法證先鋒5｜鄭俊弘橫跨16年撈極唔起被洪永城改4字花名超尷尬

Nov 23 2022

無綫的法證系列向來受歡迎，2022年《法證先鋒5》主要演員有黃宗澤、偉豪、蔡思貝、洪永城等、還有2006年第一輯已經存在的鄭俊弘。由23歲拍到39歲，鄭俊弘花了16年時間由「技術員」升職為「鑑證主任」，不過對白量都係咁上下。在宣傳記者會上，鄭俊弘當眾被洪永城奚落引發全場大笑，身處現場的鄭俊弘只能「老尷」以笑遮醜。

法證先鋒5 鄭俊弘 — 鄭俊弘做到《法證先鋒5》，同上輯一樣，職位都係鑑證主任。雖然仍是閒角，但有幸是可以唱到《法證先鋒V》主題曲《天不會錯》，不過2023年開拍《法證先鋒6 倖存者的救贖》，鄭就無份再參與，因為他的角色在第5輯已經身亡。（圖片來源：IG@fredcheng83）

鄭俊弘橫跨16年得一輯冇份

2022年，《法證先鋒5》首播時舉行記者會，劇中多位主位演員黃宗澤、袁偉豪、蔡思貝、洪永城、蔡潔、王敏奕和鄭俊弘被安排一齊接受《東張西望》訪問，當中原來只有鄭俊弘是舊人，由2006年第一輯已有份參演，橫跨16年經歷五輯《法證》，只有《法證先鋒3》冇佢份。

洪永城語帶輕佻笑鄭俊弘由大師兄進化成「祖先」

問到尾聲時主持突然問大家有冇叫鄭俊弘做「大師兄」，黃宗澤即笑說：「佢(鄭俊弘)唔係大師兄，佢(鄭俊弘)直情係前輩。」而另一邊的洪永城即起哄說：「唔係祖先咩？」坐在一旁一直冇份發言的鄭俊弘先是耷低頭，顯得非常尷尬，被揶揄撈足咁年係前輩，全程只能以笑遮醜。

鄭俊弘14年客串王祖藍《老表，你好hea！》被寸「乜水」

拍劇撈極唔起角色對白仲愈來愈削的鄭俊弘，其實8年前曾以真名客串《老表，你好hea！》，劇中一幕講述他上門搵王菀之，開門的鍾景輝笑指佢個樣咁奸是鄭子誠，而郭晉安就話唔知佢係乜水。39歲的鄭俊弘入行多年經歷都唔少，當年Hurt完一個又一個，最後娶何雁詩成為6億女婿，已經夠傳奇，雖然撈極都係閒角，但觀眾依家起碼都噏得出佢個名啩！

第一輯（2006年）演女一蒙嘉慧細佬

鄭俊弘被封「法證祖先」不無道理，他23歲(2006年)時參演第一輯《法證先鋒》，飾演蒙嘉慧細佬(梁小剛)，由法證技術員做起，身為女主角細佬，屋企戲點都會有佢份，keep住有得出鏡同有對白，到第二輯(08年)都係承接故事繼續演梁小剛。

升咗職但end game

到《法證先鋒IV》(20年)鄭俊弘升LV.做科學鑑證主任，角色名亦改為湛霆，仲有朱晨麗做女友，而剛播出最新一輯《法證先鋒V》湛霆這角色亦被保留，劇中是黃宗澤下屬兼徒弟，但不幸地鄭俊弘只出現到第七集，劇情講述因為一次鑑證失誤，他被師傅黃宗澤教訓，自覺好委屈，最後吞食安眠藥自殺身亡。由第一輯演到第五輯，經歷了16個年頭，雖然對白依然不多最後仲死埋，但咁多年都仲有份演，監製總算待他不薄。