【好玩科學園】 動感科學園地 – 創藝科學城
當然，我都要非常多謝公關姐姐們為我地安排，每位姐姐都好愛錫小小豬，所以每次都令小小豬玩都唔願走。
今次工作坊節目都好豐富，大部分都係適合4-6歲以上小朋友，所以應該好啱小小豬玩~
我地第一個工作坊就係「動畫投影機」~
其實依個係所有工作坊最難嘅，唔好話小小豬，就連我都覺得有點不知所措。不過好在有在場工作人員幫手，我同小小豬就邊整邊問，所以都叫做可以一步步緊住做。小小豬負責啲簡單嘅工作摺，紙卡摺外殼、剪動畫卡紙同埋接上插電及插頭~
接下頁
經過一輪努力終於完成，可以睇下小貓動畫啦(不過…傻豬仔好似調轉左嚟睇哦..哈哈哈)~
第二個工作坊係「科學轉轉樂」~
依個係小小豬最鐘意玩嘅工作坊，緊係啦…一見張車嘅地圖就已經閃閃眼啦！其實都係利用紙條做路軌，要成功將粒彈珠放入籃內~
路軌係由小小豬自己設計，所以當經過測試後，成功左又真係幾興奮呀~
接下頁
玩左兩個工作坊見有時間，加上小小豬又做得幾好玩，所以就俾佢去「活力彈床」嚟個小放電啦~
第三個工作坊「我的VR眼鏡」~
VR(Virtual Reality)即係虛擬現實，利用紙卡摺一個眼鏡型嘅瀏覽器~
之後係Youtube入面搵啲VR影片，再將手機放入VR眼鏡入面，再睇到3D短片啦~
依個VR眼鏡真係睇到佢地兩父子嘩..嘩聲，最攪笑係小小豬睇到身體左右搖擺~
第四個工作坊「迷你導電樂譜」~
接下頁
學開彈琴嘅小小豬當然係鐘意玩依個工作坊，其實係利用鉛的導電原理去製作聲效。先將工作紙用鉛筆油好~
將聲效機器放在紙上，之後找出Do Re Mi音調，就可以奏出生日歌啦~
依個小小豬真係玩到唔願走，不停係度搵啲音調，係度邊奏邊唱，超級ENJOY呀~
第五個工作坊「手工T-shirt 齊齊印」~
未開始時就當然係乖乖留心聽負責人介紹先啦~
利用絲網印刷，將自己喜愛嘅圖案利用油彩印係T-shirt上~
接下頁
之後小小豬仲手繪左啲只有佢明白嘅圖形同字句~
小小豬大作終於完成，其實係佢想寫母親節快樂，話件衫係我嘅母親節禮物，見到就真係唔知好嬲定好笑啦~
最後一個工作坊「快趣創意畫廊」~
其實就係俾小朋友自由畫，當然重中負責哥哥都有同小朋友講解啲顏料所涉及嘅科學原理~
豬大師開始動工，睇佢又好似幾專注去畫哦~
不過個製成品就……..佢話係藍天下嘅遊樂場，有摩天輪同滑梯。唉…一向完全係”0″畫畫興趣嘅小小豬肯自己去諗個主題都已經係好難得，所以…….算啦，我都有讚佢畫得靚，希望俾多啲信心佢，等佢慢慢增加畫畫興趣啦~
開開心心又玩左一日，如果唔係因為趕返去同奶奶食母親節飯，小小豬仲可以畫埋面仔同跳多陣彈床呀！
不過佢話唔緊要，仲有兩個星期日可以入嚟，到時再畫老虎仔係塊面上呀~
