【好動囝囝揀幼稚園】蔡繼有總校長女兒的文娜雅拔
傳聞話，入讀文娜雅拔幼稚園，就有好大機會考入家長們夢寐以求嘅傳統名校蔡繼有，我當然冇辦法證實係唔係啦，不過蔡繼有總校長劉筱玲博士，同文娜雅拔校監李詠儀小姐，係兩母女，教育理念好相似，同樣提供良好嘅環境，令學生愉快學習同培養出良好習慣。
由幼稚園嘅英文名 (Manhabit) 就知道，校方相當重視幼兒嘅態度 (manner) 同習慣 (habit)，主張培育以下 6 個學習範疇：
- 個性、社交，以及情緒發展
- 溝通、語言，以及讀寫
- 數學、科學和解難
- 認知及理解能力
- 體能發展
- 藝術創意發展
以閱讀為例，校方喺園內四周擺放圖書，幼兒就自然養成閱讀習慣，而且結合故事式教學、角色扮演同每月唔同嘅主題教學活動（1年共10個主題），引導學生從生活中探索同思考，培養小朋友嘅性格，並從中教育多方面嘅知識。如果講職業，仲會邀請任職消防員、警察嘅家長嚟親身示範同講解，甚至帶學生參觀警局。
學校另一個宗旨，係培養小朋友嘅禮儀，呢方面，相信好多家長都感受到， 全體教職員都係以身作則，並好有愛心，特別係校長 Ms. ChiChi Tsang，以 Par Par 為例，佢上年讀PN時，唔係好講嘢，細心嘅 Ms. Chichi 留意到呢個情況，覺得佢有啲 lazy talk，之後透過老師傳達畀我知道，要我多加留意。喺跟住落嚟嘅一段時間，Ms. Chichi 主動同佢多啲溝通，對答嘅時候，嘴型故意誇張少少，誘導 Par Par 張開口說話，咬字更好，以致一年後升上 K1 嘅細佬，開朗咗同健談咗好多。
同其他家長傾開計，都話感受到全體教職員好留意小朋友嘅舉動，Ms. Chichi 同老師們溝通得好好，有咩問題，都會同家長講返，或者提供專業意見，令小朋友健康快樂咁成長，以及有多方面嘅嘗試。
另一個例子，就係 Par Par 個幾月前第一日上 K1 返學時，做咗「大喊十」……
畀喺校門迎接學生嘅 Ms. Chichi 見到，佢主動上前，溫柔咁摸吓細佬，又抱下佢，拖住佢，陪佢入課室慢慢傾計，和藹可親咁慢慢氹佢返學。好快趣，Par Par 開學第二、三日，就已經好開心咁話: “Where’s my backpack? I wanna go to school!”
學校只係開辦咗短短幾年，所以 Ms. Chichi 同老師都更有心、更有耐性，將學校辦得更好，畀小朋友最好嘅教育，例如喺語文方面，就有平衡有效嘅兩文三語環境，英語主導佔 70%，中文 30%，普通話一星期兩堂，英文故事書就係用 Oxford reading tree，亦有外籍老師協助小朋友打好聽、說英語嘅基礎。另外，每星期又會帶兩本書返屋企，同家長一齊親子閱讀。
喺公開比賽攞獎，可以側面證明學校有高質素嘅英文教學。喺 2015 年 3 月舉行嘅「第二屆全港幼稚園英語朗誦比賽」，文娜雅拔幼稚園榮獲冠軍，評判更讚揚表演極具水準，而且演繹充滿童真同歡樂，可以見到所有小朋友都非常享受英語朗誦，能夠愉快地享受學習英語。
唔好以為攞晒獎係靠催谷，校方反對逼迫小朋友背誦艱深生字，唔理會佢哋係咪明白字詞嘅意思，而且幼兒手部肌肉尚未完全發育，大量抄寫功課，反而適得其反，所以文娜雅拔提倡愉快學習，同保良局蔡繼有學校一樣，推行圖書教學、主題教學，老師更會喺課堂上同幼兒一齊朗讀並討論圖書，甚至透過表演話劇，以加深佢哋對書中內容嘅理解同興趣，照顧幼兒嘅心理需要，並鼓勵佢哋向家長轉述故事，繼而增加對文字嘅認識同提升當中嘅敏感度。
相信呢個教育方針，應該比較適合 Par Par，始終男仔比女仔活潑啲，需要用更多唔同嘅方法，嚟提高細佬嘅學習興趣。
平時同家長朋友傾開，大部分都好關心點幫囝囡揀學校，而我就推薦文娜雅拔，唔係因為 Par Par 讀緊咁簡單，而係眼見好動嘅細佬返學返得好開心，亦都學到好多嘢，佢哋啲校舍、教具、師資各樣都好好，令我呢個廿四孝媽媽好放心！
可能有家長認為，文娜雅拔係新校，擔心會有些少甩漏，呢層大可以放心，因為我同一眾家長都見到，學校無論運作、規模等都好成熟，加上同名校蔡繼有一樣，有好好嘅辦學宗旨， 能夠培養幼兒有良好嘅習慣，更提供好多機會畀小朋友好好表現自己，提升自信心。正所謂「三歲定八十」，如果錯過咗培養德行嘅黃金時期，大個就好難改，到時候就真係「江山易改，品性難移」喇。
