳展鵬成為熒幕情侶，今次女主角換上唐詩詠，故事講述華人在泰國曼谷的奮鬥史，以曼谷唐人街作為背景，各男女主角在開拍前都要學武操肌做好準備，以應付連場打戲，而製作費比《同盟》還要龐大，是一部懷舊動作溫情懸疑電視劇。

劇中除了男主角打到飛起，唐詩詠、王君馨及姚子羚都要在開劇前跟武指學打，但最估唔到係全劇最好打竟是唐詩詠。

《唐人街》由陳展鵬、唐詩詠、陳山聰、姚子羚、王君馨、伍允龍及元秋領 銜主演，此劇為2019無綫節目巡禮14部劇集之一，被喻為今年的重頭劇。

陳展鵬在劇中飾演步青雲，唔止個名跟足，髮型仲抄足步驚雲。