48歲楊千嬅紀錄片自認唱得衰 陳奕迅重提初相識「被吸引」
陳奕迅重提被楊千嬅吸引
紀錄片在兩年前製作，延後推出，其實是為了紀念楊千嬅1995年出道，陳奕迅與楊千嬅認識多年私交甚篤又傳過緋聞，紀錄片中他分享二人相識經過﹐因95年第十四屆新秀歌唱大賽結緣。他形容千嬅性格倔強，有「大笑姑婆」之稱卻不太愛笑，他說；「呢個就係當時吸引到我嘅地方。」
「我講東佢講西，我就真係有嬲！」
陳奕迅又形容千嬅夠「男人」：「咁多年佢都冇變過，都係『喂！陳奕迅！』，其實我覺得有少少粗魯㗎！」Eason又提到與千嬅經常意見不合：「我講東佢講西，我就真係有嬲！你會識得多過我？我假假地都皇家音樂學院，有文憑，我係八級聲樂喎，同我拗？我係冠軍喎！」
自認好勝唱得衰 叱咤冇獎即刻捉同事開會
楊千嬅曾8次奪得「叱咤我最喜愛女歌手」，是樂壇上的紀錄保持者。她在紀錄片中自認好勝：「做artist唔好勝，做嚟做乜？1月1日（叱咤頒獎禮）冇獎嘅話我第二日即刻捉（唱片公司）同事開會㗎！」她又自認唱得衰，但要知道自己點解輸：「有段時間我係唱得衰嘅，我必須承認。我要知道自己點解輸，我先可以繼續進步。」
網民反應兩極 有人表示等到頸都長
楊千嬅紀錄片一出，網民持不同意見，fans們留言：「我也期待已久」、「開心！終於可以睇到！！！」、「終於有啦！ 等到頸都長」、「無懼閒言閒語，永遠都會支持你」。但亦有不少網民反感，直言：「過主啦」、「無興趣！」、「香港歌迷真的不重要嗎？點解芒果TV比YouTube早播？真的令香港樂迷失望」。
多張楊千嬅入行前舊照曝光
精選網友回應：
好感動的紀錄片，她和Eason的歌幾乎和我的回憶融為一體，真的是所有青春回憶。希望千嬅能走出困局吧，其實大家應該回歸一下理智，不要為反而推倒曬人哋過去咁多年既付出吧
部片拍得幾好。我唔追星，但楊千嬅啲歌我由細聽到大，感謝佢帶嚟咁多令人共情嘅好歌。佢從來唔係sell唱功嘅歌手，但無礙佢以優秀嘅歌詞詮釋能力成功演繹一部部作品，為歌曲注入自己嘅靈魂。明白佢因為大環境嘅問題喺香港處境艱難，希望佢可以盡快走出低谷，再次創造有個人特色嘅好音樂（btw，個人覺得丁生公關能力不足，呢方面都係交翻比外面嘅團隊做好啲
係fans一定會睇到喊，一路以來一齊走過咁多年，知你付出好多一直好努力，但如果唔係呢條片都唔會知你係承受咁多咁多 一方面好嬲你老公公司公關好差，將你過去咁多既努力去建立既事幫你拆台，但望住你結婚時好幸福既樣，唯有諗你幸福就好了。希望你係音樂上係依然有好多想嘗試既地方，所以簽左新公司，祝你一切更上一層樓
官方介紹：堅持夢想 分享紀錄回憶
期待兩年 今天與你一起細看千嬅人生的每個重要時刻
一部屬於楊千嬅的個人紀錄片，攝製歷時一年多，緊隨《MY BEAUTIFUL LIVE 世界巡迴演唱會》每一站所走訪的足跡，紀錄她剛入行，到成為人妻人母，這些年的心路歷程，並於2020年完成拍攝。
拍攝時適逢千嬅入行25周年，此為她特製的一本影像紀念冊，紀錄了她的重要時刻，與朋友和歌迷一同分享自己的音樂與回憶。回望過去，仍然保持對演藝工作和音樂的熱誠，珍惜現在所擁有的一切。 紀錄片以楊千嬅踏入社會工作，分三個階段為紀錄片骨幹，1.千嬅初出芧爐的勇闖世界、2.踏入人生另一個階段，婚姻幸褔過二人世界、3.擁有愛情結晶品，成為人母，變成三人世界，希望與大家一同見證楊千嬅的成長歷程！
