自家制…神奇冷靜樽

哈哈哈….未開工整時就笑到咁開心，唔知一陣完成後佢仲笑唔笑得出呢~

其實小小豬都係一個比較冇耐性又心急嘅小朋友，就好似有時佢做錯事叫佢去冷靜區休息時，佢都會成日以佢嘅音波功問「幾時可以離開呀？」「我坐左好耐啦！(其實都係2-3分鐘左右)」，有時聽到佢啲煩音都真係幾令人火上加油呀！

可能大家都會話「你俾個鐘佢睇，講好坐幾多分鐘咪得！」，但…..小小豬係一名數學痴嚟，你俾佢睇數目字反而係益左佢，所以依個辨法又行唔通。

所以當我見到依個分享時，就即刻覺得幾啱小小豬，所以就試啦！

首先用一個吉膠樽(我用左個HELLO KITTY樽仔，成件事即刻可愛晒)，除去招紙後加入室溫水，唔洗太滿嘅因為一陣仲要加膠水呀~

續下頁

上次整手工時買左支紅色金粉膠水，所以我主要就用依支吱入水樽度啦~

之後將透明膠水注入樽內至九成滿~

只係紅色就比較單調，所以我就加左啲金色閃粉，加多少就隨自己喜好啦~

先搖一搖睇下個沉澱情況先，如果太快可以加膠水，太慢就可啲清水~

哈哈哈….小小豬話紅色唔夠多，要加多啲哦~

如果一切都覺得好啱自己心水，就可以用強力膠將樽蓋黐實，咁就會安全啲嘛~

下頁：試用冷靜樽

一見個勞作完成左，小小豬已經急不及特不停搖個樽，佢仲話啲金粉係入面飄飄下好靚添~

覺得靚就啱啦，即係佢唔抗拒依個樽仔啦，之後我就慢慢同佢講依個神奇冷靜樽嘅用法。

出奇地小小豬竟然好樂意用我依個方法，仲識得問「係咪要等啲閃粉落晒係樽底先得呀？」。我依個沉澱速度都大約15-20分鐘左右，係依段時間小小豬又真係幾專心又安靜咁坐定定呀~

(**暫時真係有需要就只係用左三次，不過依幾次小小豬都係好樂意乖乖咁冷靜呀**)

真係估佢唔到，咁其實睇住啲閃粉慢慢流動，又真係幾靚，就連我有時得閒都搖下佢，望一陣人都心情好啲呀！