【安心戀】被黃心穎背叛 馬國明首度開腔回應
撰文：Kammy｜圖片來源：Instagram，Facebook
馬國明首度開腔回應 Man爆護女友
馬國明表示：「其實呢件事我知道後，好快已經冇咗嬲嘅感覺，我係好平靜，同埋我係好快變成擔心，我係好擔心呢件事牽涉喺入面嘅所有人，任何人受到傷害都唔好。我唯一可以係代佢（黃心穎）講少少嘢，其實佢知自己做錯咗，我亦知道其實佢好想出嚟同大家講嘢，但公司可能驚佢情緒唔穩定，會講錯嘢，所以就冇安排佢出嚟同大家講。我知道佢啱啱出咗IG，佢要講都講咗。我只可以話其實佢仲好年輕，未來仲有好多路要行，我希望大家畀個空間佢。」
馬國明：唔使擔心我
馬國明表示：「至於我呢，大家亦唔使擔心我，我嚟近會繼續好專心我嘅工作，我會繼續拍好我嘅戲，因為其實我仲係開緊工，我唔希望影響呢套戲嘅進度。其實安仔（許志安）都講咗嘢，我亦都唔會發表任何意見，我覺得呢個世界冇人有資格可以發言，除咗安仔太太（鄭秀文）外，大家都係冇資格去發言。所以，我希望呢件事可以盡快平息。」
強調唔好騷擾家人
琴日無綫電視派記者去訪問馬國明媽媽，令唔少人嘩然。呢個時候，馬國明亦有啲怒火出嚟，佢表示：「最後我想交代，有媒體會訪問我屋企人，我希望大家高抬貴手，因為佢哋唔係圈內嘅人，你知記者朋友嘅技巧好高，好識引導人哋去攞想要嘅答案，咁我媽媽突然有咁多支咪畀佢，佢係會驚嘅，佢可能會講錯嘢，希望大家唔好將我媽媽嘅說話喺度放大，我亦都唔會就佢講嘅嘢作回應，我只希望大家唔好嚇親我屋企人。」
希望事件盡快平息
最後，馬國明再表示：「我會專心做好自己嘅嘢，希望大家高抬貴手，唔好將件事再發酵令到更多人受傷，因為我相信呢件事已經令到好多人受傷害，希望呢件事盡快平息，盡快過去咗就算。」
未回應有否分手
訪問去到尾聲，傳媒問佢現時同黃心穎係咩關係，有冇分手，馬國明雙手合十表示：「我冇咩講㗎喇，多謝關心，多謝大家關心。」態度相當大方。
黃心穎IG親自回應：我無法面對自己
「安心偷食」事件發生一日，許志安昨晚7時親自接見傳媒，承認自己的過失，惟女主角黃心穎潛水一日，今日終於親自在IG回應事件。黃心穎今日在IG留言：「對不起，我做錯了。是我做了非常錯誤、難以令人原諒的事，感到十分羞愧、歉疚。我在此向所有受事件影響及受到傷害的人誠心由衷道歉。犯下如此嚴重的過錯，我無法面對自己，也不知道怎樣去面對家人、馬明、朋友、公司、同事…… 不敢奢求大家的原諒，只懇求大家能給予所有受牽連的人一點空間。我認真反省自己的過失, 接受懲罰承擔後果。再一次，對不起大家。」
黃心穎：對唔住馬國明
「安心偷食」一事，震驚一眾全香港人。呢日，無綫高層樂易玲向傳媒代黃心穎交代事件，樂小姐表示：「琴日（16日）好多記者搵我，我話想沉澱一下點去處理呢件事，同公司及同事商量點去回應。琴晚同黃心穎傾咗好耐，佢好後悔好後悔，知道自己犯咗好大嘅錯。佢好對唔住受牽連嘅人，特別係父母及家人，對唔住公司，對唔住馬國明同佢嘅屋企人。呢一刻情緒仍然未平復，公司覺得佢需要休息一段時間嘅。」
馬國明如常工作
另外，至於馬國明方面，樂易玲則表示佢OK，大家唔使擔心佢：「馬明佢好乖，佢自己要求繼續開工，叫大家唔使遷就佢，所以佢今晚會繼續如常開工拍攝《降魔的II》外景。」
許志安、黃心穎偷食斷正
該段短片長約16分鐘，片段開首見到安仔、黃心穎和男友人坐在車廂後座，男友人堅持先送黃心穎返家，戴了黑色口罩的黃心穎竟爆粗反對：「唔好扮嘢啦！X你！兜X咗我先？」安仔都撐黃心穎先送男友人返屋企，冧爆的黃心穎搣了安仔耳朵一下，再向男友人爆粗：「你住邊呀？X你！」安仔即叫司機開車往大坑，黃心穎跟男友人說：「佢（安仔）送我返去呀。」
黃心穎主動蹺實安仔左臂整個人挨在他身上撒嬌，兩人更各用手袋遮掩偷玩十指緊扣。約3分鐘後男友人抵家預備落車，安仔話：「而家你走先，跟住我返我屋企，佢（黃心穎）返佢屋企。」男友人：「你講堅？」安仔：「係，堅。」惟當男友人落車後，安仔和黃心穎異口同聲跟司機說：「鯉魚門（黃心穎屋企)！」和安仔獨處時心穎馬上隔住口罩咀了安仔一啖，10秒後索性除口罩埋身攬安仔啜嘴。
咀完後，兩人繼續十指緊扣，之後隱約聽到黃心穎說：「so sad…我好悶…教徒」跟住拉開安仔隻手不再緊拖，安仔惟有順勢將手貼在黃心穎大腿上，3秒後忍唔住又撩黃心穎十指緊扣。由大坑到鯉魚門短短10多分鐘車程，「安心」連環激咀逾20次，全程由黃心穎採取「主攻」情挑安仔，不停攬他狂打茄輪，其中一次纏綿遊戲錫了近1分鐘，咀到啜啜聲，熱情如火的黃心穎邊咀邊將手放在安仔腿部附近游走。
當車輛駛入隧道後，黃心穎再次飛擒大咬狂咀安仔，咀完後忘形到連口罩都戴歪了，其間隱約聽到黃心穎說：「…返屋企，唔好驚喎！」就算在「休戰」空檔，黃心穎都「電兔」上身胸壓安仔，捉安仔隻手又捽又玩手指，甚至當安仔是攬枕，將左腳騎在他的身上，啜面錫耳，還用手指幫安仔抹走嘴上的唇膏，風騷入骨。
安仔忘記了自己的人夫身份，雖然9成時間都是黃心穎「主攻」，但安仔卻表現受落，還主動錫了黃心穎面珠一啖，更越坐越低，似乎擔心被隔鄰車輛發現，而黃心穎相當識做，咀完就戴口罩遮樣，又不停幫安仔拉下cap帽遮掩。雖然，當晚黃心穎表現看似有點醉意，更不時「鬼妹仔」上身大講英文，但差不多抵達目的地時，本來嗲聲嗲氣跟安仔說話的她，竟忽然轉tone跟司機說：「去到燈位轉右，唔該！」。而安仔有點疲態但未覺有醉意。兩人到黃心穎香閨後齊齊落車，後事如何佢哋最清楚！
