【唱出感動】德望合唱團新年音樂會

好多人都知道德望合唱團係學界音樂比賽嘅常客，歷年獲奬無數，所以非常期待佢哋呢個為期兩日嘅年度大型表演，結果除咗聽到多首名曲，享受一次音樂盛宴外，更被佢哋嘅精彩演出同團結精神感動。

每一位參與嘅老師同中小幼 Hopers，喺聖誕新年假期期間，幾乎每日都返學校排練，憑住專注同團結，最後喺舞台上唱出高水準，震撼台下每一位聽眾，唱完之後，所有成員都相擁流淚，除咗情感宣洩，相信亦係畀自己同團員嘅投入所感動。

點解我知道？

除咗今年 K3 嘅 Kassy 係合唱團成員，兩年前 Keicy 讀 K3 嘅時候，仲有本人那些年喺小學部嘅時候，都好幸運曾經係學校合唱團成員。

細細個每次放咗學去合唱團，都經常見到中學部嘅姐姐排練，佢哋好多都唱得超好聽，次次都睇到我目定口呆，更幻想有朝一日，可以同佢哋一樣踏上舞台，唱出天籟之音……

唔經唔覺，德望合唱團（中學部）已經有 50 年歷史，除咗一直創造令人聽出耳油嘅演出，努力培育小學同幼稚園 Hopers 嘅好歌聲之餘，更多次聯同本校優秀嘅交響樂團、交響管樂團、中樂團等進行各類型表演。

呢晚新年演唱會，作為一位幼稚園學生家長，望見細囡 Kassy 上台唱歌，已經感動到一個點；作為曾經參加學校合唱團嘅校友，見到中學部 Hopers 唱出功架，見到團員完 show 後感動落淚，真係所有回憶都返晒嚟！

每次同 Sister Pauline 見面都好開心！

德望合唱團將會喺6月29-30日演出大型音樂劇 “All I Need to Know I Learned in Kindergarten”，到時會有交響樂團現場演奏，希望大家到時入場支持，用你哋嘅掌聲，讚賞呢班高水準嘅小歌者同小音樂家！

FB: KeicyKK