【親子好去處】太子 大坑東遊樂場 Tai Hang Tung Recreation Ground

相信一家大細常常希望同小朋友來個草地短線遊! 但係一諗起草地就只係想到迪欣湖、佐敦谷等等, 最後覺得太遠就放棄咗! 其實你又知唔知喺巿區都有好多綠色好去處!

今日我哋嚟到大坑東遊樂場, 其實離太子港鐵站只係10分鐘路程! 裡面有大草地, 小食亭, 洗手間及兒童遊樂設施好齊全好方便!

我哋由屋企慢慢行穿過警察遊樂會去到界限街入口! (見到靚靚鳳凰木又要影番張相先)

球場旁邊公園有兩行大樹好遮蔭!!

我哋由3號足球場入去大草地!

成個大坑東遊樂場由三個足球場, 跑步徑(不同大小)同一個欖球場組成

接下頁

足球場旁邊有幾個鐵籠放咗喺度, 原來只要自己帶個鎖嚟就可以將自己包包放入去鐵籠度!

哥哥拎出自己既搖控車出嚟玩! 不過始終個地下都濕濕地, 唔係行得太順利!

玩咗一陣我哋過去小食亭度抖一抖! 順便俾哥哥有個平地去玩搖控車

呢間小食亭都非常齊全咩都有, 同埋價錢都唔貴! 老闆係伯伯婆婆夫妻檔睇舖, 好親切好友善!

西瓜波番皂泡一定唔少得啦! 呢款咁懷舊既士多仔真係買少見少

小食亭對出都有幾張枱櫈放喺度, 自己製造一個高檔High Tea環境, 聽吓雀仔唱歌, 吹吓涼風! 食番隻雞脾嘆番罐可樂, 真係人生樂事!

可樂($5); 雞脾($11)

High 完 Tea太陽出嚟, 我哋就再落草地玩!

成個球場都冇人, 任踢入射唔嬲!!!!!~ YEAH

接下頁

其實呢個球場地方好大, 就算球場範圍外都有好多草地, 所以其實一家大細都可以落到嚟舖張墊喺草地上野食!

不過有點可惜, 呢度唔俾踩Roller, 單車, 玩搖控飛機(搖控車冇問題), 同埋唔準帶狗仔嚟!

場內兩側都有好多小木櫈同靚靚樹木! 人又唔多, 去又方便, 真係一個幾唔錯既野餐地方

始終地勢唔高, 所以都唔俾放風箏! 何況風都唔會夠大啦

近界限街同大坑東道交界有一座建築物, 整座都被藤樹包圍住, 感覺好似去咗天空之城咁!

行出馬路睇吓佢正面, 原來係個蓄洪池!

踢完波放吓飛機, 喺大坑東遊樂場就燒咗2個鐘時間又俾佢放到電喇

Photo byCANON 5D Mark III,Len|EF 24-70mm f2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分:9分

呀劍評語:其實好多大草地就在你附近, 只係大家冇留意未發覺啫!

大坑東遊樂場簡介

1條480米長的緩跑徑, 1足球場, 1欖球場, 小食亭, 洗手間及更衣室

地址

九龍深水埗界限街 63 號

交通

太子 地鐵站從 A 出口離開

→經 運動場道 (途經 “嘉康中心”),轉左至 通菜街

→經 通菜街 ( 途經 Shell 油站 ), 於 界限街 行人輔助線 過馬路後 轉右

→沿 界限街 至 大坑東遊樂場 南面入口

石硤尾 地鐵站從 B1 出口離開

→沿 窩仔街 (途經 “萬寧” 石硤尾分店), 轉右至 棠蔭街

→沿 棠蔭街 直行 (途經 “聖道中學”), 於轉處 到達 大坑東遊樂場 北面入口

開放時間

每日上午7時至下午6時

電話

2777 8946

(以上資料更新至文章當日)

Facebook專頁:呀劍萬帥 kimfamilytraveltips

Blog網誌 :kimfamilytravel.blogspot.hk