符曉薇愛女心切撰文反擊 歲幾囡囡被網民連番侮辱
廣告
愛女心切嘅陳柏宇同老婆符曉薇結咗婚三年,育有就嚟滿兩歲嘅囡囡陳羿辰。陳羿辰擁有包包臉,眼眉濃密,非常可愛。符曉薇經常幫囡囡影靚相、拍片放上社交平台,吸納咗一班粉絲。如今陳羿辰年紀小小,喺instagram已經有接近5萬名粉絲,好厲害。近日,符曉薇突然喺instagram動態發火鬧人,原來有網民連番侮辱佢囡囡。
撰文:Clara | 圖片來源:符曉薇instagram
愛女心切扯火反擊
事緣符曉薇收到網民私訊,對方留言:「你個女正垃圾」、「廢物」去侮辱佢囡囡。愛女心切嘅佢即刻喺instagram動態公開此事,並發文鬧爆對方:「作為一個公眾人物,周時都會遇到呢啲咁嘅人,通常都係會惡言我本人,極少會對小朋友惡言。我唔會回覆呢啲人,大家都冇乜必要同呢啲人理論,因為我相信有報應,你估喺網絡上惡言就唔係做緊壞事?其實當你有壞嘅心態,無論一個動作,就算一句說話,你都種下咗一個因,所以你繼續種吧,承受嘅唔係我,只會係你自己,因為我心態比你強大。」
曾宮外孕要切輸卵管保命
陳柏宇同符曉薇愛女心切,二人一直想多個細佬妹同囡囡一齊成長,所以好努力造人。早前符曉薇拍片自爆5月時其實已懷有第二胎,可惜期間大量出血,檢查後確診宮外孕,保唔住BB,連佢生命都有危險。符曉薇痛心終止懷孕,並立即進行手術,切除左邊輸卵管。佢話終止懷孕對自己嘅心理同身體都留有唔少影響,多得老公陳柏宇嘅支持同陪伴,佢先可以走出流產嘅陰霾。
![陳柏宇同符曉薇一直想多個細佬妹同囡囡一齊成長](https://imgs.sundaykiss.com/wp-content/uploads/2020/09/smile2_3155723135f61911bb7315-904x1024.jpeg)