胡諾言 40歲生日太太陳琪：希望你每一天更順利

Aug 24 2017

尋日8月23日強颱風「天鴿」襲港，本港掛起十號風球，不過原來呢日都係胡諾言嘅40歲生日，亦係佢同陳琪嘅拍拖紀念日。踏入「男人四十」同拍拖17周年嘅重要日子，「天鴿」當然冇影響到佢哋慶祝嘅興致，胡太陳琪喺網上發表「愛的宣言」，原來仲預早喺沙田一間酒店訂咗套房，一家五口食自助餐加埋住一晚慶祝一番，見胡諾言拍埋片同網民開心Share，認真幸福又溫馨！

撰文：Sunday Kiss
圖片：胡諾言Facebook、陳琪Facebook

胡諾言牛一老婆囝囡逐個錫

先睇睇胡諾言嘅FB，佢昨日喺社交平台上傳咗一條佢哋一家五口慶祝生日嘅影片，影片入面見到有生日蛋糕，佢哋仲一齊大唱生日歌，兼互贈Birthday Kiss，幸福滿瀉啊！

胡仔自稱胡大少爺，仲公開多謝老婆嘅窩心安排，睇嚟呢個生日雖然冇好天氣都過得好開心！

兩位千金一齊錫爸爸面珠，仲唔冧死？

老婆陳琪亦唔輸蝕，即刻話：「我又錫啖！」，然後就咀咗老公一啖。見到胡仔個樣咁冧就知佢哋結婚多年都仲係好恩愛！

兩個囡囡對鏡頭一啲都唔怕醜！仲要求要同大家晒下爸鏡嘅生日禮物！完來兩位千金畫咗個氣球俾爸爸，畫功仲好好𠻹！

胡諾言生日兼拍拖周年

原來8月23日，唔止係胡仔嘅生日，仲係佢同太太陳琪嘅拍拖紀念日，陳琪在網上發愛的宣言，大讚他是好老公：「八號風球嘅前夕，呢一個男人為咗家庭同事業，冒着風雨仲喺飛鵝山頂拍攝外景，做佢背後嘅女人我仲可以講啲乜？應該係同佢講聲『生日快樂』，希望你未來嘅每一天都更加順利！」唔使問壽星佬胡諾言梗係冧到入心啦！

原來二人由拍拖至今已經17個年頭，真的不容易啊！