【好味食唔停】薑蔥鮑魚煲

其實鮑魚都真係唔難煮，我次次煮果皮蒸鮑魚都真係好快KO，見大家食得咁開心，我都好有滿足感呀！

不過好味食得多都會有悶嘅一次，所以都要攪攪新意思先得，為左令大家食得更加開心，我就上網搵下食譜，最後見依個薑蔥鮑魚煲簡單得嚟又好似幾好味，所以就決定試下煮啦！

材料：鮮鮑魚兩斤(因為我地有八個人食呀)、薑、蔥、蒜頭，份量就睇自己需要，由於我自己就好鐘意食炒香嘅薑蔥，所以份量就多左少少~

鮮鮑魚去殼洗淨抹乾，底部界花~

薑切片；蔥切段；蒜頭及乾蔥拍扁~

中大火下油，先炒香薑片、乾蔥、蒜及蔥段~

之後加入鮑魚略炒均~

沿鍋邊加入少少水，然後上蓋轉最小火煮2分鐘~

開蓋再加入蠔油、老抽及糖，轉中火略炒~

炒至鮑魚平均上色後便可熄火，蓋上蓋再焗多1分鐘，就食得啦~

第一次咁煮鮑魚，估唔到炒鮑魚又真係幾好食，有鑊氣之餘身質又夠稔身，仲要都幾入味，最好就係唔計洗嘅時間都只係用左十分鐘左右就煮好，仲唔係快、靚、正之選！

BY 小小豬的成長日誌