《愛‧回家》Rebecca被指撞樣港姐冠軍 49歲沈可欣現身回應！

《愛‧回家》49歲Rebecca被指撞樣港姐冠軍

最近網民熱烈討論新一屆港姐冠軍倪樂琳與《愛．回家》中的「Rebecca」沈可欣撞樣。沈可欣在接受訪問時笑言，指好多朋友都有發送對比照片給自己，但就笑指大家都太咁抬舉自己；倪樂琳「靚女又後生」，就連自己老公楊證樺都話「唔似」！

沈可欣自爆曾考慮參加港姐

沈可欣坦言當年25歲時也曾想參選港姐，但因為正在攻讀演藝學院的最後一年，且自覺無法勝任穿泳衣上台的挑戰，最終選擇放棄。她自嘲說，應該肥的地方又不肥，覺得自己的身材不符合選美的標準。當被問到有冇後悔沒參選，沈可欣就表示認為一切都是「整定」，自己性格偏向隨緣。

港姐冠軍倪樂琳回應撞樣傳聞

至於港姐冠軍倪樂琳本人亦有在公開活動回應與沈可欣撞樣一事，倪樂琳表示《愛回家》是一套很有口碑的節目，加上可以同演員撞樣，證明自己有做演員的潛質，感到好開心。提到媒體指她在得獎當晚有老態，倪樂琳也有承認自己因為經歷了決賽當晚各個環節，自己也有疲態，重看片段也覺得自己面容太繃緊。

49歲沈可欣演活寂寞中女

現年49歲嘅沈可欣係資深綠葉演員，演出劇集無數，近年喺《愛回家之開心速遞》飾演人事部Rebecca最為人熟悉。喺劇中Rebecca一直單戀保安主任鐵面陳，更對對方展開猛烈追求。

不過，心水清嘅觀眾都可能記得，Rebecca其實早前喺劇中已經消失咗段時間，事關早前沈可欣同老公楊證樺再次「造人」成功懷孕，要放產假休息，喺劇中先有呢個去英國受訓嘅安排！

現實為幸福人妻

同為大台綠葉演員嘅楊證樺同沈可欣2015年結婚，二人一直恩愛，並育有2位小朋友，一家四口十分幸福。其實楊證樺同沈可欣早已認識十多年，但真正走埋一齊就只是近幾年嘅事。

兩人合作拍劇無數，但從來唔過電，直至幾年前timing到，兩人恰巧搬到附近居住，約食飯多見面後終於走埋一齊，對於戀情十分低調，唔少藝員同事更直至佢哋結婚才得悉，仲以為佢哋係拍緊戲添！沈可欣曾表示：「嗰日有其他同事嚟觀禮，即刻將啲相擺上facebook，有同事睇到就問拍緊咩劇？我話係真㗎！之前有人問咪講拍緊拖，冇人問就唔會講囉。」

夫妻檔拍住上

楊證樺同沈可欣喺TVB默默耕耘多年，一直安於自己位置，因為佢哋明白每套劇集都係team work，要有主角、配角同綠葉先可以成就一套劇集，正如每個家庭都會分工合作，每人都有自己崗位。楊證樺笑言大仔係佢嘅是福星，因為自大仔出世後，兩人獲得更多演出機會，甚至一齊做夫妻角色，「監製一諗起要搵人做夫妻，就會諗起我哋。」

早前無綫劇《踩過界》成為城中熱話，「盲俠大狀」王浩信固然獲得好評，但在其中一單元「疏忽照顧兒童案」中，飾演聾啞夫婦嘅楊證樺同沈可欣獲網民大讚演技出色，大家更信唔到兩人喺現實中亦係夫妻！無論戲份多少，兩人對每個角色都十分認真，經常一邊湊仔一邊刨劇本。

楊證樺沈可欣細仔出世

去年12月10號楊證樺、沈可欣嘅細仔出世啦，佢哋選擇喺公立醫院生BB，佢哋特別出POST鳴謝醫護人員照顧，阿Man細仔重3.27KG，都算係大碼BB，佢又透露有全程陪產同親手剪臍帶，問到會唔會追多個囡囡，佢話未必會，因為怕太太陀B辛苦，而且見到太太生B好痛佢都好心痛，所以暫時兩個都夠曬數。

感恩喜獲第二胎

早前楊證樺喺個人社交網公佈喜訊，表示佢哋一家三口將會增添一個新成員，變成一家四口！佢更留言指感謝上天嘅安排，呢個BB係佢哋嘅第二份禮物。

楊證樺留言後，亦同時Po出一張BB嘅超聲波相，唔少網友知道呢個好消息，都戥佢哋高興，紛紛留言送上祝福！

楊證樺沈可欣曬靚靚孕照

雖然已經係第二胎，但係可欣都係第一次影大肚相。本來陀大仔宏志嗰陣，就已經約好日子影相，點知大仔衝閘，提早出世，所以最後就影唔到，當時可欣都好失望架，仲喺產房喊咗出嚟！

出爐港姐冠軍倪樂琳被批老相

2號倪樂琳Ellyn雖然捧走冠軍寶座，但就被網民紛紛留言狠批唔上鏡兼老相。有網民就嫌倪樂琳眼袋太大、牙齒太奇怪又大細眼，亦有網民認為亞軍梁嘉莹和季軍楊梓瑤更加上鏡：「似盧淑儀多過似李嘉欣」「咁容易就冠軍，點解我十幾歲唔去參加」「肉酸到。又老。睇到吓死人」「這屆冠軍港姐真啲不漂亮，明白她分數畧高，反為季軍樣貌比較漂亮」「敗筆係啲牙到，冠、季啲牙整整先」等。

獲封為「翻版李嘉欣」 網民：究竟邊忽似?

倪樂琳從入圍後一直獲封為「翻版李嘉欣」，但網民就認為倪樂琳同有「最美港姐」之稱的李嘉欣一啲都唔似，指佢同另一港姐盧淑儀似樣啲：「李嘉欣大佢30年都好過佢」「李嘉欣應該會嬲左」「點解影到好似32歲咁？ 一點也不似李嘉欣啊！似盧淑儀多啲！」「簡直侮辱緊李嘉欣」等。

倪樂琳泳裝問答以「愛回家」作為颱風命名

泳裝問答以「愛回家」作為颱風命名，轉數快表示「打風當然要返屋企」，深得台下珍姐喜愛，皆因TVB在早前受惠於颱風魔羯，《愛回家》創下年度高收視，說中了高層心聲，不過懷疑因為泳裝環節心口現汗斑，作為首個答題佳麗只得到18分的低分，令人大跌眼鏡。