Sweet Rider-馬詠茹

article

Sunday Kiss

Jan 19 2015

如果有人再講英華女學校係「半山扒房」，真係打死都唔好信呀！繼上次吳嘉嘉得到超過500個like同share之後，今次英華再派出單車女騎士－馬詠茹(Vivian)出戰「學界男女神」。雖然暫時未知網上反應如何，但在拍攝當日，記者趁住放工嘅繁忙時間，帶住化好妝嘅Vivian喺街行咗一個圈，途中的確受到大部分路人注視，「吸睛」能力絕對強勁！

Vivian本身好鍾意運動，亦都好有天份，喺學校係體育組嘅成員，專項係玩田徑，另外佢自己都好like踩單車同roller，仲係香港單車代表隊嘅成員tim!

讀緊中六嘅Vivian，今年就要考DSE喇，為咗集中精神考好個試，佢而家都已經向港隊請咗假，暫停所有練習，仲幾乎晚晚都去補習，希望可以考到好成績入大學。

Vivian話要兼顧讀書同踩單車係好辛苦，有時為咗讀書，冇辦法唔犧牲練車嘅時間。試過有一次，同一個隊友一齊出賽，雖然賽前冇咩機會練習，但係最後都攞到第四名。不過佢嘅教練就好激氣，覺得佢哋明明係有天份，有機會攞到更好成績，都唔俾心機練習! 所以有時都好無奈!

問到Vivian第時係咪會繼續踩單車，佢話而家都仲考慮緊，因為如果考完試要重返港隊，就好有機會被要求轉做全職運動員，但係佢就好想讀好書先，所以都仲諗緊究竟自己條路想點行!

有啲朋友會叫Vivian做「wing wing公主」，諗落其實佢都真係好似公主咁，有好多人鍚架! 例如英華因為喺半山嘅校舍要重建，所以暫時搬咗去深水埗，由於Vivian同妹妹係同校嘅，佢哋Daddy Mummy，為咗等佢哋返學方便啲，就舉家由中西區搬咗去長沙灣；有時去街夜少少，Daddy仲會做埋「柴可夫」接送，真係錫到佢燶啦!

有留意開「學界男女神」嘅，都知好多同學仔都封咗彭于晏做真正嘅男神! 不過可以近距離埋到彭于晏身嘅，仲要合照嘅，Vivian可能係第一個啦! 想睇? 去片啦!

嚟到2015年，「學界男女神」都要增值吓，唔止要睇盡中學界靚人，仲要殺入大專界！

所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋! 由今期開始，成功自薦或推薦嘅話，仲有嘢送！

參加方法好簡單，只要將想推薦嘅同學，或者自薦勇士嘅facebook ，tag喺下面 “Comment”嘅位置；再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺Sunday Kiss facebook專頁 inbox或電郵到[email protected]俾我哋；如果成功通過編輯部審核，成為「學界男女神」，自薦或推薦者就可以得到由遵理學校送出嘅「$300課程現金券」。