撞樣男神 – 劉寶業
廣告
佢叫劉寶業(Vincent)，20歲，中學係喇沙仔，而家喺浸大讀緊Asso。有人話佢個樣似伍允龍，又有人話佢似羅仲謙；亦都有人話佢似彭于晏！一個人同成班男神撞哂樣，都唔知係咪好事? 不過Vincent就覺得自己同呢班男神仲有好遠距離，而家做緊model嘅佢，只係希望可以再練大隻啲，個樣再順眼啲，如果有機會向幕前發展，都可以順利啲。
雖然Vincent話自己嘅條件，同班男神都仲差好遠，不過喺喜好方面呢，就應該似伍允龍多過羅仲謙喇。例如，Vincent話自己都鍾意好似鍾嘉欣咁嘅女仔啦! 不過楊怡呢類型就麻麻喇，相比下會鍾意胡定欣多啲。
中一入咗喇沙，因為身型高大，順理成章入咗籃球隊。Vincent話，為「喇沙仔」呢個身份自豪，唔係因為母校嘅名氣夠響，而係「喇沙仔」永不放棄嘅精神，到而家都提醒住佢，做任何事都要堅持，而且要盡自己所能去完成。
身型高大，除咗打波，做model都一樣得！Vincent而家係part time model，通常都係影雜誌，或者平面廣告。不過佢覺得男仔做model始終冇女仔咁吃香，所以如果想有多啲job，可能就要花多啲心機去操fit啲個身型先得！
而家喺浸大國際學院讀緊Asso，不過Vincent已經諗定幾條出路。如果可以順利升上degree，當然就繼續俾心機讀書啦！如果升唔到，佢就會考慮去工作假期，儲吓生活體驗，或者睇吓有冇機會向幕前發展。再唔係，佢可能就會試吓去考消防員，因為佢由細到大，都覺得做消防好有使命感！
嚟到2015年，「學界男女神」都要增值吓，唔止要睇盡中學界靚人，仲要殺入大專界！
所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋! 由今期開始，成功自薦或推薦嘅話，仲有嘢送！
參加方法好簡單，只要將想推薦嘅同學，或者自薦勇士嘅facebook ，tag喺下面 “Comment”嘅位置；再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺Sunday Kiss facebook專頁 inbox或電郵到[email protected]俾我哋；如果成功通過編輯部審核，成為「學界男女神」，自薦或推薦者就可以得到由遵理學校送出嘅「$300課程現金券」。
「學界男女神」，等緊你嚟挑戰!
撰文: Joanne
攝影: 黃大立
拍攝: Anthony Leong
剪接: Candy
Hair+Makeup: EM Makeup
提供場地:Paper Clip 派對私竇 (9334 4377)
鳴謝:
