【合家歡本地遊】食玩嘆兩日一夜

DAY 1

@Check-in

三姊弟見到門口個小噴水池勁興奮，high 完一輪之後仲有得玩酒店嘅電腦，令佢哋開心度過等 check-in 嘅時間。

@Room

上到房仲興奮，有兩間房一個廳，兩間房喺左右兩邊，中間隔住個廳， 有少少私人空間嘅設計，like!

一於小朋友一間房，大人一間房啦!

放低行李後，見到個無敵靚海景，真係心曠神怡，成個人平靜哂，輕鬆哂!　^^

貼心小禮物

有個透明袋包住啲朱古力棒，3姊弟一見到就好鍾意!

酒店仲細心咁畀埋紙袋打包，小朋友可以喺紙袋上高畫畫，發揮創意，畫出屬於自己嘅紙袋。

@做小小廚師

休息一陣，就落樓下搵酒店廚師教3姊弟做小小廚師，製作喺房見到嘅朱古力棒。

材料好簡單: 蛋糕 + 朱古力醬 + 一堆糖果

造法亦都好簡單: 將蛋糕整爛哂 -> 加朱古力醬 -> 撈埋佢 -> 面頭加自選糖果

咁就完成喇!

甜味可以自己控制，想甜啲，落多啲朱古力醬; 冇咁甜，就落少啲朱古力醬。

小朋友學咗之後，返到屋企都玩得呀!

@度假 feel 泳池

跟住我哋換衫游水, 小朋友最開心、最興奮就係同家長一齊游水喇!

泳池超靚，好似去咗外國咁樣，池邊又可以叫嘢飲同小食，所以我飲住嘢, 嘆住小食, 望住3姊弟玩水，

此情此景, 溫馨、寫意!
@滋味自助餐

玩足一日，夜晚一於放盡嚟食! 嘻嘻!

Buffet 有好多嘢食，龍蝦、芝士、壽司，當然有小朋友最愛嘅雪糕, 全部都好好味!

@美容Sauna

桑拿收11點, 所以我趁小朋友瞓咗覺, 就勁興奮衝去做返轉!

佢哋有濕蒸同熱蒸，當然要試勻哂啦，我仲帶咗啲精油去，蒸完成個人鬆哂!

因為冷縮熱脹嘅關係，啲精油按喺塊面度好吸收，所以3姊弟第二朝起身會見到媽媽又靚咗!

哈哈哈哈哈哈哈哈!

DAY 2

食完個豐富好味嘅buffet早餐，齊齊去踩單車，再游多一次水, 同陽光玩遊戲!

@學習環保知識

小朋友喺呢度，會有工具畀佢哋掘返啲泥出嚟，連一棵小樹苗種落一個花盆度，因為個花盆係由已用嘅膠樽製作, 所以小朋友會明白環保同保育嘅重要性, 享受完種植嘅樂趣, 仲可以帶小樹苗返屋企添!

後記

兩日一夜嘅合家歡旅行話咁快就結束。

原來小朋友唔一定要搭飛機，去第二個國家旅行先興奮，

留喺香港，去酒店住返晚，佢哋都一樣盡興 。

因為喺小朋友眼中，無論坐車定坐飛機，去邊度旅行都一樣咁開心，

3姊弟出發之前已經勁期待，喺屋企係咁話:「嘩! 我哋有得去旅行呀!」

見到佢哋未出發先興奮，旅程完咗仲係咁興奮，證明呢個兩日一夜真係超值，無論大人小朋友都有個難忘嘅暑假!

冇咩我返出去執屋先喇… 🙁

FB: KeicyKK