【簡易家常菜】 鎮江醋雞翼

其實煮雞翼我都係煮得幾密，當然係因為小小豬勁鐘意食，基本上佢一個人仔可以最多食四隻，真係仲多過我呀！

另一個原因就係雞翼真係好易煮，同埋配搭又多元化，最啱我依啲偽大廚扮勁嘛…哈哈哈！

材料：雞翼一磅、紅蘿蔔一條、蒜頭半粒、蜜糖、鎮江汁~

雞翼解凍後洗乾淨，生抽1.5湯匙、魚露半湯匙及粟粉半湯醃大約半小時~

蒜頭拍鬆；蘿蔔去皮以滾筒式切塊~

下油將雞翼兩面煎至金黃~

然後加入蒜頭兜勻，直至炒至聞到好香嘅蒜頭味~

加入紅蘿蔔塊~

接下頁

落鎮江汁料(大約三分二碗嘅份量就可以)~

之後加少少水(大約加至可蓋過啲雞翼)~

最後加一粒冰糖~

待冰糖溶左之後就可以快手炒勻，同一時間就可以試一試味，有需要可以因應個人口味加鎮江汁/冰糖。

加蓋慢火煮8分鐘(要間中打開望一望，怕會乾水，咁就會好易燶啦)，大約至收剩1/4汁料，就可以加入蜜糖，快手兜炒~

可以開餐啦~

用鎮江汁嚟煮餸我都係第一次，所以初時都好擔心個味道會唔好食，不過原來個汁係酸酸甜甜，幾好食又夠開胃，可以話都幾啱夏天食呀！

BY 小小豬的成長日誌