媽媽會講座
一、奶粉
雅培媽媽會 1月入會2月就參加到講座，不過當日嘅講座同 美素佳兒 撞期，最終揀左美素佳兒，到5月再抽到雅培「媽媽學堂」，除咗學同BB沖涼、懷孕飲食，仲教胎教。重點禮品係胎心機，早前係呢度轉贈比另一位有需要嘅媽媽。雅培每星期都有eDM詳細講解BB生長預測、媽媽一般會遇到嘅狀況，資訊同安排都好貼心。
1月入會2月就有講座，算係我地參加過咁多過講座當中最大型，講座係金域假日酒店舉行，示範同BB沖涼、包被，場內有唔同攤位比媽媽爸爸試食燉奶、學習抱BB之類。完場買奶粉就送胎心機、優惠價報名上育嬰班，我地都報左一堂試吓。
4月份嘅A+產前講座，朗廷酒店舉行，完場登入指定網址做好問卷調查得到禮物，都幾方便&環保。
3月講座講解懷孕健康飲食、生產過程、產檢資訊。4月再參加雀巢另一個講座，教嬰兒飲食、按摩。資訊同禮品都好豐富。
惠氏 入會送迎新禮品寄到屋企，禮品係藻油丸8粒裝& 媽媽奶粉 試飲裝。定期SMS胎兒發展資訊，簡短清楚。7月23日抽中佢地嘅「產前產後湊B實習班」，每人拎住一個布公仔學習點換片同埋沖涼。
智多健 6月出席佢地喺灣仔小童群益會舉行嘅講座，主要係聽佢地嘅奶粉、鈣片優勢之處。呢個係咁多講座中最唔舒服嘅一個，首先係場地嘅摺凳，椅背中空，對於腹大便便嘅媽媽嚟講真係好辛苦，加上會場空間細，又坐滿參加者，想行出去伸展都唔得。以為捱完講座就走得，點知大會又派購物劵要參加者由會場步行三條街到指定嘅商店購物，當日完場後落雨，我同其他媽媽冒雨行到去更加要在店外排隊，都幾後悔…
NutriciaProgram 和 安滿Anmum 只有入會沒有講座。
二、陪月
Ubaby 和 綠色育兒 屬於 陪月 網站，前者設有購物平台，兩個機構都會定期舉行唔同主題嘅講座，入會後大家可以留意佢地Facebook，因為佢地嘅講座資訊同報名方法一般都係facebook 更新。ubaby好多時都係聯乘其他品牌舉行講座，至於綠色育兒，我地參加過一個有關餵母乳嘅講座，聽完之後為母乳媽媽打支強心針。
三、尿片 & 清潔用品
Huggies Pampers nepia妮飄 思詩樂 goo.N日本大王 Biolane 以上入會都會有試用裝 / 迎新禮品寄到屋企，部份要讚好佢地facebook專頁先可以申請到試用裝，例如nepia。
四、其他
Cheerbaby樂兒網 屬於一站式幫拖入晒唔同媽媽會嘅網站，不過我無參加呀，反而係推介佢同唔同組織舉辦嘅講座，例如講嬰兒眼仔健康、疫苗講座、坐月滴雞精嘅講座等等，入會就有講座資訊。
Holle 有機食品品牌，入會後參加過佢同香港醫護聯盟舉行嘅「嬰兒有機飲食」& 7月底嘅「母嬰產後黃金期」講座，現場有攤位提供即場購買有機產品，人頭湧湧，佢嘅嬰兒米糊都幾受媽媽歡迎，兩次參加都有好大袋禮物送走，當中有好多健康食品、迪士尼美語世界嘅試聽版CD。
疫苗注射中心，講座禮品非常豐富，即使入會都不睇彩數抽唔抽中講座。參加過一次，講解照顧初生嬰兒沖涼，主要係聽佢地嘅疫苗plan，想BB打少幾針可以Join佢。
生寶臍帶血庫 我地已決定政府順產，不過公院無儲存臍帶血嘅服務，只可以捐去紅十字會。如果你想幫你嘅BB儲臍帶血? 暫時只可以去私家醫院生喇。
健康創富 講座禮品非常豐富，定期舉辦唔同醫學講座。
香港醫護學會 定期舉辦唔同醫學講座，可自行按題目參加，我地參加過「嬰兒濕疹成因講座」，由皮膚科醫生、營養師講解。
