自從上次復活節到「西園」體驗蒙古包及印第安營，一直都好希望可以快D安排到再嚟玩多次。等咗半年臨聖誕前夕，我哋終於又番嚟喇，今次除咗多咗好多全新活動，我哋仲首次感受觀星圓拱屋營區。
重覆嘅嘢就唔多講，大家可以番去爬舊文http://bit.ly/2jO0Ssh
就可以知道點去同要留意咩！去到長洲碼頭後記住行過隔離小碼頭乘搭「華勝街渡」
同半年前天氣好大差別，今年提早入冬，撞正呢兩日寒流襲港，所以都著到成隻糉咁
不過下晝仲有太陽就特別溫暖，吹住海風又特別涼爽，真係出發先興奮
坐這個街渡都已經係小朋友第一個節目，兩個行到船頭，一D都唔驚跌落去，仲伸到個頭鬼死咁出睇浪
話咁快5分幾鐘就到西灣碼頭，睇番舊文就知行少少路見到牌坊同士多，上個斜唔駛8分鐘就到「西園」大門口
去到西園門前，仲見到招牌已換過，更加有中國傳統美！
我哋今日黃昏先入營，所以快快手登記辦好手續，就即刻出發去玩第一個活動(已經事先預約好)
好熟悉嘅小路，再次嚟真係好似番咗鄉下咁！上次嚟見人哋喺度整「叫化雞」，今次我都預約咗呢個活動，等小朋友體驗一下(其實我自己都未試過)
職員哥哥已經幫我哋準備好火，今次真係要掉呀仔落火坑
當然就係我哋要一陣燒嘅大肥雞啦！估唔到由洗雞呢個步驟開始，呀媽咪好驚見到雞頭，所以就派兩個燒雞專員去攪掂佢
又係時侯講道理，當佢哋洗緊雞，就乘機教佢哋咩係「成功需苦幹」，兩隻嘢白食白住咗咁耐，今日係時侯我兩老蹺埋對手等佢哋服侍
其實隻雞都事前清潔好內臟洗乾淨，只不過想小朋友都體驗一下
不過呀芊一於少理，當隻雞係公仔咁武，先用五香粉搽勻成隻雞
呀芊一邊搽雞就一邊攪隻雞，喺度用手掹開隻雞眼，重覆個動作等隻雞好似眨緊眼咁，笑死我！
隻雞生勾勾嗰陣又唔見佢咁大膽，人哋死咗先至喺度攪攪震，如果隻雞突然識郁識叫一定嚇死佢
「呀芊，你想點呀！」佢話要同隻雞 K I S S，睇嚟佢同隻雞產生咗感情
見佢哋塞得咁開心，我正喺度諗不如我得閒都買隻雞番去俾佢哋玩下，玩完拎去煮嚟食
一個擘開個X，一個不斷塞蒜頭同薑入去，分工合作 ^.^
可以拎過去火坑整「叫化雞」啦，其實呢味菜仲有幾個名「乞兒雞」、「富貴雞」係江蘇名菜
大家其實都可以用荷葉包，不過就會難熟D，但係開出嚟嗰陣係超香!
職員仲教我哋呢味新菜，將個洋葱掘空，然後打隻蛋入去，再用竹籤固定放落去燒
放哂落去燒之後，就要起碼等成個鐘之後先有得食，呢個時侯就帶齊行李去我哋第一次住嘅觀星營! ^>^ ~ ~ ~
其實西園仲有好多唔同類型嘅營區，大家可以爬舊文睇詳細介紹
公眾浴室連洗手間，全部都起乾淨 (頭先我哋就係喺呢度洗雞~)
有汽水同零食機，當然大家都可以客務中心直接買，仲多選擇!
