【澳門親子之旅】玩轉巴黎人水世界

今次嚟澳門正值炎夏時間，咁就最啱去玩水，所以就嚟一個玩轉巴黎人水世界啦~

[avrviframe id=”https://www.youtube.com/embed/qV4D2Gnaf9A”] 巴黎人住客就可以免費玩水世界，但好似我地非住客想玩又可以點，咁就可以俾每位$160入場，如果好似我地3點後入場仲可以半價玩啦~

貪玩嘅小小豬就九秒九換好晒衫，準備落水啦。不過入場前都有一個安全提示，身高1.4米或以下嘅小朋友必須係玩嘅全程穿著救生衣呀~

一見到泳池就唔放過嘅小小豬就先去幼小朋友專區，簡簡單單瀡下小滑梯先啦~

之後轉戰泳池游下水先，其實係因為天氣太熱，浸係水入面就係最舒服嘅時刻~

望住巴黎鐵塔下玩水，其實個FEEL都真係唔錯呀~

整個水世界皇牌活動就一定係依個巨型螺旋滑水梯，一共有兩條，長一條就係12米，短嘅都有4.7米。唉….小小豬想玩又如何，因為佢唔夠1.22米，所以就只係得個望字啦~

巨型螺旋滑水梯就冇份玩，不過小小豬都唔會覺得可惜，因為佢可以玩依個刺激嘅海盜船~

睇就好似冇乜特別，不過一上到船就發現大件事，因為上面有好多噴水位，而且仲有一個大水涌定時將滿瀉嘅水倒向甲板，各位大小朋友為左避開啲水就左閃右避(包括我在內)，都真係幾好玩呀~

海盜船上仲有2條唔同程度嘅小滑梯，唔好以為小兒科，佢嘅衝力都幾大，瀡得都幾快，小小豬都不知玩得幾開心，瀡完一次又一次~

開心嘅時光過得特別快，一轉眼就到左17:45，職員叫我地上水先知夠鐘要離場。原來佢地會係17:45開始清場，所有設施都會關閉，雖然玩得未夠喉，不過小小豬都只係乖乖上水，返入更衣室洗身了。
其實我都地玩左差唔多兩個鐘，小小豬都仍然話未玩夠(我自己就已經攰到冇朋友)，不過小朋友就係咁，有得玩就一定係充滿精力，小小豬係離開時都不停叫我再帶佢嚟，又話DADDY今次冇嚟玩唔到，一定要快啲帶DADDY嚟玩咁好玩嘅水世界哦。
玩緊嘅時候又唔見佢話掛住DADDY，為左快啲可以再去玩，又好似幾乖仔哦…哈哈哈！

BY小小豬的成長日誌