托腹帶唔可以亂用
我去咗010銅鑼灣分店買托腹帶，裡面賣嘅托腹帶、胸圍都有台灣製造嘅標籤，售貨員小姐望一望我個肚就知個胎幾周，佢話見肚夠三個月就可以用托腹帶，以防胎位過低嘅情況出現。呢度有兩款托腹帶選擇，分別係中腹型同埋全腹型，佢推介咗最新出嘅抗電磁波全腹型托腹帶 HK$6XX 比我，佢話可以防電腦、wifi機釋出嘅電磁波、輻射線。
第一次用托腹帶嘅感覺係條腰馬上輕鬆好多，首先係減輕腹部下垂嘅感覺，腰骨承受嘅力都卸咗落盆骨，將原本腰患尾龍骨嘅痛楚減輕咗好多，不過，到25周左右開始，我嘅背部尾龍骨愈來愈酸軟，有時行得耐、企得耐，雙腳已經好攰，條腰好似無晒力支撐住個肚，情況愈來愈嚴重。
到31周去醫院安排嘅產前物理治療班，物理治療師解釋，呢一切係因為太過份依賴托腹帶了！主要原因係我好長時間使用，因為公司長時間對住電腦、屋企又有Wifi，以為戴得愈耐就愈好，點知因為長時間使用，令腰背肌肉依賴托腹帶而發唔到力，所以當個肚愈來愈大嘅時候，腰背亦開始承受唔到。
續下頁
根據物理治療師所講，原來托腹帶係唔可以成日戴住，佢建議孕婦可以按固定時間使用，例如返工果10個鐘，行行企企多就keep住戴，返到屋企或者坐Office多嘅媽媽，可以縮短使用托腹帶嘅時間。
另外，佢唔建議買一條有骨嘅托腹帶，除非係醫生指定，否則果種有三條骨嘅托腹帶，會幫我地卸晒d力，令我地腰背肌肉退化。佢亦建議我地平時要做多少少強化背部肌肉嘅腰部運動，鍛鍊背部肌肉，減低孕晚期發生嘅腰背痛，同時亦會有助生產時發力。
另外，同好多媽咪一樣，我都係計劃餵人奶，售貨員推薦無鋼圈嘅胸圍，除咗以防塞乳腺，佢亦屬於餵乳胸圍，可以甩釦，所以可以戴到生。試戴咗幾款無鋼圈嘅胸圍，感覺真係好無安全感，但最終都買咗兩個，連埋托腹帶，埋單折實HK$1,484。
無幾耐之前，喺Aeon 同埋 D Park賣孕婦用品嘅舖頭發現有台灣、日本嘅托腹帶、無鋼線胸圍，價錢經濟好多，而且有好多唔同牌子選擇，最經常聽到嘅有六甲村，以010 嘅價錢可以買到兩三條托腹帶了，不過喺度奉勸各位媽媽，買野前做功課先，喺價錢同質量之間取個平衡。
