幼稚園面試孩子緊張在所難免 表現「失常」有3法 家長即場應對 減失分
幼稚園面試 小朋友3大「失常」情況
一、突然喊起來
最令我為家長感到尷尬，就是小朋友在面試時失驚無神大喊起來，在這電光火石的一刹那，我應點辦？有些家長以不變在萬變，任由小朋友喊，希望他「生生性性」喊一陣便收聲。但這方法無效，因小朋友多會繼續喊，直到校長忍唔住叫家長帶子女離開。又有些家長會間子女是否不舒服，那裏不舒服，這方法亦無用，因大部分不會突然生病，就算有，校長也會建議家長帶孩子返家休息，下年再見！
小朋友突然喊，最有可能是以下三個原因：
1. 小朋友唔適應這間幼稚園環境
2. 小朋友唔習慣陌生人，或者唔鐘意見嚴肅的校長
3. 小朋友突然想起一件剛才令他痛苦的事
第一及第二個原因，都表示家長在事前沒有給子女適當的面試「熱身」準備，所以唯一可做的便是問孩子：「係唔係剛才跌倒在地上仍然痛，所以喊？」「係唔係剛才排隊被人撞到唔舒服，所以喊？」只要孩子「合作」，答「係！」再不繼續喊，便「一天光哂」了！
二、突然O嘴
另一個使家長無助兼無奈的，是小朋友突然唔肯出聲，無論校長怎樣問，他都是呆若木雞那樣，閉口無言。
跟校長説，小朋友突然有情緒可以嗎？冇用，因幼稚園唔會收突然有情緒學生的。
跟校長説，佢偶然會發脾氣的！冇用，誰會知佢幾時發完脾氣！
跟校長說，小朋友當日身體有啲唔舒服，所以唔出聲？亦冇用，因為家長應該使孩子以最佳狀態來考試的。
我建議家長用以下這方法：家長在平時用手機，錄定一輯子女在家和你做「模擬面試」的片段，在孩子面試O嘴時，拿出手機播給校長看，讓校長知道孩子平時是冇問題的。在播放的時候，孩子可能在看到自己在手機的表現，開始出聲，願意參加面試，只要他肯開「金口」，便可以繼續面試。
三、不小心碰跌考具
在面試過程中，小朋友不小心突然把枱上Lego或積木不小心碰跌，像仙女散花滿地都係。記得預先訓練孩子，如果不小心做錯了，要立刻道歉，説：「校長/老師，對唔住，我碰跌了枱上的Lego或砌圖。」説完要自己一件一件執起，又或者，如果老師答：「冇緊要，等我執啦！」孩子便要答：「唔該老師！」。
家長千萬別以為面試會一帆風順，據我所知，有些小朋友非常「論盡」，不是碰跌這樣，便碰跌那樣，所以，一早教定孩子說「對唔住」、「唔該」、「多謝」便有備無患！如果家長唔教定孩子道歉，他便可能會「突然喊起來」、「突然O嘴」，問你怕未！
教識家長應付小朋友面試突然失常，3招子女便能正常發揮他的才能。容易被心儀幼稚園取錄。
