【節瓜甜椒煮豆腐】
廣告
自從前幾日發生抽筋暈倒一事，到依刻我真係仲有陰影⋯⋯ 我好怕獨自出街然後收到屋企電話、好怕夜晚阿囡訓覺突然抽筋、好驚聽到阿囡大喊⋯⋯ 即使抱住熟睡中的佢，都會令我回想起當日我抱住暈左的佢喊住去醫院。陰影未過，而咁岩，屋企人幾個都喺呢幾日突然唔舒服⋯⋯
呢刻，我只可以不斷提醒自己要堅強，要撐落去。其實咪睇我個樣好似好柔弱、好斯文，其實我個人剛強，講野又直畢甩，所以關心說話其實唔識講太多⋯⋯ 我淨係識得用“煮”去表達自己，我只係希望屋企人個個食得開開心心、健健康康，咁就好啦。
大家唔駛擔心我，因為對於我黎講，“煮”都係個減壓方法來的，所以我呢刻既情緒雖然仲係擔心，但已經好好多了。講番啲開心野先，就係阿Bu胃口番返黎啦！我今次就用上煲比屋企人飲嘅“番茄薯仔豬展湯”去煮左呢個【節瓜甜椒煮豆腐】，阿Bu非常捧場，好快就食晒成碗飯添！
【節瓜甜椒煮豆腐】適合1歲或以上小朋友食用
材料：
節瓜・・・・・1/2個（去皮，洗淨，切粒）
紅甜椒・・・・1/4個（去蒂，去籽，洗淨，切粒）
布包豆腐・・・1/2個（沖淨，切厚片）
湯／水・・・・適量 ＊我用上屋企煮好的“番茄薯仔湯”做湯底，大家可選擇用其他湯水或清水代替
熟白飯・・・・1/2碗
做法：
1）將湯注入煲內，以大火煮滾，加入節瓜粒和紅甜椒粒，轉中火煮至材料軟身，然後加入豆腐片煮熱，即可將材料和湯盛於碗內，伴以熟飯食用。
