同鹹蛋超人一齊打怪獸！

Keicy 有時都會喺屋企扮吓鹹蛋超人，不過啲招式真係笑死人，所以今日帶佢、Kassy 仲有佢哋嘅朋友仔，去咗一個鹹蛋超人主題展覽嘅試玩活動，畀佢哋一次過見晒鹹蛋超人家族，學返一招半式！^^

Keicy 見到鹹蛋超人爸爸媽媽嘅時候，就即刻大叫：「好高呀！」，唔知 Keicy 會唔會開始嫌我矮呢？哈哈！

成個場館最震撼，係 7 米高巨型鹹蛋超人 Zero 同怪獸嘅世紀宇宙之戰，Keicy 同 Kassy 即刻擺晒 pose 叫我影相！嗱嗱嗱，你兩姊妹睇完咁大個鹹蛋超人，返到屋企要記得點擺 pose 呀！^^

唔記得開閃光燈添……

一場嚟到，我當然都要影返張靚相啦，所以幫襯現場嘅即影即有相機。揀好相框，擺 pose，唔駛 10 秒就有相睇喇！ 我同 Keicy 總共影咗兩張，而呢張嘅相框係Keicy 揀嘅，靚唔靚呢？

最吸引小朋友嘅當然係遊戲區啦，有可以大叫大跳嘅波波池同吹氣彈彈床，另外更有「超人格鬥技特訓專區」畀小朋友模擬打怪獸，以及大型夾公仔機「貝利亞魔爪」。

而細細隻嘅鹹蛋超人、怪獸、同迷你摩天輪，都係好多小朋友嘅「影相位」。

玩到攰攰哋，係時候去睇 show 喇！長 1 個小時嘅最新鹹蛋超人真人舞台劇，原來係第一次喺日本以外公演！有頂級舞台、燈光、音響就一定㗎啦，仲有專誠由日本嚟嘅演員落力表演！不斷打前空翻後空翻，非常精彩！

出色嘅 3D 效果就令大家都睇到好興奮！當鹹蛋超人打怪獸嘅時候，全場所有大人小朋友都舉手叫加油加油！氣氛高漲，Keicy 同 Kassy 更加睇到「上晒身」，喺座位出「十字死光」！哈哈！

Kassy 本來好驚鹹蛋超人，睇完個 show 就唔驚喇，因為知道佢係好人，會保護我哋呢個城市。^^

其實好多小朋友因為太細個，唔係好知鹹蛋超人係咩嚟，都係爸爸先識，但睇完呢個展覽同 show嘅小朋友都愛上咗，令爸爸同仔女有共同嘅愛好、話題，所以呢個親子活動好有意思，特別係爸爸，因為平時家庭日嘅活動都係由媽媽安排節目，所以我覺得今次啲爸爸冇得偷懶，由聽日 (9日) 開始至 12 日，同仔女嚟呢度，同仔女打成一片，一齊鍾意同一個經典 character 啦！

溫馨提示：玩彈彈床要着襪，家長記得帶對襪仔呀！:)
FB: KeicyKK