創業路上的知音友
我覺得創業同做雙職父母係可以令一個人更加強，因為一個人要做晒平時一間公司同埋屋企工人既角色，無論見客、諗Proposal、洗廁所、換片及洗衫等，都係自己做晒！雖然好辛苦，但起碼我可以控制自己時間，可以經營用錢買唔到既親子關係。
剛巧近幾日，見到D親子網站Post咗Janet（周家蔚）開舖頭的相，原來佢幾日前開咗間舖。記得上年六月，天明經可欣介紹聯絡我安排一個私人親子攝影班。我第一次接觸佢哋，係收到天明既電話，好客氣地說會約好一班人上來學，然後約好某日就上來了！第一次見面，覺得佢哋好友善同埋好好玩，因為佢哋成日講笑，而當日亦有其他藝人在場，但最深刻印象，就係Janet，佢個人好純好Nice又靚女，但成日都被天明整蠱，真係好攪笑！真係咁啱得咁橋，上星期六佢同TJ都有份出席迦晴生日會，所以咁橋又遇返。
琴日，剛巧要去銅鑼灣剪頭髮，朋友的仔仔剛出世，順便去皇室堡買嘢送比佢，咁橋Janet係3樓開咗間舖，於是去幫襯下！之前聽佢講舖入面係賣零至兩歲小朋友既嘢！啱晒！
未入到去已經覺得佢舖頭好大好舒服，因為樓底好高！本來搵初新BABY嘢，但原來大個D都有！例如木製玩具及太陽眼鏡！太好了，我就係想買副正正經經既比阿仔，因為佢仲係戴梗我兩年前係迪迪尼買比佢果副Pooh Pooh黑超，大個仔喇！唔可以再咁BABY，呢副可以戴到7歲都得。有個小朋友放學收到呢份禮物，開心到換完衫都仲要再戴！哈哈！而Janet EE就話佢好型仔好Hot!
另外，當日經Janet細心介紹，知道佢呢個TJ系列既設計意念由攝影出發，佢話呢件衫可以自由配搭附有魔術貼既飾物，例如BOW TIE、背心仔、英文字母、數字及星星太陽等，可以方便D家長同小朋友去影相留念，同一件衫可以變化多多，真係好似我係STUDIO設計果幅磁石場背景既概念一樣貼乜都可以，於是，我就買咗一SET，衫連埋褲仔再加埋個BOW TIE及背心仔都係四百蚊左右，加埋個靚靚PACKING，價錢好合理，啱晒送禮，可以比BB滿月或者百日宴著，唔錯！唔錯！
