【親子好去處】澳門 狂歡雪地嘉年華 Amazing Snow in Asia @澳門威尼斯人 Venetian Macao

買咗成人及小童門票的可以於開放期間任何一日任何時間進場，每位進場包括8個金幣，可以用嚟玩場內遊戲。我專登揀咗夜晚臨完場前去，因為我知道佢哋一定會玩到成身雪濕哂，所以玩完就可以番酒店沖個靚涼

去到展覽廳E館，佢哋兩個已經興奮到不得了想快D入場玩雪，叫佢哋先喺呢個展板影張相都難過登天

在場外售票處帶上手帶後，就可以進場。

先喺招牌影相位影影相!

姚明咁高的北極熊，佢哋兩個坐埋去即刻變咗小矮人! 場地唔算太凍，唔駛包到成隻糭咁! 不過記住要帶番對手套，因為落場玩雪既時侯，對手抓起D雪既時侯都幾凍!

場內有許多攤位遊戲及小食攤檔

場內主題遊戲總共有4個，最抵玩算係呢個「浪漫雪園」，只需5個金幣就可以玩20分鐘，我哋目標非常清晰，打算在這裡玩2個Round

呢個「狂歡滑雪道」(8個金幣)，只係著起雪橇在滑雪道上行大概5分鐘，小小斜坡來得似平地一樣，沿住直路行兩轉就玩完，點睇都唔係太抵玩!

因為其他遊戲都不太適合他倆，而且收費都頗貴! 好似呢個「極速真雪滑梯」要18個金幣(即$180)，如果我哋4個人湊起所有金幣(32個)，差唔多用咗大半先可以俾一個人去玩!

其實之前睇《新假期》見到個「極速真雪滑梯」係咁既樣…真係嚇死!

仲有1.2米以下都唔俾玩, 所以我哋就放棄呢個遊戲!其實睇落真係好斜，我目測傾斜度有45咁勁

我見住呢個小妹妹瀡落嚟時，真係成個頭向後Chok一Chok，我覺得衝力太勁有一定危險，尤其係哥哥呢種百厭古怪的小朋友，我估佢瀡落嚟一定成個人反轉咗頭落先! 所以都係睇人玩算，希望下年有機會再攪會收費平D

呢個「VR滑翔傘」(18個金幣) 這些機會…太貴了太貴了，再者又係大人既遊戲，小朋友冇機會玩，所以我哋又係睇吓人玩就算數!

我哋去到「浪漫雪園」排隊入場啦! 每一節20分鐘，我哋剛去到時才開始新一節，所以我哋足足等咗15-20分鐘先可以入場，大家先按自己Size著起膠雪橇

職員哥哥一開閘放人入場，兩個第一時間就跑到冰屋玩

每個家庭只可以拎一個膠雪鏟，兩個不停鏟雪互掉! 掉到媽咪成身雪

仲有起初以為會玩到對鞋都濕up住對腳, 原來又唔會喎! 呢個真係神奇雪撬

「浪漫雪園」內有多隻北極熊同企鵝可以俾人Selfie!

右手邊有個展板，板上有多個分數洞可以俾小朋友自製雪球比賽!

場中間有個小型噴雪機，俾大家體驗一下漫天飛雪既感受!

呢個哥哥一路就留喺呢個位都等噴雪機噴到自己成身濕哂! (一切都在掌握之中)

所以我安排喺臨瞓之前先嚟玩係絕對冇錯! 最後哥哥真係成身濕哂, 成個背脊都係冰

平時好少讚自己，但係呢張相真係影過都未必影到, 灑出嚟既雪仲好似個心形添呀

再嚟多個唔同效果! 好在我部相機避得快

見到佢哋咁開心真係希望可以快D搵一年放假可以去滑雪玩吓

芊芊都係玩得斯文D

會場內有幾個聖誕樹造型既咕o臣可以俾小朋友爬上最高雪山坡坐住瀡落嚟!

嗱嗱嗱! 入哂雪啦, 成身都係…

之後媽咪要同哥哥出番去換件衫再入嚟作戰! 20分鐘好快過，跟住我哋再繼續玩多一轉! 可能係最後一轉就關閉，第二轉好似玩咗成大半個鐘咁!

最後呢Round冇咩人，佢哋可以一人拎一個膠雪鏟。兩個開始雪戰起上嚟! 當然妹妹唔夠哥哥快啦，好慘一路被攻擊

真係玩到好盡興，大家濕哂身咁番去酒店房沖番個靚涼休息lu!

Photo byCANON 5D Mark IV,Len|EF 24-70mm f2.8L II USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分:10分

呀劍評語:冇得玩真雪，呢個雪地嘉年華可以頂住檔先! 最抵玩係「浪漫雪園」5個金幣就玩20分鐘，小朋友自由自在鍾意點玩都得! 加埋最後個節延長咗差唔多玩咗45分鐘! 真係爽爽爽，不過希望如果佢下年再舉辦的話，遊戲種類可以多番少少適合小朋友啦同埋唔好貴到咁! 18個金幣($180)瀡落嚟3秒都冇…點玩得起呀!

狂歡雪地嘉年華 Amazing Snow Asia簡介

這是東南亞有史以來第一個真雪盛事,引入歐洲的技術和最有經驗的真雪體驗活動團隊,“狂歡雪地嘉年 華”是一個貫穿四季真雪體驗活動。 各式精彩的活動包括亞洲最大的真雪活動雪園,越野滑雪區,快速 滑雪管區,冰雪嘉年華互動遊戲專區,真雪 VR 遊戲區,VR 北極光區和照片拍攝區。 我們更邀請到日本其中最有影響力和才華的設計師 Shin Tanaka 負責主理有關吉祥物創作。 A.S.I.A. 將會是今個聖誕節和新年最好玩,最精彩,最難忘的活動! 年青的你與另一半,一家大小的也絕 對不容錯過。

地址

澳門威尼斯人 – 金光會展E館

開放日期及時間

2017/01/31 -2017/02/1411:00-22:00(門票任何一天都可進場) (已完結)

入場費

$999(全日貴賓)；1) 不設時限 2) 浪漫雪園、狂歡滑雪道、越野滑雪賽道(各2次)

$180(成人門票)

$120(小童門票)（身高不超過120CM ） * 三歲以下小童可免費入場

入場須知(全日貴賓除外) ： 1) 有效時限為4小時 2) 現場領取8個代幣

網址

www.amazingsnowinasia.com

(以上資料更新至文章當日)

Facebook專頁:呀劍萬帥 kimfamilytravel
Blog網誌 :kimfamilytravel.blogspot.hk