好興奮今次可以住觀星圓拱屋，諗起夜晚可以喺屋裡面瞓低望住個星空就開心
圓拱屋裡面好闊敞呀，足夠兩個跑嚟跑去同跳床…T.T
透明膠幕兩邊有紗簾可以夜晚拉埋佢，唔驚俾人睇蝕哂! 外面有私家獨立厠所(設有風筒)同埋戶外餐桌及椅，洗盥用品拖鞋都齊備，房內提供4支礦泉水同埋一盞手提電燈
哥哥呀芊一入到嚟就幫圓拱屋改咗個名做「菠蘿飽屋」，個名又幾得意好聽喎
休息咗一陣間，我哋又開始另外一個活動「馬騮上樹」啦! 呢個活動係今年新加的，我入營前同佢哋兩個講，佢哋都好大膽話一定玩唔會驚，睇吓一陣又會點?!
佢哋兩個身後的樹頂走廊，上次媽咪玩完都話幾驚，再下一次到佢哋高D有機會嚟，佢哋就要接受呢個挑戰啦!
戴埋個頭盔就攪掂哂，可以出發去「巨人梯」嗰邊玩啦!
先聽聽教練講要注意安全嘅地方，究竟芊芊聽唔聽得明?
我依家知咩叫「年少無知」教練問邊個想玩先，居然呀芊第一個舉手(我諗佢只係驚死蝕底，人哋問邊個想先，一貫作風都係想爭做第一個)
最細呢隻馬騮開始啦! 開始爬嘅時侯冇人夠膽出聲，就連打氣都唔敢，因為怕佢會望番落嚟仲驚。
第一眼梢番落嚟居然唔驚喎! 呢個時侯都離地有1米高架啦
真係咁勢利? (你見我影相呢個角度，其實已經有兩米多高)
不過就停喺呢度啦! 佢開始面容扭曲不斷擰頭，教練同我都鼓勵佢多一陣，但係佢都話唔得!
之後就慢慢咁落番嚟! 不過全場都拍手掌讚佢好叻，因為之後有個同佢差唔多大嘅男仔只係爬到佢嘅一半咋! 呀芊爬到呢個高度係整段嘅一半，大約都有4米高，好叻豬囉
話咁快就到哥哥爬上去，一貫作風好心急咁已經上到頭先呀芊嘅高度(我都未嚟得切影相…)
順利搖響個鈴啦!! (咁快爬到上去咪好快玩完? 教練好好人的會問有冇小朋友想玩多次)
要好好捕捉呢一刻，因為哥哥又一次挑戰成功! 希望可以記錄低佢哋唔同時段的成長歷程
好快就天都黑哂，我哋番去睇吓「叫化雞」同「洋葱蛋」完成未!
洋葱皮外就梗係燶哂啦，但係掀開個蓋，見到隻蛋真係溫泉蛋，好吸引呀好正呀!!!
食入口嘅溫泉蛋好Creamy，仲有陣陣洋葱香甜，不過下次可以放番少少鹽吊味!
我哋嘅「乞兒雞」出爐啦，真係成舊石頭咁！究竟成唔成功呢？
點解呀芊突然大叫，可能隻雞太香，有隻狗從後跟住走上嚟，嚇得呀芊急急腳走，笑死了
打開錫紙，一陣超雞香飄出嚟，當然有部份燒燶哂，但係裡面D肉都滑一滑，就咁搵手撕開都冇問題
雖然有一邊燶，但係另一邊就冇事，連埋雞皮一齊食，兩個食過唔停口
用荷葉包嘅又如何呢？雖然有荷葉香，但係好似未太熟，時間要耐D
番入營再嚟個宵夜節目，就係拎住電筒去探險，其實天氣又冬又乾，昆蟲大人都番哂去冬眠
我就影到張靚相自我滿足，原來香港都可以睇到咁多星星(請抹一抹個Mon先再睇)
想睇埋 Part 2 密切留意http://bit.ly/2CqbIMS
Photo byCANON 5D Mark IV,Len|EF 24-70mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:今次第二次到西園玩，期待咗好耐！因為只係講個場真係無得輸，一嚟到已經內心平靜好舒服，加上今次可以做「叫化雞」同埋「雞蛋仔」真係好好玩，而且上次冇咩歷奇活動，今次可以玩「馬騮上樹」挑戰兩個細路膽量，真係好刺激好玩！
